യുവനിരയിലെ താരങ്ങൾ കൂട്ടത്തോടെ അണിനിരക്കുന്ന ചിത്രവുമായി വിനയനെത്തുന്നു. കുഞ്ചാക്കോ ബോബൻ, ജയസൂര്യ, ഇന്ദ്രജിത്ത്‌, മണിക്കുട്ടൻ എന്നീ യുവനായകർക്ക്‌ തുല്യ പ്രാധാന്യമുള്ള കഥാപാത്രങ്ങളെയാണ്‌ വിനയൻ മാറ്റിവെച്ചിരിക്കുന്നത്‌. വിമലാരാമനും നവ്യാ നായരുമാണ്‌ നായികമാർ.
അഭിലാഷ്‌ ഫിലിംസിന്റെ ബാനറിൽ അനിൽ ശർമ്മ നിർമിക്കുന്ന സിനിമയിൽ സായ്‌കുമാർ, ജഗതി ശ്രീകുമാർ, ഇന്ദ്രൻസ്‌ എന്നിവരും മുഖ്യവേഷത്തിലുണ്ട്‌. പുതുതലമുറയുടെ പ്രശ്നങ്ങൾ വിഷയമാക്കി ഒരുക്കുന്ന സിനിമയുടെ തിരക്കഥ പതിവുപോലെ വിനയൻ എഴുതുന്നു.
കുഞ്ചാക്കോ ബോബൻ, നവ്യാ നായർ, വിമലാ രാമൻ എന്നിവർ ആദ്യമായാണ്‌ വിനയനൊപ്പം അണിചേരുന്നത്‌. കുഞ്ചാക്കോയും നവ്യയും ഇതിനുമുമ്പ്‌ വിനയന്റെ ക്ഷണം നിരാകരിച്ചവരാണെന്ന പ്രത്യേകതയുമുണ്ട്‌. ‘ആകാശഗംഗ’യിലെ നായകനാകാൻ കുഞ്ചാക്കോയും, ‘മീരയുടെ ദുഃഖവും മുത്തുവിന്റെ സ്വപ്നവും’ എന്ന ചിത്രത്തിൽ നായികയാകാൻ നവ്യയും മടിച്ചത്‌ ചലച്ചിത്രവൃത്തങ്ങളിൽ വാർത്തയായിരുന്നു. നീണ്ട ഇടവേളക്കുശേഷം കുഞ്ചാക്കോയും നവ്യയും വിനയൻ ചിത്രത്തിലൂടെ തന്നെ തിരിച്ചെത്തുന്നതും വാർത്തയാകുകയാണ്‌.
ജയസൂര്യ, ഇന്ദ്രജിത്ത്‌, മണിക്കുട്ടൻ എന്നിങ്ങനെ വിനയൻ ചിത്രങ്ങളിലൂടെ സിനിമയിൽ മേൽവിലാസമുണ്ടാക്കിയെടുത്ത യുവനായകർ കൂടി കുഞ്ചാക്കോക്കൊപ്പം പ്രത്യക്ഷപ്പെടുന്നത്‌ പ്രേക്ഷകർക്ക്‌ നവ്യാനുഭവമാകും. മലയാളത്തിൽ ഒന്നാം നിരയിലേക്ക്‌ കുതിക്കുന്ന അന്യഭാഷാസുന്ദരി വിമല രാമന്റെ സാന്നിധ്യവും ഗുണംചെയ്യും.
Generated from archived content: cinema4_june19_07.html Author: cini_vision
