ഞാനില്ലായ്മകൾ

 

ഞാനില്ലായ്മയിൽ
മുറ്റത്തെ
അരിമുല്ല
നാല് മണി
നേരങ്ങളിൽ
ഒരിറ്റ്
നിണനീരിനായി
എന്നെ
തേടുമായിരിക്കും….

മണ്ണിനെ
ചുംബിച്ചു
മുറ്റത്തു പതിച്ചു
കിടക്കുന്ന
കരിയില-
ക്കൂട്ടങ്ങളും
എന്നെ
അന്വേഷിക്കു-
മായിരിക്കും….

കിഴക്ക്
ദിക്കിൽ
വെള്ള
കീറുമ്പോൾ
തത്തി തത്തി-
യെത്തുന്ന
കരിയില
ക്കിളികൾ
ഒരു പിടി
നെന്മണിക്കായി
കരഞ്ഞു
തളരുമായിരിക്കും….

വടക്ക്-കിഴക്ക്
ഈശാൻ
കോണിലെ
അടുക്കളയിൽ
ഇനിയും തീ
കൂട്ടാതിരിക്കുമ്പോൾ
എന്റെ
വിറക് അടുപ്പും
സന്ദേഹ-
പ്പെടുമായിരിക്കും
”അമ്മ
എവിടെപോയി”
എന്ന്….

അതിരാവിലെ
തമ്മിൽ
തട്ടിതടഞ്ഞ്
കോലാഹല
ശബ്ദമുയർത്തുന്ന
പിഞ്ഞാണങ്ങളും
തിരയുമായി-
രിക്കുമെന്നെ….

അത്രയേറെ
ആഗ്രഹിച്ചു
മടക്കിയൊതുക്കി
വെച്ചോരാ
പുത്തൻമണം
വിട്ടുമാറാത്ത
പട്ടുസാരിയും
തിരയുമായിരിക്കും,
ഉത്സവനാളായിട്ടുമെന്തേ
ഇന്നും എന്നെ
തിരഞ്ഞെത്താതെന്ന്….

തടി അലമാരായിലെ
പകുതി പൊട്ടിയ
കണ്ണാടിയിൽ
അന്ന് ഞാൻ
പതിപ്പിച്ച് വെച്ച
എന്റെ ചുവന്ന
വട്ടപൊട്ടും എന്നെ
തിരയുന്നുണ്ടാകും…

ചുമരുകൾ
മാറാലയുടെ
കൈപ്പിടി-
യിലമരുമ്പോൾ,
അവരും
തിരിഞ്ഞു
ചിന്തിക്കു-
മായിരിക്കും
‘ഞാൻ എത്രത്തോളം
ഭദ്രതയോടെയാണ്
അവരെ
കാത്തുസൂക്ഷി-
ച്ചിരുന്നതെന്ന് ‘……

തിളക്കം
നഷ്ട്ടപ്പെട്ട
മേനിയോടെ
നിർജ്ജീവമായി
മാറിയൊരെൻ
ഭവനവും
ഞാനില്ലായ്മ
യിൽ
വീർപ്പു
മുട്ടുന്നുണ്ടാവും….

ഞാനില്ലായ്മയിൽ
നിശബ്ദമായി
പോകുന്ന
എന്നിടങ്ങൾ…..

 

അഭിപ്രായങ്ങൾ

അഭിപ്രായങ്ങൾ

SHARE
Previous articleടൂറിങ് ബുക്ക്സ്റ്റാൾ (ടി.ബി.എസ്) ഉടമ എൻ.ഇ ബാലകൃഷ്ണമാരാർ അന്തരിച്ചു
Next articleഅബുദാബി ശക്തി അവാർഡ് 2022
ശശിധരൻ പിള്ള ,ബിന്ദുകുമാരി ദമ്പതികളുടെ ഏകമകളായി 22.09.2001 സെപ്റ്റംബറിൽ  ജനനം. പത്തനംതിട്ടയിലെ അടൂർ ആണ് സ്വദേശം. പന്തളം എൻ. എസ്.എസ് കോളേജിൽ ഇംഗ്ലീഷ് സാഹിത്യത്തിൽ ബിരുദം ചെയ്യുന്നു.നിലവിൽ *നന്ദിനിയുടെ കവിതകൾ* എന്ന പേരിൽ  ജർമൻ പുസ്തക പ്രസാധകരുടെയും അക്ഷരം മാസികയുടെയും സഹകരണത്തോടെ ഒരു ഡിജിറ്റൽ പുസ്തകം പ്രസിദ്ധീകരിച്ചു. ഓൺലൈൻ മാധ്യമങ്ങളിലും, മാസികകളിലും സപ്പ്ളിമെന്റുകളിലും എഴുത്തുകൾ പ്രസിദ്ധികരിക്കാറുണ്ട്. യുവ എഴുത്തുകാരി, കവയത്രി എന്നീ നിലകളിൽ തപസ്യ കലാസാഹിത്യവേദിയിൽ നിന്നും ,മറ്റനവധി വേദികളിൽ നിന്നും പുരസ്‌ക്കാരങ്ങൾ,അനുമോദനങ്ങൾ,അവാർഡുകൾ എന്നിവ ലഭിച്ചു.

അഭിപ്രായം എഴുതുക

Please enter your comment!
Please enter your name here