” മോളെ മിന്നൂ , അമ്മയെ ഒന്ന് സഹായിച്ചു താ”
രാവിലെ അടുക്കളയിൽ നിന്നും അമ്മയുടെ വിളി കേട്ടപ്പോൾ മിന്നുവിന് സന്തോഷമായി . അടുക്കളയിൽ കയറാനും അമ്മയെ സഹായിക്കാനും അവൾക്ക് വലിയ ഇഷ്ടമാണ്. വിളിക്കാതെയെങ്ങാനും അടുക്കളയിലേക്ക് ചെന്നാൽ അമ്മ വഴക്ക് പറയും.
” നിനക്ക് പഠിക്കാനൊന്നുമില്ലേ ചെന്നു പഠിക്കാൻ നോക്ക് ” എന്ന് പറഞ്ഞാണ് ഇപ്പോഴും അമ്മ ഓടിക്കുക.
ഇന്ന് എന്തെങ്കിലും അത്യാവശ്യം കാണും അല്ലെങ്കിൽ അമ്മ വിളിക്കില്ല. അവൾ ചെല്ലുമ്പോൾ അമ്മ ദോശ ചുടുകയാണ് .
” മോളെ ഈ ദോശയൊന്നു ചുട്ടെ കരിയാതെ നോക്കണം കേട്ടോ ” മിന്നുവിന് സന്തോഷമായി . അവൾക്ക് ദോശയാണ് ഏറ്റവും ഇഷ്ടപ്പെട്ട പലഹാരം.
”ഇന്ന് അമ്മക്ക് നേരത്തെ ഓഫീസിൽ പോകണം. ഡാഡി എഴുന്നേറ്റു വരുമ്പോൾ ദോശ റെഡിയായില്ലെങ്കിൽ പിന്നെ അതുമതി രാവിലെ വഴക്കിന്”
അമ്മ പറഞ്ഞത് ശരിയാണ് . ഡാഡി കണ്ടാൽ അമ്മയെ വഴക്കു പറയും . പഠിക്കേണ്ട സമയത്ത് മോളെ അടുക്കളപ്പണി ചെയ്യിച്ചെന്നും പറഞ്ഞ്. അതുകൊണ്ട് ഡാഡി എഴുന്നേൽക്കും മുൻപ് ദോശ ചുട്ടു തീർക്കണം . അമ്മ കുളിക്കാൻ പോയപ്പോഴേക്ക് അവൾ ദോശ ഓരോന്നായി ചുട്ടു തുടങ്ങി.
പെട്ടന്ന് ‘ മ്യാവൂ മ്യാവൂ’ എന്ന് ശബ്ദം കേട്ട് മിന്നു ജനലിനു മുകളിലേക്ക് നോക്കി . അതാ അവിടെ ഇരിക്കുന്നു അവളുടെ പ്രിയപ്പെട്ട പൂച്ച.
എങ്ങനെയെന്നറിയില്ല മിന്നു അടുക്കളയിൽ എത്തിയെന്നറിഞ്ഞാൽ പൂച്ചക്കുട്ടിയും അവിടെ എത്തും. അമ്മയാണെങ്കിൽ അവനു പേടിയാണ്. കയ്യിൽ കിട്ടുന്നതെന്താണെങ്കിലും അതുകൊണ്ട് ‘അമ്മ എറി ഞ്ഞൊടിക്കും.
മിന്നുവാകട്ടെ അടുക്കളയിൽ ഉള്ളത് തപ്പിപ്പെറുക്കി അവനു കൊടുക്കും. അവൾ അടച്ച് വച്ചിരുന്ന പാത്രം തുറന്നു നോക്കി. മീൻകറിയാണ് . അമ്മ വരുമോ എന്ന പേടിയോടെ മിന്നു ഒരു മീൻ കഷണമെടുത്ത് പൂച്ചക്കുട്ടിക്ക് എറിഞ്ഞു കൊടുത്തു . സന്തോഷ സൂചകമായി പൂച്ചക്കുട്ടി വീണ്ടും ‘ മ്യാവൂ ‘ എന്ന ശബ്ദം പുറപ്പെടുവിച്ചുകൊണ്ട് ചിരിച്ചു. അതുകണ്ടപ്പോൾ മിന്നു കുട്ടിക്കും ഒത്തിരി സന്തോഷമായി . ആളനക്കം കേട്ട് തിരിഞ്ഞു നോക്കിയപ്പോൾ പുറകിൽ അച്ഛൻ . അവൾ പേടിച്ചു പോയി. പക്ഷെ അച്ഛന്റെ ചിരി കണ്ടപ്പോൾ മിന്നുവിന്റെ പേടിയൊക്കെ പോയി.
” ‘അമ്മ കാണാതെ മീനൊക്കെ എടുത്ത് പൂച്ചക്കുട്ടിക്ക് കൊടുക്കുകയാണോ?” അച്ഛന്റെ ചോദ്യം കേട്ട് അവൾ ചിരിച്ചു.
” മനുഷ്യരെ മാത്രമല്ല എല്ലാ ജീവികളെയും നമ്മൾ സ്നേഹിക്കണം . ആർക്കെങ്കിലും എന്തെങ്കിലും ഉപകാരം ചെയ്യാനായിരിക്കണം നമ്മൾ എ പ്പോഴും ശ്രദ്ധിക്കേണ്ടത്”
അച്ഛൻ സ്നേഹത്തോടെ അവളുടെ മുടിയിഴകളിൽ തലോടി.
Click this button or press Ctrl+G to toggle between Malayalam and English