വലിയ പാക്കിംഗ്,
നീണ്ട ഉപയോഗം തീരുവോളം
കൗതുകം കെടുകയില്ലെന്നാര് കണ്ടു?
അച്ചാര്‍, കെച്ചപ്പ്
ഷാമ്പൂ,വാഷിംഗ്‌ പൌഡര്‍…
സാഷേകള്‍ ആണ് സൗകര്യം!!!
അനുഷ്ഠാനങ്ങള്‍-
യാത്ര, സിനിമ,ഭക്ഷണം,
ജൗളി, രാത്രി.
ദൈര്‍ഘ്യം-
ഒരു കോഴ്സ്, ഒരിടവേള,
ഒരു ജോലി സ്ഥലം, ഒരൊഴിവ് കാലം
ഉപഭോക്താവിന്റെ സംതൃപ്തി,
അതാണ് പ്രധാനം.
നടക്കാനിറങ്ങുമ്പോള്‍
റോഡിനിരുപുറവും
കണ്ടു മുട്ടാറുണ്ട്,
ഉപേക്ഷിക്കപ്പെട്ട സാഷേകള്‍-
നിയോഗമാതായത് കൊണ്ട്
നിസംഗരാകുന്നവര്‍.
താത്കാലിക ഉപയോഗത്തിന്റെ,
സ്വീകരിക്കാനും നിരാകരിക്കനുമുള്ള
സ്വാതന്ത്ര്യത്തിന്റെ സുഖം,
സാഷേകള്‍ തരുന്നു.
ഭാരമാകാത്ത,
ആകര്‍ഷണീയമായ പാക്കേജ്.
നഷ്ടമില്ലാത്ത,ഖേദമില്ലാത്ത
കച്ചവടം.
Generated from archived content: poem2_oct3_11.html Author: yamini_jacob
