ദശ കൗമാരം

 

 

 

 

 

 

ചോദ്യത്തിന്റെ ഇല വെക്കും  മുമ്പേ
ഉത്തരങ്ങളുടെ  സദ്യ  വിളമ്പാറുള്ള അച്ഛനോട്
പുച്ഛമായിരുന്നു

ആവർത്തിച്ചാവർത്തിച്ചു
ചോദിച്ചാലും, പകരാൻ ഉത്തരമില്ലാത്ത  അമ്മയോട്
സഹതാപമായിരുന്നു

സൂര്യന് കീഴെയുള്ള സർവകാര്യങ്ങളിലും
മുൻവിധി മാത്രമുള്ള  ചേച്ചിയോട്
അമർഷം മാത്രമായിരുന്നു

ദൈവത്തിന്റെ വീടെവിടെയാ
ഇഗ്വാന   താമസിക്കുന്നത്  ഇഗ്ലൂവിലാ
അതെന്താ അങ്ങനെ
ഇതെന്താ ഇങ്ങനെ
കൊന്നപ്പൂവിന് മഞ്ഞ പൂശിയതാരാ  എന്നൊക്കെ    ചോദിക്കാറുള്ള
അനിയത്തിപ്രാവിനോട് ഒരു പൊട്ടന്റെ  ആംഗികത്തിൽ കവിഞ്ഞു
മൊഴിയാനൊന്നുമില്ലായിരുന്നു

പകലോന്റെ കീശയിലെ
കിലുക്കാനാവാത്ത വെള്ളിനാണയങ്ങൾ
രാവിന്റെ സഞ്ചിയിലെ
മാണിക്യക്കല്ലുകളായി  മാറുമ്പോൾ
ഏതോ നിസ്വന്റെ വിസ്മയമായിരുന്നില്ലേ

നക്ഷത്രങ്ങളുടെ നഗ്നത നുണയുന്ന
രാത്രിയോട് നല്ല  സൊയമ്പൻ അസൂയ

ചെറുകിട ദുഃഖങ്ങളോടും
വൻകിട പരിഭവങ്ങളോടും
മല്ലിടുന്ന  കൗമാരദിനങ്ങൾ
കുട്ടികളുടെ കൂട്ടത്തിൽ എടുക്കാത്ത നാണയം
മുതിർന്നവരുടെ ഗോത്രത്തിൽ ഭ്രഷ്ട്

അസ്വസ്ഥത അടിച്ചമർത്തിയ   പൊട്ടാത്ത ചിരി
ചുണ്ടിന്റെ കോണിൽ സദാ ഒളിച്ചിരിക്കും

ഏകാന്തത കൊണ്ട് വാങ്ങിയ  ഏകാകിതയുടെ തുരുത്തിൽ
ആലംബനം ഒരാൾ  മാത്രം

ഒരിക്കൽ, പറയാത്ത വാക്കിനല്ലേ ഊക്കെന്നു കരുതി
അവളുടെ മുന്നിൽ ചുമ്മാ ഒന്ന് മിണ്ടാതിരുന്നതാ –
അപ്പഴാ അവൾ കടുപ്പിച്ചു ചോദിക്കുന്നത് :
എന്താ പൊട്ടാ, നിനക്കൊന്നും പറയാനില്ലേ

കൗമാരപ്രണയത്തിന്റെ മുറിവുണങ്ങിയ നെറ്റിയിൽ
ഓർക്കാൻ  ഒരു കല  മാത്രം  ബാക്കി
ആ കലയിൽ നീ ചുണ്ടമർത്തുമ്പോൾ
ചോര കിനിയുന്നു കടന്നു പോയ  മറ്റൊരു  യാത്രികന്റെ!

അഭിപ്രായങ്ങൾ

അഭിപ്രായങ്ങൾ

SHARE
Previous articleവെള്ളക്കുരുപ്പകൾ
Next articleവോട്ടെടുപ്പിനുശേഷം കിറ്റിന് പഴയ വേഗമില്ല: സാധനങ്ങളുടെ ലഭ്യതക്കുറവെന്ന് വിശദീകരണം
വേണുനമ്പ്യാർ
ജനനം 1955 ൽ കണ്ണൂർജില്ലയിലെ കണ്ണപുരം ഗ്രാമത്തിൽ. അഞ്ചാം വയസ്സിലുണ്ടായ ഒരു വെടിക്കെട്ടപകടത്തിൽ ആസന്നമരണാനുഭവം. സ്ഥലത്തെ ദിവ്യനായ ഡോക്ടറുടെ വിവേകംമൂലം ജീവൻ തിരിച്ചുകിട്ടി; സൗഭാഗ്യമോ ദൗര്ഭാഗ്യമോ എന്താണ് പറയേണ്ടതെന്ന് അറിയില്ല , അദ്ദേഹത്തിന്റെ കൈപ്പിഴകൊണ്ട് മറ്റൊരു കാര്യം സംഭവിച്ചു. ഇടതു കണ്ണിന്റെ കാഴ്ച നഷ്ടപ്പെട്ടു. പത്താംക്ലാസ്സിനുശേഷം ടൈപ്പട,ചുരുക്കെഴുത്തു,അക്കൗണ്ടൻസി, ജ്യോതിഷം എന്നീ ഒടിവിദ്യകൾ അഭ്യസിച്ചു. ബേക്കറി ഓവൻ സഹായി, ബിൽ കളക്ടർ, ലോഡ്ജ് മാനേജർ..ഇത്യാദി .പല പണികളിലും ഭാഗ്യം പരീക്ഷിച്ചു. ഒരു ഗതിയും കിട്ടിയില്ല. പിന്നീട് ഒരു ശരാശരി മലയാളിയുടെ തലവിധിയുമായി ഊരുചുറ്റൽ: കൊൽക്കത്ത.ഡൽഹി. ഡെഹ്റാഡൂൺ. "വേണുവിന് കഥയെഴുതുവാൻ കഴിയും, വിടാതെ കൂടിയ്‌ക്കോളൂ ". എന്നെഴുതി ഒരിക്കൽ കുഞ്ഞുണ്ണിമാഷ് അനുഗ്രഹിച്ചിരുന്നു. ആ ബലത്തിൽ എഴുതിയ ചില രചനകൾ, പുഴ മാഗസിൻ, കഥ, ദേശാഭിമാനി, കുങ്കുമം, മനോരാജ്യം,മനോരമ, മംഗളം, ബാലരമ, ചന്ദ്രിക,ചില്ല, സമയം എന്നീ പ്രസിദ്ധീകരണങ്ങളിൽ പ്രകാശമോ ഇരുളോ പരത്തി. സർഗശ്രമങ്ങൾക്കു കയ്പ്പും മധുരവുമായിരുന്നു പ്രതിഫലം.'അമ്പുനമ്പ്യാരുടെ തോക്കിനു' മനോരാജ്യത്തിന്റെ ചെറുകഥാ പുരസ്‌കാരം.കുങ്കുമത്തിൽ വന്ന കഥകളുടെ പേരിൽ പ്രൊ എം കൃഷ്ണൻ നായരുടെ നിരന്തര ശകാരം. 2010 ൽ ഓ യെൻ ജി സി ഡെഹ്‌റാഡൂണിലെ എച് ആർ എക്സിക്യൂട്ടീവ് തസ്‌തികയിൽനിന്നു വി ആർ എസ്സെടുത്തു. പ്രവാസപ്പായ ചുരുട്ടിക്കെട്ടിയതിനു ശേഷം . ഇപ്പോൾ കണ്ണപുരത്ത്‌. ഭാര്യ ശ്രിമതി പി .നളിനിയോടൊപ്പം വിശ്രമജീവിതം. രണ്ടു പെണ്മക്കൾ,സൗമ്യ.ദിവ്യ.ഇവർ വിവാഹിതരായി ബാംഗ്ലൂരിൽ കഴിയുന്നു. എഴുത്തുകാരന്റെ സ്ഥിരമേൽവിലാസം :- പി സി വേണുഗോപാലൻ, സോപാനം,, കണ്ണപുരം ഈസ്റ്റ്, പി ഓ മൊട്ടമ്മൽ, കണ്ണൂർ 670331 മൊബൈൽ 9400563338,

അഭിപ്രായം എഴുതുക

Please enter your comment!
Please enter your name here