നമ്മൾ

ഒരു നേരത്തെ അന്നത്തിന്‌-

നിന്റെ വാതിലിൽ മുട്ടിയപ്പോൾ

എന്നെ ആട്ടിയിറക്കിയോൻ

എന്റെ വിശന്നൊട്ടിയ വയറിൽ-

കൊഴുത്ത കാൽകൊണ്ട്‌ ചവിട്ടിയോൻ.

വലിയ ജാതിത്തേരിലിരുന്ന്‌-

ചെറിയ ജാതിയെ തൊഴിച്ചോൻ,

ദേഹം മറയ്‌ക്കാനല്പം-

വസ്‌ത്രമിരന്നപ്പോൾ,

ചാട്ടവാറെൻ നഗ്നതയിൽ-

പതിപ്പിച്ചോൻ

തല ചായ്‌ക്കാനിടമില്ലാതെ-

ഞാൻ തണുത്തു വിറച്ചപ്പോൾ,

മണിമാളികയിലൊന്നുമറിയാതെ-

പുതച്ചു മൂടിയുറങ്ങിയോൻ

ഇന്ന്‌,

നീയെന്നെ-അറിയുന്നു

നീയും, ഞാനും-

ഒന്നിച്ചുറങ്ങുന്നു.

അന്നത്തിനായ്‌,

ഒന്നിച്ചിരക്കുന്നു.

ഭൂചലനരേഖയിൽ-

നമ്മൾ

ഒരുമയോടെ നീങ്ങുന്നു.

Generated from archived content: nammal.html Author: ozhukuparasatyan

അഭിപ്രായങ്ങൾ

അഭിപ്രായങ്ങൾ