പുഴ ഇപ്പോൾ ശാന്തമാവുകയാണ്‌
ഒരുപാട്‌ അപകടങ്ങളെ ഒളിപ്പിച്ച്‌
കൊടുംചുഴികളിൽ, അഗാധതകളിൽ
മരണത്തിന്റെ കാലൊച്ചയ്‌ക്കായി
കാതുകൂർപ്പിച്ച്‌,
കരയിലേക്ക്‌ കലിതുളളിക്കയറി
വൻമരങ്ങളെ വേരറുപ്പിച്ചും
ഇന്നലെവരെ നീ
രൗദ്രഭാവത്തിലായിരുന്നു.
ഇപ്പോൾ നഷ്‌ടപ്പെടലിന്റെ
അനിവാര്യതയെ
അംഗീകരിക്കയാണോ ഈ ശാന്തത
കലിതുളളി ഇളകിയാടി
നീയിന്നലെ ഒഴുകിയതെവിടേയ്‌ക്ക്‌
കടലിന്ന്‌ നിന്നെ
കയ്യേൽക്കാതിരിക്കാനാവില്ലല്ലോ.
അല്ലെങ്കിൽ കാടും, മലയും
കനവും കടന്ന്‌
നീയിന്നലെവരെ ഒഴുകിയതെന്തിന്‌?
Generated from archived content: poem2_jan27.html Author: sreedevi-k-lal
