കോത്താഴത്ത് ഒരു കൊതിയൻ കോന്തുണ്ണിയും കൊതിച്ചിക്കോതയും ഉണ്ടായിരുന്നു.
ഒരിക്കൽ കൊതിച്ചിക്കോതക്കു കോവിലകത്ത് നിന്ന് കുറച്ച് നെല്ല് കിട്ടി . നെല്ല് കുത്തിയെടുത്ത് പായസം ഉണ്ടാക്കണമെന്ന് കൊതിച്ചികോത ആശിച്ചു . പായസത്തിനുള്ള പച്ചരിയും ശർക്കരയുമെല്ലാം കിട്ടിയപ്പോൾ കൊതിച്ചികോത കോന്തുണ്ണിയോട് പറഞ്ഞു .
” കൊതിയച്ചാരെ , കോന്തുണ്ണി
പായസമൊരു കാലമുണ്ടാക്കാം
വേഗം നിങ്ങൾ കാട്ടിൽ പോയി
വിറകും വെട്ടിയണഞ്ഞാട്ടെ ”
ഇതുകേട്ട കോന്തുണ്ണിക്കു ദേഷ്യമാണ് വന്നത് . അവൻ പറഞ്ഞു.
” ഇല്ലില്ല ഞാൻ പോയാൽ മുറ്റത്ത് നിൽക്കുന്ന മൂവാണ്ടൻ മാവിലെ മാങ്ങയെല്ലാം അണ്ണാനോ കാക്കയോ തിന്നു മുടിക്കും . നീ തന്നെ വിറകിനു പോ”
ഇത് കേട്ട് കൊതിച്ചികോത വേഗം പോയി വിറകു കൊണ്ട് വന്നു . ഉച്ചക്ക് മുമ്പായി അവൾ ഒരു കലം നിറയെ പായസമുണ്ടാക്കി . പായസത്തിന്റെ മണം കേട്ട് കൊതിയൻ കോന്തുണ്ണി പതുങ്ങി പതുങ്ങി അടുക്കളയിലെത്തി.
എന്നിട്ട് കുറച്ച് പാൽപ്പായസം കോരിക്കുടിക്കുവാൻ ശ്രമിച്ചു . അപ്പോൾ കൊതിച്ചികോത ഓടി വന്ന് കോന്തുണ്ണിയോട് പറഞ്ഞു.
” കൊതിയച്ചാരെ , പെരുവയറാ
പായസമൊട്ടും തരില്ല
വിറകുമുറിക്കാൻ പോയ് വന്നാൽ
നൽകാം പായസമൊരു കിണ്ണം ”
ഇത് കേട്ട് മനസില്ലാമനസോടെ ഒരു കോടാലിയുമെടുത്ത് കാട്ടിലേക്ക് യാത്രയായി .
കുറച്ച് ദൂരം ചെന്നപ്പോൾ കുറുങ്കാലൻ കുട്ടൻ കരടി കോന്തുണ്ണിയോട് ചോദിച്ചു .
” കോന്തുണ്ണി ചേട്ടാ , പതിവില്ലാതെ കോടാലിയുമായി എങ്ങോട്ടാ ?”
കൊതിയൻ കോന്തുണ്ണി ചിരിച്ചുകൊണ്ടു പറഞ്ഞു.
കരടിക്കുട്ടാ ഞാനല്പം
വിറകുമുറിക്കാൻ പോകുന്നു
വിറകും കൊണ്ടങ്ങേത്തുമ്പോൾ
കിട്ടും പായസമൊരു കിണ്ണം ”
ഇത് കേട്ട് കരടിയുടെ വായിൽ വെള്ളം നിറഞ്ഞു. കുട്ടൻ കരടി കോന്തുണ്ണിയോട് ചോദിച്ചു..
” ചേട്ടന് പകരം കാട്ടിൽ പ്പോയ്
വിറകും വെട്ടി വരട്ടെ ഞാൻ
വിറകും കൊണ്ടുവരും നേരം
പായസമിത്തിരി നൽകാമോ?”
ഇത് കേട്ട് കുഴിമടിയനായ കൊതിയൻ കോന്തുണ്ണിക്ക് സന്തോഷമായി . കോടാലി കുട്ടൻ കരടിയെ ഏല്പിച്ചിട്ട് കോന്തുണ്ണി പറഞ്ഞു .
” എങ്കിൽ വേഗം പൊയ്ക്കോളൂ
വിറകും വെട്ടിയണഞ്ഞോളു
വിറകും കൊണ്ടുവരുന്നേരം
നൽകാം പായസമൊരു കിണ്ണം”
കൊതിയണ് കോന്തുണ്ണിയുടെ വാക്കു കേട്ട് കുട്ടൻ കരടി കോടാലിയുമായി കാട്ടിലേക്ക് നടന്നു.
കോന്തുണ്ണി വേഗം വീട്ടിലെത്തി . അപ്പോൾ കൊതിച്ചികോത പായസം വിളമ്പിക്കൊണ്ടിരിക്കുകയായിരുന്നു . വിറകില്ലാതെ വരുന്ന കൊതിയൻ കോന്തുണ്ണിയെ കണ്ട് കൊതിച്ചികോത ദേഷ്യപ്പെട്ടു . അപ്പോൾ കോന്തുണ്ണി പറഞ്ഞു
” എനിക്ക് പകരം വിറകിന്നായി
കരടിക്കുട്ടനെ വിട്ടു ഞാൻ
വിറകും കൊണ്ട് വരും നേരം
പായസമനും നൽകേണം ”
ഇത് കേട്ട് കൊതിച്ചിക്കോതക്കു പേടിയായി അവൾ പറഞ്ഞു .
” അയ്യോ പൊന്നെ ചങ്ങാതി
വെക്കം വെക്കം തിന്നോളൂ
]കരടിക്കുട്ടൻ വന്നെന്നാൽ
പായസമൊക്കെ അകത്താക്കും ”
ഇത് കേൾക്കേണ്ട താമസം കോന്തുണ്ണി പായസം വേഗം വിഴുങ്ങാൻ തുടങ്ങി . കൊതിച്ചിക്കോതയും തനിക്കാവും വിധം തട്ടി വിട്ടു . പായസം തീരാറായപ്പോൾ ഒരു പാത്രത്തിൽ കുറച്ചെടുത്ത് കുട്ടൻ കകരടിക്കായി മാറ്റി വച്ചു . എങ്കിലും കൊതി മൂത്തപ്പോൾ കൊതിച്ചികോത അതിൽ നിന്ന് കുറച്ചെടുത്ത് കുടിച്ചു . കൊതിച്ചികോത കാണാതെ കൊതിയൻ കോന്തുണ്ണിയും കുറച്ചെടുത്ത് സാപ്പിട്ടു . അങ്ങനെ പാത്രം കാലിയായി.
പാത്രം കാലിയായപ്പോൾ രണ്ട് പേർക്കും പേടിയായി. കുട്ടൻ കരടി വരുമ്പോൾ പായസം കൊടുത്തില്ലെങ്കിൽ രണ്ട് പേരെയും കൊല്ലുമെന്ന് അവർക്ക് അറിയാമായിരുന്നു . കുട്ടൻ കരടിയുടെ കയ്യിൽ നിന്ന് രക്ഷപ്പെടാൻ അവരൊരു വഴി ആലോചിച്ചു .
]പെട്ടന്ന് വാതിൽക്കൽ കുട്ടൻ കരടിയുടെ വിളി കേട്ടു . നോക്കിയപ്പോൾ ഒരു വലിയ വിറകുകെട്ടും ചുമന്ന് കുട്ടൻ കരടി നിൽക്കുന്നു കൊതിയൻ കോന്തുണ്ണി കൊതിച്ചിക്കോതയോട് പറഞ്ഞു .
” ഓടിക്കോളൂ കൊതെ നീ
കരടിക്കുട്ടൻ വരണുണ്ടേ
കരടിക്കുട്ടൻ കണ്ടെന്നാൽ
കഷ്ട്ടം നമ്മുടെ കഥ കഴിയും ”
ഇത് കേട്ട് കൊതിച്ചികോത വേഗം തട്ടിൻ പുറത്ത് കയറി ഒളിച്ചു . അതുകണ്ട് കൊതിയൻ കോന്തുണ്ണിയും തട്ടിൻ പുറത്ത് കയറി.
കുട്ടൻ കരടി വിറകുകെട്ട് മുറ്റത്തിറക്കി വച്ചിട്ട് അടുക്കളയിലേക്കു ചെന്നു . പക്ഷെ പായസക്കലം നക്കി തുടച്ചു വച്ചിരിക്കുന്നതാണ് കണ്ടത്. കോന്തുണ്ണി തന്നെ പറ്റിച്ചുവെന്ന് കുട്ടൻ കരടിക്കു ബോധ്യമായി . അവൻ ദേഷ്യപ്പെട്ട് നാലുപാടും അലറിപ്പാഞ്ഞു നടന്നു . അപ്പോഴാണ് കോന്തുണ്ണിയും കൊതിച്ചിക്കോതയും തട്ടിൻ പുറത്തിരിക്കുന്നത് കുട്ടൻ കരടി കണ്ടത്
കുട്ടൻ കരടി കോണിപ്പടിയിലൂടെ മേലോട്ട് കയറാൻ തുടങ്ങി . പെട്ടന്ന് കോന്തുണ്ണിയും കൊതിച്ചിക്കോതയും കൂടി കോണി തള്ളി താഴെയിട്ടു.
അതിനിടയിൽ മുറ്റത്ത് നിൽക്കുന്ന മൂവാണ്ടൻമാവിൽ നിറയെ മാങ്ങ പഴുത്ത് കിടക്കുന്നത് കുട്ടൻ കരടി കണ്ടു .വിശപ്പു മൂത്ത കുട്ടൻ കരടി വേഗം മൂവാണ്ടൻ മാവിന്റെ മുകളിൽ കയറി .
അവൻ ആർത്തിയോടെ മാങ്ങ പറിച്ച് തിന്നു . പിന്നെ കുറെ പറിച്ച് താഴേക്കെറിയാൻ തുടങ്ങി . ഇത് കണ്ട് കൊതിയൻ കോന്തുണ്ണി എന്ത് ചെയ്യണമെന്നറിയാതെ കുഴങ്ങി. പെട്ടന്നാണ് മേൽക്കൂരയിൽ ഒരു കടന്നൽ കൂട് തൂങ്ങി കിടക്കുന്നത് കൊതിച്ചികോത കണ്ടത് .
കൊതിച്ചികോത വേഗം ആ കടന്നൽ കൂടെടുത്ത് കരടിയുടെ നേരെ എറിഞ്ഞു . കടന്നലുകൾ പാഞ്ഞു ചെന്ന് കരടിയെ കുത്താൻ തുടങ്ങി. കുത്തേറ്റ കുട്ടൻ കരടി താഴെ വീണു . മുറ്റത്ത് നിന്ന മുതുക്കിപ്പശുവിന്റെ മേലെയാണ് അവൻ വീണത് . മുതുക്കിപ്പശു കരടിക്കിട്ടൊരു തൊ ഴി കൊടുത്തു . കുട്ടൻ കരടി കരഞ്ഞു കൊണ്ട് എങ്ങോട്ടെന്നില്ലാതെ ഓടി നടന്നു.
കോന്തുണ്ണിയും കൊതിച്ചിക്കോതയും കൂടി വേഗം താഴെയിറങ്ങി . മാമ്പഴമെല്ലാം പെറുക്കിയെടുത്തു , മാമ്പഴം പെറുക്കിയെടുത്തതുകൊണ്ടവർ പാടി.
” കൊതിയനും കോതയും പായസം വച്ചെ
തിന്തിനം തെയം തെയ്യണം താരാ…
പായസമുണ്ണുവാൻ കരടിയും വന്നേ
തിന്തിനം തെയ്യം തെയ്യനം താരാ…
കരടിച്ചെറുക്കന്റെ നട്ടെല്ലൊടിഞ്ഞേ
തിന്തിനം തെയ്യനം തെയ്യനം താരാ…
കൊതിയനും കോതക്കും മാമ്പഴം കിട്ടി
തിന്തിനം തെയ്യണം തെയ്യനം താരാ..
