മലയാള ഭാഷയിലെ ആദ്യ ഇന്റർനെറ്റ്‌ സാഹിത്യ പ്രസിദ്ധീകരണമായ പുഴ ഡോട്ട്‌ കോമിന്റെ ആറാമത്‌ വാർഷികത്തോടനുബന്ധിച്ച്‌ സംഘടിപ്പിച്ച മലയാള ചെറുകഥാ മത്സര വിജയികൾക്കുള്ള പുരസ്‌കാരങ്ങൾ സമ്മാനിച്ചു. എറണാകുളം പ്രസ്‌ക്ലബ്ബ്‌ ഓഡിറ്റോറിയത്തിൽ വച്ച്‌ നടന്ന ചടങ്ങിൽ പത്രപ്രവർത്തകനും എഴുത്തുകാരനുമായ ശ്രീ. കെ.എം. റോയിയാണ്‌ പുരസ്‌കാരങ്ങൾ സമ്മാനിച്ചത്‌. പുഴ ചീഫ്‌ എഡിറ്റർ ശ്രീ. കെ.എൽ. മോഹനവർമ്മ അദ്ധ്യക്ഷം വഹിച്ചു. റോഷ്‌നി സ്വപ്നയുടെ ‘അത്ഭുതലോകത്തെ ഒരു ആലീസ്‌’, ചന്ദ്രശേഖരൻ നാരായണന്റെ ‘ആൾദൈവങ്ങളുടെ മരണം’ എന്നീ കഥകൾ യഥാക്രമം ഒന്നും രണ്ടും സ്ഥാനം നേടി.
ഒന്നാം സ്ഥാനത്തിന്‌ 5000രൂപയും പ്രശസ്തിപത്രവും, രണ്ടാം സ്ഥാനത്തിന്‌ 3000രൂപയും പ്രശസ്തിപത്രവും ലഭിച്ചു.
ഒന്നാം സ്ഥാനത്തിന്‌ അർഹയായ റോഷ്ണി സ്വപ്ന തൃശൂർ സെന്റ്‌ അലോഷ്യസ്‌ കോളേജിലെ മലയാളം അദ്ധ്യാപികയാണ്‌. രണ്ടാം സ്ഥാനത്തിനർഹനായ ചന്ദ്രശേഖരൻ നാരായണൻ തൃശൂർ ജില്ലാ കോടതിയിൽ അഭിഭാഷകനാണ്‌.
ചടങ്ങിൽ സിപ്പി പള്ളിപ്പുറം, കെ. കണ്ണൻ, സുവിരാജ്‌ പടിയത്ത്‌, കെ.സി. സുബിൻ എന്നിവർ പങ്കെടുത്തു.
Generated from archived content: news1_june5_07.html Author: puzha_com
