‘കീർത്തിചക്ര’യിൽ മോഹൻലാലിന്റെ ഭാര്യയായി മലയാളത്തിൽ ശക്തമായ തിരിച്ചുവരവ്‌ നടത്തിയ ലക്ഷ്‌മി ഗോപാലസ്വാമിക്ക്‌ അവസരങ്ങളേറുന്നു. സുരേഷ്‌ഗോപിയെ നായകനാക്കി ബി. ഉണ്ണികൃഷ്‌ണൻ സംവിധാനം ചെയ്യുന്ന ‘സ്‌മാർട്ട്‌ സിറ്റി’യിൽ നായികമാരിൽ ഒരാൾ ലക്ഷ്‌മിയാണ്‌. ഗോപികയാണ്‌ പ്രധാന നായിക. ഈ മാസം 25-ന്‌ കൊച്ചിയിൽ ചിത്രീകരണം ആരംഭിക്കുന്ന ‘സ്‌മാർട്ട്‌ സിറ്റി’യിൽ സുരേഷിന്റെ ജോഡിയാണ്‌ ലക്ഷ്‌മി. ‘പറഞ്ഞു തീരാത്ത വിശേഷങ്ങൾ’ എന്ന ചിത്രത്തിനുശേഷം ലക്ഷ്‌മി സുരേഷിന്റെ നായികയാകുന്ന ചിത്രം എന്ന പ്രത്യേകതയും ഈ സിനിമക്കുണ്ട്‌. മോഹൻലാലിനെ നായകനാക്കി പി.ടി.കുഞ്ഞുമുഹമ്മദ്‌ ഒരുക്കുന്ന ‘പരദേശി’യിൽ ശക്തമായ കഥാപാത്രമാണ്‌ ഈ മറുനാടൻ നായികക്ക്‌. സൂപ്പർതാരം അവതരിപ്പിക്കുന്ന നാലകത്ത്‌ മൂസയുടെ പ്രണയിനിയായെത്തുന്ന ലക്ഷ്‌മിക്ക്‌ ഈ ചിത്രം നേട്ടമാകും.
വിനയന്റെ ‘ബോയ്‌ഫ്രണ്ടി’ൽ നായകന്റെ അമ്മയായി പ്രത്യക്ഷപ്പെട്ട ലക്ഷ്‌മിയെ തേടി അത്തരം റോളുകളാണ്‌ പിന്നീട്‌ മലയാളത്തിൽ നിന്നുമെത്തിയത്‌. അവയെല്ലാം വേണ്ടെന്നു വച്ച്‌ മികച്ച അവസരത്തിനായി കാത്തിരിക്കുമ്പോഴാണ്‌ ‘കീർത്തിചക്ര’യിലേക്ക്‌ ക്ഷണിക്കപ്പെട്ടത്‌. യുവനായിക മംമ്‌ത മോഹൻദാസിനു നീക്കിവെച്ച വേഷമായിരുന്നു.
Generated from archived content: cinema2_sept28_06.html Author: chithra_lekha
