സെൻമഷിനോട്ടം 

1

അവിടെ എവിടെയാണെന്നു
തേടിയലഞ്ഞൊടുക്കം
അവിടെ ഇവിടെയാണെന്നു
കണ്ടെത്തിയടിയനും.

2

ഭൂമിയിൽ ഭൂജാതനായതല്ല ഞാൻ
ഭൂമിയെന്നിലൂടെ ഭൂജാതയായതാ!

3

തലയെ താലോലിച്ചതാണോ    കൈപ്പിഴ
തലയിൽ ആൾത്താമസമില്ലെന്നു  കണ്ടു
വാലിനെ  കാലമാം വാലിനെ
സ്ഥലമാം മടിയിലിട്ടോ
മനിച്ചുപോയതാണോയിവന്റെ   കൈപ്പിഴ?

4

പനിനീരലരിന്നാരാമത്തിൽ പണ്ട് പണ്ട്
സ്നേഹിക്കാനറിയാതെ പ്രണയിച്ചു, പിന്നെ
രക്തം  പുരണ്ട നാരും മുള്ളുകളാലുമൊരു
കളിവീടുണ്ടാക്കി,യിണചേർന്നും പിണങ്ങിയും
ആയുർദിനങ്ങളെണ്ണിത്തീർത്തു   ജീവന്റെ
നേർസൗരഭ്യമേതുമറിയാതെ.

5

നിന്റെ ഓൺലൈൻ   ഡിക് ഷണറിയിൽ
സ്നേഹം  വെറും നാമരൂപം

എന്റെ അച്ചടി നിഘണ്ടുവിൽ
സ്നേഹം ക്രിയ – കപാലക്രിയ

ഒരു ബോധോദയത്തിൽ
ശബ്ദതാരാവലികൾ കത്തിച്ചു
വാക്കിന്റെ അർഥം തേടി
നമുക്കിറങ്ങിച്ചെല്ലാം
സ്വയം നമ്മളിലേക്ക് തന്നെ.

6

കിണറിനെ
ഭൂഗർഭജലനിരപ്പിനെ
കയറിനെ
തൊട്ടിയെ
കരങ്ങളെ
അമിതമായി വിശ്വസിക്കേണ്ട

ജീവന്റെ ജലധാരയിൽ നിന്നും
നേരിട്ട് കുടിക്കാം!