ലാൽ ക്രിയേഷൻസിന്റെ ബാനറിൽ ഒരുങ്ങുന്ന പുതിയ ചിത്രമായ ‘പന്തയക്കോഴി’യിൽ തമിഴ്‌ സുന്ദരി പൂജ ‘ചെമ്പക’മാകുന്നു. നരേന്റെ ജോഡിയായാണ്‌ പൂജ മലയാളത്തിലെത്തുന്നത്‌. ഈ കഥാപാത്രം തന്നെ മലയാളത്തിൽ മുൻനിരക്കാരിയാക്കുമെന്ന പ്രതീക്ഷയിലാണ്‌ പൂജ. സംവിധായകൻ എം.എ. വേണു ഈ ചിത്രത്തിലും സ്‌ത്രീകഥാപാത്രങ്ങൾക്ക്‌ ഏറെ പ്രാധാന്യം നൽകുന്നുണ്ട്‌.
ജെ.ജെ. എന്ന സിനിമയിൽ മാധവന്റെ ജോഡിയായി പ്രത്യക്ഷപ്പെട്ടതോടെയാണ്‌ പൂജ തമിഴകത്ത്‌ ശ്രദ്ധേയയായത്‌. തുടർന്ന്‌ തമ്പി, പട്ടിയൽ, ആട്ടോ, തങ്കപ്പൻ സ്വാമി, പൊരി എന്നീ ചിത്രങ്ങളിലും നായികയായി. സംവിധായക ദമ്പതികൾ ഒരുക്കിയ ‘ഓരംപോ’യിൽ ആര്യയുടെ നായികയായാണ്‌ തമിഴിൽ ഒടുവിലെത്തിയത്‌. ബിരിയാണി വിൽപനശാലയിലെ ജീവനക്കാരിയായി, ഗ്ലാമറിന്റെ പരിവേഷമില്ലാതെയാണ്‌ പൂജ പ്രേക്ഷകർക്ക്‌ മുന്നിലെത്തിയത്‌. ഈ ചിത്രത്തിലെ പ്രകടനം അഭിനേത്രീ എന്ന നിലയിൽ താരത്തിന്‌ നേട്ടമാകും. ‘ഉള്ളം കേക്കുമേ’ എന്ന ചിത്രത്തിലൂടെയാണ്‌ എം.ബി.എ. ബിരുദധാരിയായ പൂജ തമിഴകത്ത്‌ അരങ്ങേറ്റം നടത്തിയത്‌.
തമിഴിനു പുറമെ സിംഹളത്തിലും അറിയപ്പെടുന്ന താരമാണ്‌ പൂജ. ശ്രീലങ്കക്കാരിയാണ്‌ പൂജയുടെ അമ്മ സന്ധ്യ. ‘അഞ്ജലിക’ എന്ന ചിത്രത്തിലൂടെയാണ്‌ ലങ്കൻ ജനതയുടെ മനം കവർന്നത്‌. മലയാള ചിത്രങ്ങൾ വളരെ കുറച്ചുമാത്രമേ പൂജ കണ്ടിട്ടുള്ളൂ. ഭാഷ ഹൃദിസ്ഥമാക്കാനുള്ള കഠിനപ്രയത്നത്തിലാണിപ്പോൾ. പച്ചക്കുതിര, ദി ഡോൺ എന്നീ ചിത്രങ്ങളിൽ ദിലീപിന്റെ നായികയാകാൻ ക്ഷണം ലഭിച്ചുവെങ്കിലും ഡേറ്റ്‌ക്ലാഷ്‌മൂലം അവയെല്ലാം ഒഴിവാക്കേണ്ടിവന്നു.
Generated from archived content: cinema3_mar17_07.html Author: cini_vision
Click this button or press Ctrl+G to toggle between Malayalam and English