ജാക്ക് ഹിഗ്ഗിൻസ് എന്ന തൂലികാ നാമത്തിൽ പ്രശസ്തനായ ബ്രിട്ടീഷ് എഴുത്തുകാരൻ ഹെൻറി പാറ്റേഴ്സൺ ( 92 ) അന്തരിച്ചു. ‘ ദ ഈഗിൾ ഹാസ് ലാൻഡഡ് ” എന്ന ഏറ്റവും കൂടുതൽ വിറ്റഴിക്കപ്പെട്ട നോവലിലൂടെയാണ് ഹെൻറി ലോകപ്രശസ്തനായത്. അദ്ധ്യാപകനായിരിക്കെ 1959ൽ ‘ സാഡ് വിൻഡ് ഫ്രം ദ സീ ” എന്ന നോവലിലൂടെ എഴുത്ത് ആരംഭിച്ച ഹെൻറി 2017 വരെ 85 നോവലുകൾ രചിച്ചു. ഇവ 55 ലേറെ ഭാഷകളിലേക്ക് വിവർത്തനം ചെയ്യപ്പെട്ടിട്ടുണ്ട്.
രണ്ടാം ലോകമഹായുദ്ധ കാലത്ത് ബ്രിട്ടീഷ് പ്രധാനമന്ത്രി സർ വിൻസ്റ്റൺ ചർച്ചിലിനെ തട്ടിക്കൊണ്ടുപോകാനുള്ള നാസി ഗൂഢാലോചന ഇതിവൃത്തമാക്കി രചിച്ച നോവലാണ് ദ ഈഗിൾ ഹാസ് ലാൻഡഡ്.ഈ പുസ്തകത്തിന്റെ 5 കോടിയിലേറെ കോപ്പികളാണ് വിറ്റഴിക്കപ്പെട്ടത്. വൈകാതെ 1976ൽ ദ ഈഗിൾ ഹാസ് ലാൻഡഡ് അതേ പേരിൽ ഒരു സിനിമയാക്കപ്പെട്ടു.
മൈക്കൽ കെയ്‌ൻ, ഡൊണാൾഡ് സതർലാൻഡ്, റോബർട്ട് ഡൂവോൾ തുടങ്ങിയവരാണ് പ്രധാന വേഷങ്ങളിലെത്തിയത്. കംസ് ദ ഡാർക് സ്ട്രേഞ്ചർ, ഹെൽ ഈസ് റ്റൂ ക്രൗഡഡ്, റ്റു ക്യാച്ച് എ കിംഗ്, റാത്ത് ഒഫ് ദ ലയൺ, എ പ്രെയർ ഫോർ ദ ഡയിംഗ് തുടങ്ങിയവയാണ് ഹെൻറിയുടെ മറ്റ് പ്രധാന നോവലുകൾ. 2017ൽ പുറത്തിറങ്ങിയ ദ മിഡ്നൈറ്റ് ബെൽ ആണ് ഹെൻറിയുടെ അവസാന നോവൽ.
