പരേതാത്മാക്കൾ

ശവപ്പറമ്പുകൾ ഏകാന്തമാണ്.

അസ്ഥിമുറികൾ  അനാഥമാണ്.

തുരംഗത്തിലേക്കുള്ള യാത്രപോലെ

ആത്മാക്കളുടെ അന്ധ പ്രയാണം.

ആഴക്കടലിലെ കപ്പൽ ഛേദത്തിന്റെ

ബാക്കിയായ അനാദിയായ  ഇരുട്ട്.

മരണത്തിന്റെ ചാരമണ്ണുമൂടിയ

ചിതലരിച്ച മൃതാത്മാവുകൾ .

മഴയുടെ കണ്ണുനീരായി,

നായ്ക്കളുടെ  ഓരിയായി,

നിശ്ശബ്ദതയുടെ നിലാവായി,

അവർ തണുത്ത കാറ്റിൽ

അലസരായി അലയുന്നുണ്ട്.

കാലില്ലാത്ത ചെരുപ്പായി,

ശരീരമില്ലാത്ത കുപ്പായമായി,

വിരലില്ലാത്ത മോതിരമായി,

സ്വരമില്ലാത്ത കണ്ഠമായി,

വായില്ലാത്ത നാവിനാൽ

ഇല മർമ്മരം പൊഴിച്ച്

അവരുടെ കാലൊച്ചകൾ

ശവപ്പറമ്പുകളുടെ മൗനത്തിൽ

കേൾക്കുന്നുണ്ടോ എന്നറിയില്ല .

അഭിപ്രായങ്ങൾ

അഭിപ്രായങ്ങൾ