അവൾ…!

തെരുവോരത്തബലയായ്‌ അവൾ!

മണ്ണിൽ നഗ്നപാദങ്ങൾ പൂഴ്‌ത്തി,

ശകടവ്യൂഹം തുപ്പും കഫക്കറുപ്പേറ്റി,

അർക്ക കാമക്കണ്ണിലുരുകിയും,

നിറം കെട്ടുമശരണയായ്‌….. അവൾ!

ഒരു പുഴുക്കുഞ്ഞിനവൾ സ്വന്തം-

വിരൽത്തുമ്പിലഭയം നൽകി, യാ-

പുഴു, വിരൽ തിന്നു വീർക്കെ,

ചിലന്തികൾതീർത്ത ചങ്ങലക്കെട്ടിൽ,

കാറ്റിൻ കാമച്ചൂടിൽ തപിച്ചും,

നിരാലംബയായ്‌…. അവൾ!

കിളികൾ തിന്ന പാതിമുലയിൽ-

ഇറുഞ്ചിക്കടിക്കുമുറിമ്പിൻ കാമം..!

ചിതൽ തിന്നു ശുക്ഷ്‌കിച്ച ദേഹ,മതി-

ലാരോ വിസർജ്ജിച്ച മൂത്രഗന്ധം,

രക്തമൂറ്റിക്കൊഴുക്കുമിത്തിക്‌കണ്ണികൾ!

എങ്കിലുമൊരുചുവടനക്കനാകാതെ-

വ്രണിതയായ്‌, പാതി നഗ്നയായ്‌,

ഒരുവാക്കാൽ പോലുമെതിർക്കാതെ,

നിറം മങ്ങിയ ചേലയാൽ

തണൽനൽകി,

നിസ്സംഗയായൊരു വൻ മരം !

Generated from archived content: poem1_sep26_09.html Author: shinil_nedungadu

അഭിപ്രായങ്ങൾ

അഭിപ്രായങ്ങൾ