എവിടെ

എവിടെയാ സ്വപ്നഭൂമിക-

എവിടെയാ ചിങ്ങനിലാവും, വെയിലും

എവിടെയാ വർണ്ണത്തുമ്പികൾ…തുമ്പക്കുടങ്ങൾ…

പൂവട്ടികൾ, പൂവിളികൾ, പാൽപുഞ്ചിരികൾ

കൈതകൾ അതിരിടും, വേലിയോരങ്ങളിൽ-

വയലറ്റുചിരി പടർത്തും..കാക്കപൂവുകൾ…കുന്നിമണികൾ…

കോരന്റെ മുറ്റത്തും, കൊട്ടാരമുറ്റത്തും,

കുന്നോളം പൂകൊണ്ട്‌ കെട്ടുമൊരു പൂത്തറ…

എവിടെയാ നാരായണക്കിളികൾ… പറമ്പിലെമ്പാടും-

ചിലച്ചു നടക്കും, മൈനകൾ, പൂത്താങ്കീരികൾ?

എവിടെയാ വേനലിറങ്ങും.. വിളവെടുപ്പു-

കഴിഞ്ഞൊരാപ്പാടങ്ങൾ..?

കറ്റകൾ കൊയ്‌തു മെതിച്ചുണക്കും-

ചാണകം മെഴുകിയ മുറ്റങ്ങൾ..

പൊന്നാര്യൻ നെല്ലിന്റെ സമൃദ്ധിയിൽ-

തുടിക്കും, അറകൾ…

എവിടെയാ ബന്ധങ്ങൾ-തറവാട്ടു കാരണവർ,

മൂന്നാലു തലമുറ ഒത്തുകൂടുമ്പോഴുളള,

ചിരിക്കലും, ചിണുങ്ങലും, ഹർഷാരവങ്ങളും…

എവിടെ തറവാടിന്റെ ചുമരിൻ നിശ്വാസങ്ങളും.

എവിടെയാ-സദ്യവട്ടങ്ങൾ… ഉപ്പേരിവറുക്കലുകൾ, ബഹളങ്ങൾ…

എവിടെയാ-കുത്തരിച്ചോറിന്റെ നിറവുകൾ…

വട്ടംകൂടിയിരുന്നോരൂണിന്റെ സ്വാദുകൾ…?

എവിടെയാ-കസവിന്റെ മുണ്ടുകൾ, മണങ്ങൾ…പട്ടുപാവാടകൾ..?

തുമ്പിതുളളാട്ടങ്ങൾ, കുമ്മിയടികൾ, കുമ്മാട്ടിക്കളികൾ

എവിടെ മലയാളത്തിന്റെ മനയ്‌ക്കലെ മുറ്റത്തെ-

മങ്കമാരുടെ കൈകൊട്ടിക്കളികൾ, മുഴക്കങ്ങൾ…

നാലുംകൂട്ടി മുറുക്കിത്തുപ്പി വൃത്തികേടാക്കുന്ന-

പിന്നാമ്പുറ മുറ്റങ്ങൾ..?

എവിടെയാണ്‌ പ്രഭോ-അങ്ങും…

ഇന്നാട്ടിലെക്കില്ലിനി എന്നോതി-

എവിടെയോ പോയി മറഞ്ഞെന്നോ-

എവിടെയാണ്‌… എവിടെയാണ്‌…?

Generated from archived content: poem1_oct19_05.html Author: ashokan_anchath

അഭിപ്രായങ്ങൾ

അഭിപ്രായങ്ങൾ