കുഞ്ഞുണ്ണിയെ ഓർക്കുമ്പോൾ

1

പൊക്കക്കുറവിൽ പൊക്കം
നീളക്കുറവിൽ ഉണ്ണിക്കവിത
ഹിമാലയത്തിൻ കണ്ണുണ്ണി നീ
മലയാളത്തിൻ പൊന്നുണ്ണി

2

എല്ലാമായൊരു ഇല്ലായ്മ
എങ്കിലുമിവിടൊരു വല്ലായ്മ
മായയ്ക്കുണ്ടൊരു വാലായ്മ
പാണ്ടൻ നായയ്ക്കുണ്ടൊരു വയ്യായ്ക

3

ഏകാന്തഭക്തി വിരിഞ്ഞ നെറ്റിയിൽ
ഏകഭസ്മരേഖ പൂശി നടക്കും ഏകാകി നീ
കട്ടിക്കണ്ണടക്കുള്ളിൽ ദർശനത്തിന്റെ
നേത്രങ്ങളേതോ വിസ്മയത്തുമ്പത്ത്‌ !
വടിക്കാത്ത താടിക്കിടയിൽ
ഭാവചാപല്യങ്ങൾക്കിടം നിഷേധിക്കും ബ്രഹ്മചാരിച്ചുണ്ടുകൾ
സ്വച്ഛന്ദവിഹാരി, നീ കവിതക്കാവിലെ പൂജാരി!

ഈരേഴു പതിനാലു കൊല്ലം പോയി
കുറുങ്കവിതകളുടെ ബാദുഷ
പടിയിറങ്ങിപ്പോയിട്ട്!
ഋജുമലയാണ്മയിൽ കുറുക്കിയെഴുതാനും
കുട്ടികളോടൊപ്പം നീട്ടിച്ചൊല്ലാനും
ഇനിയൊരിക്കൽക്കൂടി നിളക്കരയിൽ
ഒരതിഥിയായി എത്തുമോ നമ്മുടെ കുഞ്ഞുണ്ണിമാഷ് !!

4

ആയുസ്സിന്റെ ചില്ലറ
ആത്‌മാവിന്റെ പൊന്നറ
പൊന്നറ തേടിയിറങ്ങാതെ
വീണുമയങ്ങി വെള്ളിച്ചില്ലറയിൽ
ഞെട്ടിയുണർന്നൂ കല്ലറയിൽ!
കല്ലറ എല്ലുംകൊട്ടിൻ കലവറ
സത്യത്തിൻ തറപറയറിയുന്നോനത് നിറപറ

5

ഒരിക്കൽ ഗുരു കുഞ്ഞുണ്ണി
ഇവന്റെ പേർക്കൊരു കാർഡിൽ   :
തനിക്ക് എഴുതാൻ കഴിയും ;
വിടാതെ കൂടിക്കോളൂ !
കല്പന ശിരസാ വഹിച്ചു
വിടാതെ ചുറ്റിപ്പറ്റിയിട്ടെന്താ,
കാവ്യമങ്കയുടെ പൂർണ്ണകുംഭക്കൊങ്കകൾ
പിടിയൊട്ടും തരാതെ കൊതിപ്പിക്കുകയല്ലേ
പൊക്കിൾകുഴിക്കക്കരെ………..!

6

മരുഭൂവിലെ കണ്ണീർപ്പാടത്ത്‌
കവിതപ്പെണ്ണേ
വിതയ്ക്കൂ നീ
പച്ചപ്പും അത് കാണാനൊരു
പച്ചക്കണ്ണും തന്ന് മയക്കൂ നീ.
കവിതപ്പെണ്ണേ
പാടൂ നീ
കേൾക്കാനിരു കാതും
തന്ന് മയക്കൂ നീ.
കവിതപ്പെണ്ണേ,യുണർത്തൂ
സ്വപ്നാടകനാമെന്നെ, മെല്ലെ നീ,
ഋതലോകത്തേക്ക് തെളിക്കൂ!

അഭിപ്രായങ്ങൾ

അഭിപ്രായങ്ങൾ