പ്രിയ സുഹൃത്തേ,
അവിടെ സുഖമന്ന്‌ വിചാരിക്കുന്നു. ഇവിടെ എല്ലാവർക്കും സുഖമാണ്‌. കത്തെഴുതാൻ വൈകിയതിൽ ക്ഷമചോദിക്കുന്നു. കത്ത്‌ വൈകിയതിന്റെ കാരണം പരിഷ്‌ക്കാര വിരുന്ന്‌ ഒരുക്കാനുള്ള വിഭവങ്ങളുടെ പരിമിതിയാണ്‌. ഈ പരിഷ്‌ക്കാരവിരുന്നിൽ നിങ്ങൾ ആവശ്യപ്പെട്ട വിഭവങ്ങൾ ഒരുക്കിയിട്ടുണ്ട്‌. വിഭവങ്ങൾക്കായുള്ള കാത്തിരിപ്പിലാണ്‌ ഈ നീണ്ട ഇടവേള. ഇപ്പോഴത്തെ സാഹചര്യം കണക്കിലെടുത്താൽ താങ്കൾക്ക്‌ അത്‌ മനസ്സിലാകും. പഴയകാലമല്ല ഇന്നത്തെ സ്‌ഥിതി മറിച്ചാണ്‌. ഈ സ്‌ഥിതി വിശേഷം ഒരുകണക്കിനു അനുകൂലമാണ്‌. യുഗങ്ങളായി കാത്തിരിക്കേണ്ടിവന്നു. പലപദ്ധതികളും ആസൂത്രണം ചെയ്‌തു. ഈ ആസൂത്രണത്തിന്റെ പാളിച്ചകാരണം വേണ്ട രീതിയിൽ ലക്ഷ്യം കണ്ടില്ല. ആധുനിക രീതിയിലുള്ള ആയുധങ്ങളുപയോഗിച്ചുള്ള യുദ്ധങ്ങളിലൂടെയുള്ള പദ്ധതിയാണ്‌ ആസൂത്രം ചെയ്‌തത്‌. അതിനുള്ള ഉദാഹരണം പറഞ്ഞാൽ താങ്കൾക്കതുമനസ്സിലാവും. ഈ കഴിഞ്ഞയുദ്ധത്തിൽ മിസൈലുപയോഗിച്ച്‌ വിഭവങ്ങൾക്കായി ശ്രമിച്ചിരുന്നു. കഷ്‌ടമെന്ന്‌പറയട്ടെ വെന്തുകരിഞ്ഞ്‌ കരിക്കട്ടപോലുള്ള മാംസങ്ങളാണ്‌ കിട്ടിയിത്‌. അതുപയോഗിക്കാൻ കൊള്ളില്ല. പിന്നീട്‌ പല തരത്തിലുള്ള ആസൂത്രണങ്ങൾ നടത്തി ഫലം നിരാശജനകമായിരുന്നു. ഈയിടയ്‌ക്ക്‌ എന്റെയൊരു സുഹൃത്ത്‌ ഭൂലോകം സന്ദർശിക്കുകയുണ്ടായി. അപ്പോഴാണ്‌ അറിയുന്നത്‌. തന്തൂരി മാംസം. ഈ ആശയം ഞാൻ മനസ്സിൽ വെച്ചു. ആസൂത്രണങ്ങൾ പലതും നടന്നു. അതിനൊടുവിൽ കൂടുതൽ മൂർച്ചയേറിയ ആയുധങ്ങളാണ്‌ അതിനുവേണ്ടതെന്ന്‌ കണ്ടെത്തി. പക്ഷെ പച്ചയായ മാംസങ്ങൾ ലഭിക്കുകയും വേണം. പറ്റിയ ആയുധമാണ്‌ മതവും ജാതിയും. വിഭവങ്ങൾ വേണ്ടത്ര രീതിയിൽ തന്നെ. ഈ ആയുധം മനുഷ്യർ കണ്ടെത്തിയിട്ടുള്ള മിസൈലുകളും യുദ്ധവിമാനങ്ങളും എന്തിനേറെ ആണവായുധത്തിനെക്കാളും മൂർച്ചയാണ്‌. ഈ പദ്ധതിയുടെ ഒരു ലഘു വിവരണം വേണമെങ്കിൽ ഞാൻ പറഞ്ഞുതരാം. പക്ഷെ ഒരു ഉറപ്പ്‌ എനിക്ക്‌ കിട്ടണം, പദ്ധതിയുടെ ആവിഷ്‌ക്കരണത്തെകുറിച്ച്‌ മറ്റുള്ളവരുമായി ചർച്ചചെയ്യരുത്‌. എനിക്ക്‌ ഉറപ്പുണ്ട്‌. താങ്കൾ എന്റെ ആത്‌മമിത്രമായതുകൊണ്ട്‌ ചർച്ച ചെയ്യില്ലെന്ന്‌. ഭൂമിയിൽ പലതരത്തിലുള്ള മതങ്ങളുണ്ടാക്കി; അവ ജാതിയായി വീണ്ടും ചെറിയ ചെറിയ വിഭാഗങ്ങളായി വിഭജിച്ചു. ഇതെല്ലാം നിർവ്വഹിച്ചതു മനുഷ്യരെകൊണ്ട്‌ തന്നെയാണ്‌. ഇക്കാര്യങ്ങളെല്ലാം നമ്മൾ രാക്ഷസൻമാർ അവതരിച്ച്‌ നടപ്പിലാക്കാൻ ഒരു കാരണവശാലും കഴിയുകയുമില്ലയെന്നതുകൂടി നിങ്ങൾ മനസ്സിലാക്കണം.
മതവും ജാതിയും മനുഷ്യർ പരസ്‌പരം പ്രയോഗിച്ചുതുടങ്ങി. വിഭവങ്ങൾ വേണ്ടത്ര കിട്ടി. കുശാലാണ്‌ ഞങ്ങൾക്ക്‌ നിങ്ങൾക്കായുള്ള വിരുന്നുസത്‌ക്കാരം പുറമേയുള്ളതിലും രൂചികരമായിരിക്കണമെന്ന്‌ നിർബന്ധമുണ്ടായിരുന്നു. അതിനായി എന്റെ സുഹൃത്തിനെ വിളിച്ചുവരുത്തി വിഭവങ്ങൾ തയ്യാറാക്കിയിട്ടുണ്ട്‌. തന്തൂരി പോലുള്ളവ വിഭവങ്ങൾ തന്നെയുണ്ട്‌. വളരെ രുചികരമായി മതവും, ജാതിയും ആയുധവുമായുള്ളപ്പോൾ നമ്മൾ എന്തിന്‌ പേടിക്കണം. വിരുന്നു സത്‌ക്കാരങ്ങൾ അടുത്തടുത്ത ദിവസങ്ങളിലും ഉണ്ടായിരിക്കുന്നതാണ്‌. ഇവിടെ വിഭവങ്ങൾ ആവശ്യത്തിലേറെയാണ്‌. ഞാൻ വിചാരിച്ചതിനെക്കാളും കാര്യങ്ങൾ കൈവിട്ടുപോയിരിക്കുന്നു. വിഭവങ്ങൾ ആവശ്യമുള്ളപ്പോൾ മാത്രം ആയുധം പ്രയോഗിച്ചാൽ മതിയായിരുന്നു. മനുഷ്യർ 24 മണിക്കുറും ആയുധം പ്രയോഗിച്ചുകൊണ്ടിരിക്കുന്നു. കുശാലാണ്‌ കാര്യങ്ങൾ എങ്കിലും വിഭവങ്ങൾ ഉപയോഗിക്കാൻ കഴിയാതെ പോകുമ്പോൾ കഷ്‌ടം തോന്നാറുണ്ട്‌. സമയം പോയതറിഞ്ഞില്ല. നിർത്തട്ടെ നിങ്ങൾക്കായുള്ള വാഹന സൗകര്യം ഒരുക്കിയിട്ടുണ്ട്‌. കത്തെഴുതാൻ താമസിച്ചതിൽ ഒരിക്കൽകൂടി ക്ഷമചോദിച്ചുകൊണ്ട്‌ നിർത്തുന്നു.
സ്‌നേഹപൂർവ്വം….
*********************
Generated from archived content: story1_feb6_10.html Author: manikandan_attapadi
