യുവ കവി സുജീഷിന്റെ ‘വെയിലും നിഴലും മറ്റു കവിതകളും’ എന്ന കവിതാസമാഹാരം പുറത്തിറങ്ങി. കവിതയിൽ തന്റേതായ ബോധ്യത്തിലൂടെ നീങ്ങുന്ന ഈ കവി വിവർത്തന രംഗത്തും ഏറെ സജീവമാണ്. സാമൂഹിക മധ്യമങ്ങളിലൂടെ എഴുതിത്തുടങ്ങിയ സുജീഷ് ബ്ലോഗുകളിലും ഓൺലൈൻ പ്രസിദ്ധീകരണങ്ങളിലും നിരവധി കവിതകൾ പ്രസിദ്ധീകരിച്ചിട്ടുണ്ട്.
സുജീഷിന്റെ കവിതയെപ്പറ്റി മലയാളത്തിലെ ചില കവികൾ അഭിപ്രായപ്പെട്ടത് :
“കവിതകൊണ്ട് മാത്രം സാധ്യമാവുന്ന ആവിഷ്ക്കാരങ്ങളുണ്ട് എന്ന തീർച്ച സുജീഷിന്റെ കവിതകളുടെ ബോധത്തിന്റെ ഊർജ്ജമാണ്. കവിതകൊണ്ട് മാത്രം തുറക്കാവുന്ന പൂട്ടുകളെ അത് സധൈര്യം സഗൗരവം സമീപിക്കുന്നു. നമ്മൾ കണ്ടുപരിചയിച്ചിട്ടില്ലാത്ത മേഖലകളിലേക്ക് പടരാനുള്ള കെൽപ്പും കല്പനാവൈഭവവും ഈ കവിതകളിൽ സന്നിഹിതമാണ്. പുതിയ മലയാളകവിതയിൽ പ്രധാനപ്പെട്ട ഒരു പുസ്തകമായിരിക്കും ഇതെന്ന് എനിക്കുറപ്പുണ്ട്.”
— ടി. പി. വിനോദ്, കവി
“പ്രപഞ്ചം ഒരു കടലാസ്സിലാണു സ്ഥിതി ചെയ്യുന്നതെന്ന പോൾ വലേറിയുടെ പ്രഖ്യാപനം ഓർമിക്കുന്നു, സുജീഷിന്റെ കവിതയിലൂടെ സഞ്ചരിക്കുമ്പോൾ. ഓരോന്നും പെൻസിൽ കൊണ്ടു വരച്ച ഓരോ ചെറിയ ചിത്രം ആണെന്നേ ആദ്യം തോന്നൂ. എന്നാൽ അവിടെ കുറച്ചു നേരം ചെലവഴിക്കുമ്പോൾ, വാക്കു-കളിൽ വിചിത്രമായ പ്രാണനുകൾ പെരുകുന്നത് അറിയാം. ഓരോ വസ്തുവും വിശദമാകുന്നു, അവ ധ്യാനിക്കുന്നു. പുതിയ സ്വരവും ഇടവും നൽകുന്നു സുജീഷിന്റെ കവിത.”
— അജയ് പി. മങ്ങാട്ട്, എഴുത്തുകാരൻ
“സുജീഷിന്റെ കവിത ഒരു പുതിയ ഭാഷ സൃഷ്ടിക്കാന്‍ ശ്രമി-ക്കുന്നു. കവിത ഭാഷയില്‍ തന്നെയുണ്ട്, അത് കണ്ടെത്തുകയേ വേണ്ടൂ എന്ന് സുജീഷിന്റെ കവിതകള്‍ നമ്മെ ഒരിക്കല്‍ കൂടി ഓര്‍മ്മിപ്പിക്കുന്നു”
— കെ. സച്ചിദാനന്ദൻ, കവി
“കവിതയുടേതായ ഭാഷയിലേക്കും ജീവിതത്തിലേക്കും വളരെ എളുപ്പത്തിൽ പ്രവേശിക്കാൻ കഴിഞ്ഞതായിട്ടാണ് സുജീഷിൻ്റെ കവിതാ സമാഹാരമായ “വെയിലും നിഴലും ” വായിച്ചു തീരുമ്പോൾ എനിക്കു തോന്നിയത്. വായനയിൽ എപ്പോഴും എന്നിൽ നിന്നും അകന്ന് നിന്ന കവിതാവായനയെ അല്പമെങ്കിലും ചേർത്തു നിർത്തുന്നത് ഇതുപോലുള്ള പുസ്തകങ്ങളും സുഹൃത്തുക്കളും വഴിയാണ്.”
— പ്രതീഷ് എൻ. പി.
“വാക്ക് ഈ കവിക്ക് ഒരു കനമല്ല. വാക്കുകളുടേതായ സ്ഥാപന ദൗത്യത്തിൽ പെട്ടു കിടക്കുന്നതാണ് സാധാരണ വ്യവഹാരം. അത് ഒരു ശൂന്യസ്ഥലിയുടെ ക്രിയാത്മകതയെ തൊടാൻ പര്യാപ്തമല്ല. സുജീഷിന്റെ കവിതകൾ പൊതുവെ വായിക്കുമ്പോൾ ഈ ലൌകികത്തിൽ ഒരു മറുലോകമോ അതിന്റെ ശൂന്യമായ ഇടത്തിലെ ക്രിയാശക്തി കാണാൻ കാത്തിരിക്കുന്നതോ ആയ ഒരു പ്രവർത്തനം കൂടി കാണാനാകുന്നുണ്ട്.”
— നിക്സ്ൺ ഗോപാൽ, എഴുത്തുകാരൻ
“”ഒഴിവാക്കേണ്ടതായിരുന്നു എന്ന് പറയാൻ ഒരു കവിത പോലും തോന്നിപ്പിച്ചില്ല. ഇടയിൽ, തടാകം, അലട്ടൽ എന്നീ കവിതകൾ കൂടുതൽ ഇഷ്ടപ്പെട്ടു. ഭാവതലത്തിൽ ആഴത്തിലുള്ള ഒരു coherence തിരിച്ചറിയാൻ പറ്റുന്ന ഒരു ശൈലി രൂപപ്പെടുത്താൻ സുജീഷ് ധ്യാനപൂർവ്വം എടുക്കുന്ന ശ്രമം വായനയെ, പ്രത്യേകിച്ച് കവിതയെ, ഗൗരവമായി കാണുന്ന ആരെയും സന്തോഷിപ്പിക്കും”
— സുരേഷ് പി. തോമസ്, എഴുത്തുകാരൻ
“ഒത്തിരി നേരം ഒരു മരത്തിലേക്ക് നോക്കിയിരിക്കുന്ന ഒരാൾക്ക് മാത്രം കാണാൻ കഴിയുന്ന എന്തോ എഴുതിയിട്ടുണ്ട് എല്ലാ മരങ്ങളിലും എന്ന് തോന്നിപ്പിക്കുന്ന കവിതകളാണ് സുജീഷിന്റേത്. ഭാഷ കൊണ്ട് അടയാളപ്പെടുത്തപ്പെടുന്നതിൽ ചുറ്റുമുള്ളവയൊക്കെ അയാളോട് സന്തോഷം പ്രകടിപ്പിക്കുന്നുണ്ട്.”
— ബേസിൽ സി.
ജെ, മ്യുസീഷ്യൻ
പുസ്തകത്തിന്റെ വില 150 രൂപ. 7306486715 എന്ന ഗൂഗിൾ പേ നമ്പറിലേക്കോ letter.sujeesh@okaxis എന്ന യുപിഐ ഐഡിയിലേക്കോ ട്രാൻസഫർ ചെയ്ത ശേഷം 7306486715 എന്ന വാട്ട്സ്അപ്പ് നമ്പറിലേക്ക് നിങ്ങളുടെ വിലാസവും ഫോൺ നമ്പറും അയക്കുക. (പുസ്തകം ആമസോൺ ഇന്ത്യ, ഫ്ലിപ്കാർട്ട്, നോഷൻ പ്രെസ്സ് എന്നീ സൈറ്റുകൾ വഴിയും ഓർഡർ ചെയ്യാവുന്നതാണ്).
