ഓണക്കൊന്ന

( ഓണക്കാലത്ത് പൂത്തു നിൽക്കുന്ന കണിക്കൊന്നയെ കണ്ടപ്പോൾ …..)

നാണമില്ലേ കണിക്കൊന്നേ

ആവണി മാസത്തിലിങ്ങനെ

പൊന്നണിഞ്ഞൊരുങ്ങുവാൻ

മറവിയോ ,ധിക്കാരമോ?

കാലത്തിൻ കല്പനയല്ലയോ

കർണികാരമേ തെറ്റിച്ചു നീ

കലികാലവൈഭവമെന്നു

വിലപിക്കുന്നു കാരണോർ

നിന്നെക്കണ്ടു പിണങ്ങിയോ

പൊന്നോണപ്പൂവുകൾ?

കാൺമതില്ലെവിടെയും

വെൺ തുമ്പകൾ , മുക്കുറ്റിയും

കണ്ണിനാനന്ദമെങ്കിലും

കർണികാരത്തിനാകുമോ

തിരുമുറ്റത്തൊരുക്കുവാൻ

തിരുവോണപ്പൂക്കളം ?

ആഴിയോളമാശിച്ചുവോ നീ

ആവണിപ്പൂവാകുവാൻ!

അതിമോഹമെങ്കിലും കേൾ

അപരാധമതിലില്ല

സ്വാഗതം, സ്വാഗതം പൂവേ

സ്വർഗീയ സൗന്ദര്യമേ

തിരുവോണപ്പൂക്കളം തീർക്കാൻ

തിരുമുറ്റത്തണഞ്ഞാലും

മാബലിത്തിരുമേനിക്കു

പൊൻ കണിയൊരുക്കിടാൻ

പോരുനീ കണിക്കൊന്നേ

പൊറുത്തിടാമവിവേകം.

അഭിപ്രായങ്ങൾ

അഭിപ്രായങ്ങൾ