കൊല ചെയ്യപ്പെട്ട കോളേജ് വിദ്യാർത്ഥി അഭിമന്യുവിന്‍റെ സ്വപ്ന സാക്ഷാത്ക്കാരത്തിനായി സംഘടിപ്പിച്ച പുസ്തക വണ്ടി ശ്രദ്ധേയമായി. ഡിവൈഎഫ്ഐ കരുനാഗപ്പള്ളി ബ്ലോക്ക് കമ്മിറ്റിയാണ് പുസ്തകവണ്ടിയുടെ യാത്ര സംഘടിപ്പിച്ചത്. ജൻമനാടായ വട്ടവടയിൽ ഒരു ലൈബ്രറി എന്നത് അഭിമന്യുവിന്‍റെ സ്വപ്നമായിരുന്നു. ഈ സ്വപ്ന സാക്ഷാത്ക്കാരത്തിനായി ജനങ്ങളിൽ നിന്നും പുസ്തകങ്ങൾ ശേഖരിക്കുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. പുസ്തകവണ്ടിയുടെ ഉദ്ഘാടനം തൊടിയൂർ അരമത്തുമഠം ജംഗ്ഷനിൽ ഡിവൈഎഫ് ഐ മുൻ സംസ്ഥാന പ്രസിഡന്‍റ് പി ആർ വസന്ത് നിർവഹിച്ചു. മാരാരിതോട്ടം, തറയിൽമുക്ക്, ആലുംകടവ് ,ചെറിയഴീക്കൽ, അഴീക്കൽ സുനാമി സ്മാരകം, ആലുംപീടിക, മഞ്ഞാടിമുക്ക്, വള്ളിക്കാവ് എന്നിവിടങ്ങളിലെ സ്വീകരണത്തിനു ശേഷം കൊച്ചാലുംമൂട്ടിൽ സമാപിച്ചു.
