ഒരിക്കൽ തന്റെ വീട്ടിലെത്തിയ ബുദ്ധഭഗവാനെ വീട്ടുകാരൻ ചീത്ത പറയാൻ തുടങ്ങി. കാരണമെന്താണെന്നോ? അയാളുടെ അടുത്ത ബന്ധു, ബുദ്ധദേവന്റെ ശിഷ്യനായി തീർന്നിരുന്നു. ഇത്‌ അയാൾക്ക്‌ ഇഷ്‌ടമായിരുന്നില്ല. ശകാരവർഷം ഒന്നു ശമിച്ചപ്പോൾ മന്ദഹാസത്തോടെ ഭഗവാൻ ചോദിച്ചു.
“നിങ്ങളുടെ വീട്ടിൽ ഒരു അതിഥി വന്നാൽ നിങ്ങൾ സൽക്കരിക്കുമോ?”
“എന്തുകൊണ്ടില്ല?” അയാൾ ചോദിച്ചു.
“ആ അതിഥികൾക്കുവേണ്ടി നിങ്ങൾ ഭക്ഷണം തയ്യാറാക്കുമോ?”
“അതിഥി സൽക്കാരം ഭാരതീയ പാരമ്പര്യമാണ്‌. ഭഗവാന്‌ അതുമറിയില്ലെ?” അയാൾ പരിഹാസഭാവത്തിൽ ചിരിച്ചു.
“അയാൾ നിങ്ങളുടെ ആതിഥ്യം സ്വീകരിക്കുന്നില്ലെങ്കിൽ അയാൾക്കുവേണ്ടി ഒരുക്കിയ ഭക്ഷണം ആർക്കു ലഭിക്കും?”
“ഇതെന്തു ചോദ്യം. ഭക്ഷണം അത്‌ ഒരുക്കിയ ആൾക്കു ലഭിക്കും.”
“അതേ പോലെ നിങ്ങൾ എനിക്കു തന്ന വാക്കുകളാകുന്ന സൽക്കാരം ഞാൻ സ്വീകരിക്കുന്നില്ല.”
ഭഗവാന്റെ മറുപടിയിൽ അയാൾ ലജ്ജിച്ചു.
Generated from archived content: unni_jan1.html Author: k_mukundan
