1
ശ്വാനപ്രദർശനം
ഒളിഞ്ഞു കണ്ടു
ചില ചാവാലിപ്പട്ടികൾ
വിശപ്പിന്റെ
ഭൂമിശാസ്ത്രം തിരഞ്ഞ്
അവ
എച്ചിലിലകളിൽ
തിമിരബാധിതരായി
2
ഉയരക്കാരൻ
ഗ്രെയ്റ്റ് ഡെയിന്റെ
തീറ്റയുടെ ജാതകം വായിച്ച
തെണ്ടിപ്പട്ടി
നോവിളകി
കുപ്പച്ചോറ് കക്കി
3
കുഞ്ഞൻ നായ
ഷിവാവക്കു രാരീരം കെട്ടിയ
വീടിന്റെ
മതിൽക്കെട്ടിനു പുറത്ത്
തീട്ടം നാറുന്ന ഓടയിൽ
ഒരു ചൊക്ക്ളിപ്പട്ടി
ഒമ്പതുകുഞ്ഞുങ്ങളെ
നൊന്തുപെറ്റു
4
ബ്രസീലുകാരൻ
ജൈന്റ് സ്നോസിന്റെ
ആമാശയത്തിൽ
ഒരു കഴുകന്റെ
അജീർണ്ണമുണ്ടെന്നറിഞ്ഞ്
ഉച്ചിഷ്ടം കാത്ത പട്ടിക്ക്
ഓക്കാനം വന്നു
5
ലോകചാമ്പ്യൻ
അഫ്ഗാൻ ഹോണ്ടിന്റെ
ചെങ്കോലും കിരീടവും
അരവയറിന്റെ
ബലികുടീരങ്ങൾക്കു മുകളിലെ
അധികാരമാണെന്ന്
വേറൊരു പട്ടി വാദിച്ചു
6
ശൈത്യവാസക്കാരൻ
സൈബീരിയൻ അസ്കറിന്റെ
സാരോപദേശ കഥയിൽ
മൂന്നാം ലോകത്തിന്റെ
ചോരയുണ്ടെന്നും കുരച്ച
പുഴുത്ത പട്ടി
പേപ്പട്ടിയായി
7
ശ്വാനപ്രദർശനം
അലങ്കോലപ്പെടുത്താനെത്തിയ
ചാവാലിപ്പട്ടികൾ
വെറും പട്ടികളല്ലെന്നും
അവ
തീവ്രവാദികളാണെന്നിഢം
ചരിത്രം
തീർപ്പുകൽപ്പിച്ചു.
Generated from archived content: poem3_june14_07.html Author: ajithan_chittattukara
Click this button or press Ctrl+G to toggle between Malayalam and English