ഏതു കാഴ്‌ചബംഗ്ലാവിലാണ്‌
ക്രിസ്‌തുവിനെത്തറച്ച കുരിശ്‌
രക്തം ഘനീഭവിച്ച
തുരുമ്പിച്ച ആണികൾ
ആദരവോടെ ആരവത്താൽ
ശിരസ്സിലാഴ്‌ത്തിയ മുൾക്കിരീടം
മുറിവുകൾ വീഴ്‌ത്തിയ
സഹനത്തിന്റെ ശോണധാതുക്കൾ?
നാഥൂറാം ഗോഡ്‌സെയുടെ
കൂപ്പുകൈയിലെ തോക്ക്‌
ഹരേറാം മന്ത്രിക്കുന്ന
ശംഖായി മാറിയോ?
മഹായുദ്ധത്തിന്റെ രക്തസമുദ്രത്തിൽ വാറ്റിയെടുത്ത
ഐൻസ്‌റ്റീൻ കണ്ണീരിന്റെ ഉപ്പെവിടെ?
കാരുണ്യ ധാമൻ
ബുദ്ധൻ തോളിലേറ്റിയ
മുടന്തനാടിന്റെ
അസ്ഥിയെവിടെ?
എരിഞ്ഞുകൊണ്ടിരിക്കുന്ന
ഒരാൽബത്തിൽ
സൂക്ഷിക്കേണ്ട ചരിത്രസ്‌മൃതികളെ കടലെടുക്കുന്നു
പക്ഷേ
എനിക്കായൊരു
ആമ്പൽപ്പൂവിനേകുവാൻ
അമ്പിളിമോളാണ്ടുപോയ
തടാകത്തിന്റെ ഗർത്തം
എന്റെ കണ്ണിന്റെ കാഴ്‌ചബംഗ്ലാവിലുണ്ട്‌.
Generated from archived content: poem1_aug31_06.html Author: a_ayyappan
