അവളോടുളള പ്രണയം പറയുവാൻ
പ്രണയദിനത്തിൽ അവനവൾക്കു കൊടുത്തിട്ടുണ്ടാകണം
ഒരു ചുവന്ന റോസാപുഷ്പം
ആ റോസാപുഷ്പത്തിന്റെ ചുവപ്പ്
അവന്റെ ചോരയുടേതാകുമെന്ന്
പാവമവളന്നറിഞ്ഞീല്ല
പ്രേമത്തിനു കണ്ണില്ലെന്നതു പഴമൊഴി
ഇന്നു നേരാംവണ്ണം നോക്കീം കണ്ടും
പ്രേമിച്ചില്ലേൽ തലവരയോ
അകാലത്തിൽ വൈധവ്യം
കമിതാക്കളുടെ ശ്രദ്ധയ്ക്ക് , പ്രേമിക്കുമ്പോൾ
മനസ്സ് മനസ്സോടൊത്താൽ പോര
ജാതിക്കു ജാതി ചേരണം
സ്റ്റാറ്റസിൻ ത്രാസിലിട്ടു തൂക്കുമ്പോൾ
തുല്യ തൂക്കത്തിലാകണം
കീഴാളനോടെങ്ങാനം പ്രണയം തോന്നിപ്പോയാൽ
അരുതെന്നോതി മനസ്സിനെ വിലക്കണം
ഇല്ലെങ്കിൽ തലവര മാറ്റിവരയ്ക്കുമവർ
നൂറ്റാണ്ടുകൾ നീങ്ങിയതറിയാത്തവരപരിഷ്കൃതർ
മനസ്സുകൊണ്ടല്ല , ബുദ്ധി കൊണ്ടു –
വേണമിന്നു പ്രണയിക്കുവാൻ
പ്രണയിച്ചാലൊന്നിച്ചു ജീവിക്കണമെങ്കിൽ
പ്രണയവും പ്രായോഗികമാക്കുക
