നിലാവിന്റെ നേര്‍ത്ത സംഗീതത്തില്‍ നിഴലുകള്‍ കഥപറയുമ്പോള്‍ ഒരു നിശാശലഭമായി പറക്കുകയായിരുന്നു, അവള്‍ . യാത്രയുടെ ഏതോ മുഹൂര്‍ത്തത്തില്‍ ആലസ്യത്തോടെ കണ്ണുകള്‍ തുറക്കുമ്പോള്‍ കിടക്കയില്‍ തന്റെ ശരീരം കാണാതെ അവള്‍ പരിഭ്രമിച്ചു.
‘’ പേടിക്കേണ്ട നിന്റെ സുന്ദര ശരീരം ഈ സെല്‍ഫോണ്‍ മെമ്മറിയില്‍ ഭദ്രമായുണ്ട്’‘ കാമുകന്‍ അവളെ ചുംബിച്ചാശ്വസിപ്പിച്ചു.
സര്‍വതും മറന്ന് , കാമുകനോടൊപ്പം പ്രണയം പങ്കു വയ്ക്കുന്ന തന്റെ സുന്ദര നഗനശരീരം അവന്റെ സെല്‍ഫോണ്‍ സ്ക്രീനില്‍ കണ്ടപ്പോഴാണ് അവള്‍ക്കാശ്വാസമായത്.
പ്രണയതീക്ഷ്ണതയില്‍ രതിയുടെ ശല്‍ക്കങ്ങള്‍ പൊതിഞ്ഞ് സ്വന്തം ശരീരത്തില്‍ അഴകളവുകളില്‍ അവന്റെ സെല്‍ഫോണ്‍ സ്ക്രീനില്‍ അവള്‍ സ്വയം പ്രതിഷ്ഠിതയായി. ഒപ്പം , സ്നേഹത്തില്‍ ഊഷ്മാവില്‍ ഉരുകിയൊലിക്കുന്ന തങ്ങളുടെ സ്വകാര്യ നിമിഷങ്ങളുടെ ചലനചിത്രങ്ങളില്‍ കയ്യൊപ്പു ചാര്‍ത്തി ഒരു സമ്മാനവും.
മൊബൈല്‍ ടവറുകളില്‍ നിന്നും ചോര്‍ന്നൊലിക്കുന്ന നീല നിറമുള്ള പ്രണയഭോഗാസക്തികളിലൂടെ താനൊരു ‘ ഹോട്ട് പീസ്’ ആയി നഗരഗന്ധങ്ങളിലലിഞ്ഞുകൊണ്ടിരിക്കുകയാണെന്നറിയുമ്പോള്‍ ഹൃദയത്തിന്റെ അഗാധകളിലെവിടെയോ , കഴുത്തു ഞെരിക്കപ്പെട്ട പ്രണയത്തിന്റെ നിലവിളികളില്‍ അവള്‍ പ്രകമ്പനം കൊണ്ടു.
ആരുടേതെന്നറിയാത്ത മൊബൈല്‍ ഫോണ്‍ സ്ക്രീനുള്ളില്‍ നിന്നും സ്വന്തം ശരീരത്തെ അടര്‍ത്തിയെടുത്ത്, ഓടി രക്ഷപ്പെടാനാവാതെ കരഞ്ഞു തളര്‍ന്ന്…. പിന്നീട് ചിരിച്ചു മടുത്ത്… വെറും നീല നിറമുള്ള ശരീരമായി , നിലം പതിക്കുമ്പോള്‍ , ആരോ തിരിച്ചേല്‍പ്പിച്ച ചിതലരിച്ചു തുടങ്ങിയ ഹൃദയം അവളുടെ വിയര്‍പ്പില്‍ കുതിര്‍ന്ന കൈവെള്ളക്കുള്ളില്‍ അവസാനത്തെ സ്പന്ദനങ്ങളിലേക്കൂളിയിടുകയായിരുന്നു. മൗനം കിളിര്‍ത്ത് വാക്കുകളായ് മാറുമെന്നും ദൂരങ്ങള്‍ക്കുമേല്‍ ചിറകുകള്‍ മുളക്കുമെന്നുമുള്ള വെറുതെയോരോ വിശ്വാസങ്ങളുമായി.
Generated from archived content: story1_july12_12.html Author: dipusasi_thathappilly
Click this button or press Ctrl+G to toggle between Malayalam and English