ഷെൽഫിലെപ്പുസ്‌തകമൊക്കെയുമിങ്ങനെ
പുത്തനായ്‌ത്തീരുവാനെന്തേ?
ഏറെനാളായിങ്ങണിനിരന്നീടുമെൻ
തോഴർക്കിതെന്തന്യഭാവം?
ഒട്ടും പരിചയം തോന്നാത്ത വാങ്ങ്‌മയം,
ചിത്രങ്ങളും-ഞ്ഞാൻ കുഴങ്ങി!
മൂടൽമഞ്ഞെന്നപോ,ലെന്തോ നിഗൂഢത-
യാകെപ്പടർന്നു നില്‌ക്കുന്നു.
അങ്ങിങ്ങു കാണാം കുറിപ്പുകൾ, മോശമ-
ല്ലൊന്നുമേ ആരുടേതാകാം?
പേജു മറിക്കെത്തിരിച്ചറിവിൻ സ്വർണ്ണ-
രേണു വിരൽത്തുമ്പിലെങ്ങാൻ
തെല്ലു പുരണ്ടാലും വിസ്‌മൃതിയോടി വ-
ന്നെല്ലാം തുടച്ചു മാറ്റുന്നു!
വിസ്‌മൃതിയെന്നാൽ മൃതിയെന്നുതാൻ-പക്ഷെ
മറ്റൊരു ചിന്തയേ പഥ്യം!
ഓർമ്മക്കറയാകെ മാഞ്ഞുപോയെൻ മനം
നിർമ്മലമാവുകയല്ലീ?
ഭൂതം മറയവെ ഭാവിയും മാഞ്ഞിടും
കാലമേ നിശ്ചലമാകും,
ഈ മാത്ര നിത്യതയായി മാറും, പിന്നെ-
ക്കൈവല്യമെന്താണു വേറെ?
Generated from archived content: poem1_sept20_06.html Author: madasseri_neelakandan
