ശ്യാമപ്രസാദിന്റെ ‘ഒരേ കടൽ’ എന്ന വ്യത്യസ്ത ചലച്ചിത്രാനുഭവം പ്രേക്ഷകർക്കു സമ്മാനിച്ച താരജോഡി വീണ്ടും പ്രേക്ഷകർക്കു മുന്നിലെത്തുന്നു. സംവിധായകൻ ഷാജി എൻ. കരുൺ നീണ്ട ഇടവേളയ്‌ക്കു ശേഷം സംവിധാനം ചെയ്യുന്നു ‘കുട്ടിസ്രാങ്കി’ലാണ്‌ മീരാജാസ്മിൻ മമ്മൂട്ടിയുടെ നായികയാവുന്നത്‌. സൂപ്പർതാരം ടൈറ്റിൽ റോളിലെത്തുന്ന സിനിമയിൽ മൂന്നു നായികമാരുണ്ടെങ്കിലും മീരക്ക്‌ തന്നെയാണ്‌ മുൻതൂക്കം. അംഗീകാരങ്ങൾ വാരിക്കൂട്ടിയ ‘ഒരേ കടൽ’ മീരാ ജാസ്മിൻ എന്ന അഭിനേത്രിയുടെ വ്യത്യസ്തമുഖമാണ്‌ കാട്ടിത്തന്നത്‌. സങ്കീർണ്ണമായ സ്ര്തീമനസ്സിനെ പ്രതിനിധാനം ചെയ്ത ദീപ്തി എന്ന വീട്ടമ്മയെ തനതുശൈലിയിൽ മീരാജാസ്മിൻ മനോഹരമാക്കി. മുഖ്യധാരാ സംവിധായകരല്ല മമ്മൂട്ടി-മീരാ ടീമിനെ അണിനിരത്തുന്നതെന്നതും പ്രത്യേകം ശ്രദ്ധയർഹിക്കുന്നു.
Generated from archived content: cinema1_march10_08.html Author: chithra_lekha
