നഗരനഷ്‌ടം

പ്രതീക്ഷയുടെ

വഴിയിലേക്കെന്റെ

തുടക്കം

നിരാശയുടെ

വീട്ടിലേക്കൊടുക്കം.

കുത്തിനിറച്ച

സ്ഥിരം വണ്ടിയിൽ

പിന്തിരിഞ്ഞുളള മൃഗ

വ്യായാമം.

പരിചയത്തിന്റെ

ലുബ്‌ധിച്ച പുഞ്ചിരി

സ്‌നിഗ്‌ദ്ധമായ

ഹസ്‌തദാനം.

കണ്ണിന്റെ

ചലനവീക്കങ്ങളിൽ

നഷ്‌ടമാകുന്ന

പ്രണയവും

പതിവ്രതവും

കണ്ണീരൊഴുക്കിന്റെ

മൃദുലമാം

കവിൾപാറയിൽ തേഞ്ഞ

ഉപ്പുറ്റിതന്നാശാന്തിയും

കുമ്പസാരക്കൂട്ടിൽനി-

ന്നുറ്റുനോക്കുന്ന

കുമ്മായക്കുരിശിന്റെ ശാന്തിയും

ബാക്കി.

പെരുകുന്ന

തെരുവുപട്ടിയാം

പാപങ്ങൾ ബാക്കി

കടങ്ങളും ബാക്കി

അവൾ തെറ്റിപ്പിരിഞ്ഞ നിരത്തും

അവൻ തെറിയെറിഞ്ഞ തുരുത്തും

അവർ തല്ലിച്ചതച്ചിട്ട കരുത്തും

പണ്ടാരോ

പറയാത്ത മാതിരി

ഈ ജന്മവും ബാക്കി

പറഞ്ഞതങ്ങനെയല്ലെന്നു മാറ്റി

പറയുവാനില്ലാത്ത

ബാക്കി

ഒരു ചായക്കോപ്പയിൽ

ചത്തൊടുങ്ങുന്ന

സമയത്തെങ്കിലും

ധരിക്കാമായിരുന്നു

എന്തെങ്കിലും.

Generated from archived content: poem_july30.html Author: pramod_kuveri

അഭിപ്രായങ്ങൾ

അഭിപ്രായങ്ങൾ