തമിഴിൽ പ്രതിനായകവേഷം കെട്ടിയ ബിജുമേനോൻ പ്രധാന വില്ലനായി തെലുങ്കാന കീഴടക്കാനൊരുങ്ങുന്നു. രാജശേഖർ സംവിധാനം ചെയ്യുന്ന ‘രണ’യാണ്‌ ബിജുവിന്റെ പ്രഥമ തെലുങ്ക്‌ ചിത്രം. തമിഴിൽ ഇതിനകം രണ്ടു ചിത്രങ്ങൾ പൂർത്തികരിച്ചു കഴിഞ്ഞു ഈ തൃശൂർക്കാരൻ.
ചെറിയൊരു ഇടവേളയ്‌ക്കുശേഷം ബിജുമേനോൻ മലയാളത്തിൽ സജീവമാകുകയാണ്‌. ലാൽ ജോസിന്റെ ‘ചാന്തുപൊട്ടി’ലും സന്തോഷ്‌ ശിവന്റെ ‘അനന്തഭദ്ര’ത്തിലും മികച്ച വേഷമാണ്‌ ബിജുവിന്‌. അനന്തഭദ്രത്തിലെ വ്യത്യസ്‌ത റോൾ ബിജുവിനെ വീണ്ടും തിരക്കുളള താരമാക്കിയേക്കും.
‘മിഖായേലിന്റെ സന്തതികൾ’ എന്ന പരമ്പരയിലൂടെ ജൂഡ്‌ അട്ടിപ്പേറ്റിയാണ്‌ ബിജുമേനോൻ എന്ന അഭിനേതാവിനെ കണ്ടെത്തിയത്‌. ഹിറ്റ്‌ പരമ്പരയുടെ രണ്ടാംഭാഗം ‘പുത്രൻ’ എന്ന പേരിൽ ജൂഡ്‌ തന്നെ സിനിമയാക്കിയതോടെ ചലച്ചിത്ര രംഗത്തും ബിജു പ്രവേശിച്ചു. നായകനായിട്ടായിരുന്നു രംഗപ്രവേശമെങ്കിലും ‘മാന്നാർ മത്തായി സ്‌പീക്കിംഗി’ലെ വില്ലൻ വേഷമാണ്‌ ബിജുവിനെ ശ്രദ്ധേയനാക്കിയത്‌. തുടർന്ന്‌ നായകനായും ഉപനായകനായും നിരവധി ചിത്രങ്ങളിൽ അഭിനയിച്ചു. പോലീസ്‌ വേഷങ്ങളിലാണ്‌ ബിജു ഏറെ തിളങ്ങിയത്‌.
Generated from archived content: cinema1_june23_05.html Author: chithra_lekha
