കാലരഥ്യയിൽ പതിയും കവിതൻ കാല്പാടുകൾ
മായാത്തമുദ്രകൾ! ശോണലിഖിതങ്ങൾ!
സത്യകാമിയായ്‌, തൻസുഖത്യാഗിയായ്‌, അലയും-
ലോകഗതികൾ കാലേകാണും ക്രാന്തദർശിയാം കവി!
വഴികാണാതുഴയും പാന്ഥർതൻ കണ്ണിൽ വെളിച്ചമായ്‌,
ആത്മദർശനം നല്‌കും അക്ഷരസത്യമായ്‌, ചിറകറ്റ ജീവനിൽ-
ശക്തിയായ്‌, ഹൃത്തിൽ നിത്യമായ്‌ സ്പന്ദിപ്പൂ പരസുഖപ്രാർത്ഥന.
പുലരും നല്ല നാളെയിൽ പിറക്കും പുതുപൂക്കൾക്കെന്നും
കാണുവാൻ കഴിയട്ടെ ആ കവിജന്മസുകൃതത്തെ!
ഏറെ സാഹസം നടക്കാൻ ഈ ജീവിതപാതയിൽ-
എങ്കിലും പോയേതീരൂ! തിരിവെട്ടം കാക്കുവാൻ വഴികാട്ടുവാൻ മുന്നിൽ.
ശപ്തമാം പുറംപോക്കിൽ പൊട്ടിയ പാഴ്‌മുളയാണെങ്കിലും
തരുന്നൂ നിങ്ങൾക്കെന്റെ ജീവിതം സ്മേരപൂർവ്വം
ഉതകട്ടെ ഒരു നവലോകം തീർക്കാൻ!
Generated from archived content: poem1_july23.html Author: k_kanakaraj
Click this button or press Ctrl+G to toggle between Malayalam and English