സുരേഷ്‌ഗോപിയുടെ ‘ദി ടൈഗറി’ൽ ജേർണലിസ്‌റ്റായി തിളങ്ങിയ ഗോപിക ആദ്യമായി മമ്മൂട്ടിയുടെ നായികാവേഷം കെട്ടുന്ന ‘പോത്തൻവാവ’യിൽ അഡ്വക്കേറ്റാകുന്നു. ജോഷി സംവിധാനം ചെയ്യുന്ന സിനിമയിലെ അഡ്വ.രാധിക ഈ നായികയുടെ കരിയറിൽ നിർണായകമാകുമെന്നാണ്‌ പൊതുവെ വിലയിരുത്തപ്പെടുന്നത്‌. പോപ്പ്‌ ഗായിക ഉഷാ ഉതുപ്പ്‌ മമ്മൂട്ടിയുടെ അമ്മയായി പ്രത്യക്ഷപ്പെടുന്നു എന്നതാണ്‌ ‘പോത്തൻവാവ’യുടെ പ്രത്യേകതകളിലൊന്ന്‌. ബെന്നി പി.നായരമ്പലമാണ്‌ തിരക്കഥാകൃത്ത്‌.
സൂപ്പർതാര ചിത്രങ്ങളിലെല്ലാം നായികയായി ഇടംപിടിച്ചത്‌ മലയാളത്തിൽ ഗോപികക്ക്‌ തുണയാകുകയാണ്‌. ദിലീപിന്റെ ‘ദി ഡോൺ’ പൂർത്തിയാക്കിയ ശേഷമാണ്‌ ഗോപിക മമ്മൂട്ടിയുടെ ‘പോത്തൻവാവ’യിൽ ജോയിൻ ചെയ്‌തത്‌. ഡോണിൽ ഷാഹിദ എന്ന മുസ്ലീം പെൺകുട്ടിയുടെ വേഷമാണ്‌. സുരേഷ്‌ഗോപിയുടെ ‘ജന്മ’ത്തിലെ പ്രധാന വേഷക്കാരിയും ഈ തൃശൂർക്കാരിയാണ്‌. മോഹൻലാലിന്റെ പുതിയ റിലീസ്‌ ‘കീർത്തിചക്ര’യിലെ നായികയും ഗോപിക തന്നെ.
Generated from archived content: cinema3_aug16_06.html Author: cini_vision
