അത്‌ഭുതമാണപ്പൂപ്പൻ
കാഞ്ചനത്തേക്കാൾ
കാന്തിയേറീടിന
ഗാന്ധിയപ്പൂപ്പൻ
പല്ലില്ലാമോണകാട്ടി
ചമ്പ്രംപടിഞ്ഞിരുന്ന്‌
കുഞ്ഞുങ്ങളോടൊത്ത്‌
കളിക്കുമപ്പൂപ്പൻ
പല്ല്‌ ചവിട്ടികൊഴിച്ചവന്റെ
നൊന്തുവോ, യെന്നോതി
കാൽതടവീടും
കരുത്തനപ്പൂപ്പൻ
തോക്കേന്തിവരുന്നോരെ
തോൽപ്പിച്ചീടുവാനായി
തോളോട്‌ തോൾ ചേർന്ന്‌
നിൽക്കാൻ പഠിപ്പിച്ച
ഗാന്ധിയപ്പൂപ്പൻ
വെള്ളംകുടിച്ചൽപ്പ-
വസ്‌ത്രം ധരിച്ച്‌
വെറും കൈയ്യാലെ
വെള്ളക്കാരെതുരത്തിയ
മഹാത്‌മാഗാന്ധിയപ്പൂപ്പൻ.
ഗാന്ധിയെ കശാപ്പ്‌ ചെയ്യുന്നവർ
വേദിയിൽ വേദാന്ത-
മെന്നതുപോലവേ
ആത്‌മവഞ്ചനയേ-
അപഹസിച്ചീടുന്നു
പിന്നെ, യതോർത്തോർത്ത്‌
സ്വയമാസ്വദിക്കുന്നു.
ഗാന്ധിയെൻ, യെന്നുള്ള
ഗമകാട്ടുവാനായി
മൂലയിലായൊരു-
ചർക്കവെച്ചീടുന്നു
നാലു ചക്രത്തിനായ്‌
ചിത്രവധം ചെയ്യാൻ
ഒട്ടും മടിയാത്ത കൂട്ടരാണീവക
കണ്ണിൽ കാതിരൊളിചിന്നും
കിഞ്ചനവാക്കുകൾ ചൊല്ലും
ഉള്ളിൽ കനലൊളിചിന്നും
വഞ്ചന തഞ്ചത്തിൽ ചെയ്യും
ഖദറിന്നകത്തായി
ഗർവ്വൊളിപ്പിക്കുന്ന
കള്ളക്കറുപ്പനാം
നാണയം, യീവക.
Generated from archived content: nurse1_oct12_10.html Author: raju.kanjirangad
