പുൽക്കൂട്ടിലെ രാജകുമാരൻ

കിങ്ങിണിത്തത്തഃ-

കാലിത്തൊഴുത്തിലൊരുണ്ണി പിറന്നേ

കണ്ണിനും കണ്ണായൊരുണ്ണി പിറന്നേ!…

ഉണ്ണിയെ കുമ്പിട്ടു കൈവണങ്ങാനായ്‌

പോകുന്നു ഞാനെന്റെ കൊച്ചുകുട്ടായീ…!

(കിങ്ങിണിത്തത്ത പോകുന്നു. പിന്നാലെ കുഞ്ഞിപ്പൂമ്പാറ്റയുടെ വേഷമണിഞ്ഞ

ഒരു കുട്ടി കടന്നുവരുന്നു).

കൊച്ചുകുട്ടായിഃ-

എങ്ങോട്ടുപോകുന്നു പൂമ്പാറ്റക്കുഞ്ഞേ

സ്വർണച്ചിറകുള്ള പൂമ്പാറ്റക്കുഞ്ഞേ?

കുഞ്ഞിപ്പൂമ്പാറ്റഃ-

കാലിത്തൊഴുത്തിലൊരുണ്ണി പിറന്നേ!…

കാരുണ്യരൂപനാമുണ്ണി പിറന്നേ!

ഉണ്ണിക്കു പൂന്തേനും പൂമ്പൊടീം നൽകാൻ

പോകുന്നു ഞാനെന്റെ കൊച്ചുകൂട്ടായീ…“

(കുഞ്ഞിപ്പൂമ്പാറ്റ പറന്നുപോകുന്നതോടെ പൂങ്കുയിൽ അതുവഴി പറന്നുവരുന്നു).

കൊച്ചുകുട്ടായിഃ-

എങ്ങോട്ടുപോകുന്നു പൂങ്കുയിൽപ്പെണ്ണേ

മങ്ങാട്ടുകാവിലെ പൂങ്കുയിൽപ്പെണ്ണേ?

പൂങ്കുയിൽഃ-

കാലിത്തൊഴുത്തിലൊരുണ്ണി പിറന്നേ

കാരുണ്യരൂപനാമുണ്ണി പിറന്നേ!…

ഉണ്ണിയെക്കണ്ടൊരു താരാട്ടുപാടാൻ

പോകുന്നു ഞാനെന്റെ കൊച്ചുകുട്ടായി!…

(പൂങ്കുയിൽ ‘കൂകൂ’ എന്നു കൂവിക്കൊണ്ടു പാറി മറയുന്നു. അപ്പോൾ ഒരു മയിലമ്മ

അതുവഴി കടന്നുവരുന്നു).

കൊച്ചുകുട്ടായിഃ-

എങ്ങോട്ടു പോകുന്നു പൊന്മയിലമ്മേ

ഏഴഴകുള്ളൊരു പൂമയിലമ്മേ?

മയിലമ്മഃ-

കാലിത്തൊഴുത്തിലൊരുണ്ണി പിറന്നേ

കാരുണ്യരൂപനാമുണ്ണി പിറന്നേ!…

ഉണ്ണിക്കിടാവിനു പൂംപീലി നൽകാൻ

പോകുന്നു ഞാനെന്റെ കൊച്ചുകുട്ടായീ!…

(മയിലമ്മ ആട്ടമാടി കടന്നുപോകുന്നു. ഒട്ടും വൈകാതെ കുഴലുകാരൻ

കുഞ്ഞൻ കടന്നുവരുന്നു).

കൊച്ചുകുട്ടായിഃ-

എങ്ങോട്ടുപോകുന്നു പൂങ്കുഴൽക്കാരാ?

‘പെപ്പപ്പേ’യൂതുന്ന പൊൻകുഴൽക്കാരാ?

കുഴലുകാരൻഃ-

കാലിത്തൊഴുത്തിലൊരുണ്ണി പിറന്നേ

കാരുണ്യരൂപനാമുണ്ണി പിറന്നേ!…

ഉണ്ണിക്കു മുന്നിലീപ്പൂങ്കഴലൂതാൻ

പോകുന്നു ഞാനെന്റെ കൊച്ചുകുട്ടായീ!…

(കുഴലുകാരൻ കുഞ്ഞൻ പോകാനൊരുങ്ങുന്നു. കൊച്ചുകുട്ടായി അവനെ തടയുന്നു).

കൊച്ചുകുട്ടായിഃ-

പോകല്ലേ പോകല്ലേ പൊൻകുഴൽക്കാരാ

ഞാനും വരണുണ്ടു നിന്നുടെ കൂടെ

എല്ലാരും കാണുന്നൊരുണ്ണിയെ കാണാൻ

ഞാനും വരുന്നുണ്ടു നിന്നുടെ കൂടെ!

കുഴലുകാരൻഃ-

ഈണത്തിൽ ഞാനെന്റെ പൂങ്കുഴലൂതാം

താളത്തിൽ നീ നിന്റെ ചെണ്ടയും കൊട്ടൂ

ചെണ്ടേം കുഴലുമായ്‌ നമ്മൾക്കു പോകാം

കണ്ണിനും കണ്ണാകുമുണ്ണിയെക്കാണാൻ!

(ഇരുവരും താളമേളങ്ങളോടെ നൃത്തംവച്ചു കൊണ്ട്‌ ഉണ്ണിയെ കാണാൻ പുറപ്പെടുന്നു).

Generated from archived content: nursery1_dec21_07.html Author: selin

അഭിപ്രായങ്ങൾ

അഭിപ്രായങ്ങൾ