നട…നട
നടവരമ്പത്തൂടെ നട
തരിശു നിലത്തിന്റെ
തിണർത്ത ഞരമ്പിലൂടെ നട
പ്രഭാതസവാരിക്കിടെ കാറിടിച്ച്
മരിക്കാൻ ആഞ്ഞു വലിച്ച് നട
കറപ്പുടുത്ത് നട
ചോപ്പുടുത്ത് നട
കാവിയുടുത്ത് നട
പച്ച പുതച്ച് നട
നഗ്നതയുടെ കച്ച മുറുക്കി നട
നാവടക്കി നട
കാടിളക്കി നട
നല്ല നടപ്പിൽ നട
നട വെക്കാൻ നട
കിട പിടിക്കാൻ നട
കൊടി പിടിക്കാൻ നട
നട മടക്കാൻ നട
വീട്ടേണ്ട കടം വീട്ടാനാകാതെ
ഒടുക്കത്തെ വഴി തേടി നട
നട കൊൾക വരാത്തൊരു
നല്ല നാളെക്കായി നട
അവിഹിതപ്പിടയെ കണ്ട്
നാണം കെട്ട് നട
മുഴു ഗർഭിണിയെ
പഴന്തുണിമഞ്ചലിൽ ചുമന്ന്
കാനനപാതയിലൂടെ നട
രാസലഹരിയിൽ
ഒഴുകിയൊഴുകി നട
പൂവറിയാതെ തേനെടുക്കുന്ന
തേൻ തൊഴിലാളിയെ കണ്ട് നട
മണ്ണറിയാതെ കിളക്കുന്ന
തൊഴിലുറയെ കണ്ട് നട
ഭൂമിയുടെ അറ്റത്തേക്ക് നട
ഒരു പോറലുമേൽപ്പിക്കാതെ നട
സ്വർഗ്ഗപ്പടി കാണും വരെ നട
സ്വന്തം വേട്ടപ്പട്ടിയോടൊപ്പം നട
മറുകരയെത്തിച്ച വഞ്ചിയെ
പുഴയിലുപേക്ഷിക്കാതെ
മുതുകിലേറ്റി കൂനിക്കൂനി നട
നടയടയ്ക്കും മുമ്പെത്തണം നട
നട തള്ളാൻ നട
വിട കൊള്ളാൻ നട
നടത്തിച്ചയാൾക്ക്
ഒരൂന്ന് വടിയായി നട
കനിവിലലിഞ്ഞില്ലാതാകുവോളം
വിശ്രാന്തിയിലശ്രാന്തം നട
കുംഭത്തിലെക്കളിയാട്ടം കാണ്മാൻ
അന്തിക്കള്ളുമടിച്ചാടിപ്പാടി നട
അരിയും പൂവുമെറിഞ്ഞ് നട
കണ്ണനെ കാണാതുഴറും
തരിവളയിട്ട രാധയുടെ
വിരഹക്കണ്ണീർത്തൂമഴയേറ്റ് നട
കാലിനു വേഗം പോരെങ്കിൽ
കാലരിഞ്ഞെറിഞ്ഞ് നട
വിയർപ്പിലെ ഉപ്പ് കുറുക്കി നട
മുടിയഴിച്ചിട്ട ഭ്രാന്തിയെപ്പോലെ
കടൽക്കാറ്റിനെതിരെ നട
സ്ഥലജലവിഭ്രാന്തിയന്യെ
നടുക്കടലിലേക്ക് നട
പരമഹംസത്തെപ്പോലെ നട
നട വാഗ്വീശരിയുടെ
നടനപ്പന്തലിലേക്ക് നട
ചങ്ങമ്പുഴയ്ക്കൊരു വാഴക്കുല
നൽകാൻ നട
വൈലോപ്പിള്ളിക്കൊരു
മാമ്പഴം നൽകാൻ നട
മരിച്ചിട്ടും മരിക്കാത്ത
വ്യാസനൊപ്പം നട
മരിച്ചിട്ടും മരിക്കാത്ത
കാളിദാസനൊപ്പം നട
മൈനയെപ്പോലെ നട
നടത്തക്കാരനില്ലാതെ നട
നടരാജനെ കാണാൻ നട
ഗജരാജനെ മയക്കാൻ കാട്ടിലേക്ക് നട
മല ചവിട്ടാൻ നഗ്നപാദനായി നട
കരയാമയെ പോലെ മയങ്ങി നട
കാട്ടുമുയലിനെ പോലെ വെന്തുരുകി
തുള്ളിത്തുള്ളി നട
കുഴിമന്തിയും കഴിച്ച്
കുഴിയിലേക്കിറങ്ങാൻ നട
വിഷവിത്തുകൾ വാളിക്കൊണ്ട് നട
ചൂഷകനുവേണ്ടി
മുഷ്ടി ചുരുട്ടി മീശ പിരിച്ച്
ഇൻക്വിലാബ് വിളിച്ച് നട
വിനാശത്തിന്റെ പാതയിലേക്കുള്ള
ഒടുക്കത്തെ മൈൽക്കുറ്റിയായി
വേര് പൊട്ടിച്ച് നട
തീച്ചാമുണ്ടിയായി പൂമി കുലുക്കി
കാൽച്ചിലങ്ക കിലുക്കി നട
തീക്കുണ്ഡത്തിലേക്കുശിരോടെ
വിട കൊൾവാൻ നട
തെക്ക്ന്ന് വടക്കോട്ട് നട
ജംബുദ്വീപിന്റെ രാജാവാകാൻ
ഒരു പിച്ചക്കാരനായി നട
നവമാദ്ധ്യമങ്ങളിലൂടെ നട
അമേദ്ധ്യം ചവിട്ടിയശുദ്ധമാകാതെ നട
ദേവശിലയിൽ രാമൻ പുനരവതരിക്കുമ്പോൾ
അയോദ്ധ്യയിലേക്ക് നട !
