രവിബാബു ബാപ്പുവിനോട് പറഞ്ഞത്

 

 

സ്വാതന്ത്ര്യത്തിന്നർദ്ധരാത്രിക്കുമേറെ
വത്സരങ്ങൾക്കുമുമ്പൊരു കൽക്കത്താസായാഹ്നവേളയിൽ
പുൽത്തകിടിയിൽ സൊറ പറഞ്ഞിരിപ്പുണ്ട്‌
ഉറ്റതോഴരാം ഗുരുദേവനും മഹാത്മാവും!

കാലം വെള്ളിച്ചാർത്തൊരുക്കിയ താടിയും മുടിയും
ഋഷിശാന്തി പൊലിയും മിഴികളും ഗുരുദേവർക്ക്;
മധ്യവാർധക്യത്തിലും തിരളുന്നു മുഖകാന്തി ഗാന്ധിക്ക്,
ചിരിക്കുമ്പോൾ പല്ലില്ലാമോണയ്ക്കുമുണ്ടൊരു നിഷ്കളങ്കച്ചന്തം!

സവാരിക്കിറങ്ങുംമുമ്പ് പറഞ്ഞത്രേ കവിസുന്ദരൻ :
“കാത്തിരിക്ക, ചങ്ങാതി; മുടിയൊന്നു കോതിക്കോട്ടെ.”
അതു കേട്ടിട്ടല്പം ചൂടായത്രേ ഗാന്ധിപ്പൂമൊട്ടയും;
ഇപ്പ്രായത്തിലും വേണോ, ഗുരോ, കോപ്രായങ്ങളിങ്ങനെ!

ഒരാൾ ചർക്കയെങ്കിൽ മറ്റൊരാൾ ഓടക്കുഴൽ
തർക്കമില്ലിരുവരും വിശ്വശാന്തി കാംക്ഷിപ്പവർ;
കൊച്ചുവർത്തമാനം പറഞ്ഞങ്ങനെ നേരംപോയി
പിന്നെയോർക്കാപ്പുറത്തെടുത്തിട്ടേൻ ഇന്ത്യതൻ
സമകാലികമാം വിഷയം, ‘നിസ്സഹകരണം’ !
മുന്നെയീ വിഷയത്തിൽ മാന്യമായുഗ്രൻ
കുറിമാനങ്ങളെത്ര കൈമാറിയില്ലിരുവരു,
മൊരാളതിന്റെ കടുത്ത വക്താവെങ്കിൽ ;
മറ്റെയാൾ, ശക്‌തനാം പ്രതിയോഗിയും!

പൊടുന്നനെ കാണായി ഗുരുദേവന്
ഗാന്ധിതൻ വദനത്തിലൊരു ഭാവമാറ്റം;
രൗദ്രമോ അസഹിഷ്ണതയോ
പേരിട്ടെന്തു വിളിക്കുമതിനെ
ഹിംസമെന്നോ നൃശംസമെന്നോ?

പരചിത്തജ്ഞാനത്തിലൂടെ
രവിബാബു കാര്യം ഗ്രഹിച്ചീടവേ
ഒരു കൊച്ചുപുൽക്കൊടിയിലേക്കു
നീളുന്നതാ ഗാന്ധിതൻ തവിട്ടുകൈ!

“അരുതരുതേ, മഹാത്മാവേ, അരുത്!”

അഹിംസാചാര്യരെത്താനും വിലക്കീ കവിവര്യനും :

“വെറും പുല്ലാണെന്നു കരുതി ഞെരിക്കൊലാ, മഹാത്മാവേ,
പുല്ലല്ല, സ്രഷ്ടാവിൻ സർഗ്ഗതന്തുതാനല്ലോയത്!”

അഭിപ്രായങ്ങൾ

അഭിപ്രായങ്ങൾ

SHARE
Previous articleജിപ്സികൾ ഒരുക്കുന്ന പോർട്രയറ്റ്സുകൾ
Next articleകാക്കമുട്ടകൾ
വേണുനമ്പ്യാർ
ജനനം 1955 ൽ കണ്ണൂർജില്ലയിലെ കണ്ണപുരം ഗ്രാമത്തിൽ. അഞ്ചാം വയസ്സിലുണ്ടായ ഒരു വെടിക്കെട്ടപകടത്തിൽ ആസന്നമരണാനുഭവം. സ്ഥലത്തെ ദിവ്യനായ ഡോക്ടറുടെ വിവേകംമൂലം ജീവൻ തിരിച്ചുകിട്ടി; സൗഭാഗ്യമോ ദൗര്ഭാഗ്യമോ എന്താണ് പറയേണ്ടതെന്ന് അറിയില്ല , അദ്ദേഹത്തിന്റെ കൈപ്പിഴകൊണ്ട് മറ്റൊരു കാര്യം സംഭവിച്ചു. ഇടതു കണ്ണിന്റെ കാഴ്ച നഷ്ടപ്പെട്ടു. പത്താംക്ലാസ്സിനുശേഷം ടൈപ്പട,ചുരുക്കെഴുത്തു,അക്കൗണ്ടൻസി, ജ്യോതിഷം എന്നീ ഒടിവിദ്യകൾ അഭ്യസിച്ചു. ബേക്കറി ഓവൻ സഹായി, ബിൽ കളക്ടർ, ലോഡ്ജ് മാനേജർ..ഇത്യാദി .പല പണികളിലും ഭാഗ്യം പരീക്ഷിച്ചു. ഒരു ഗതിയും കിട്ടിയില്ല. പിന്നീട് ഒരു ശരാശരി മലയാളിയുടെ തലവിധിയുമായി ഊരുചുറ്റൽ: കൊൽക്കത്ത.ഡൽഹി. ഡെഹ്റാഡൂൺ. "വേണുവിന് കഥയെഴുതുവാൻ കഴിയും, വിടാതെ കൂടിയ്‌ക്കോളൂ ". എന്നെഴുതി ഒരിക്കൽ കുഞ്ഞുണ്ണിമാഷ് അനുഗ്രഹിച്ചിരുന്നു. ആ ബലത്തിൽ എഴുതിയ ചില രചനകൾ, പുഴ മാഗസിൻ, കഥ, ദേശാഭിമാനി, കുങ്കുമം, മനോരാജ്യം,മനോരമ, മംഗളം, ബാലരമ, ചന്ദ്രിക,ചില്ല, സമയം എന്നീ പ്രസിദ്ധീകരണങ്ങളിൽ പ്രകാശമോ ഇരുളോ പരത്തി. സർഗശ്രമങ്ങൾക്കു കയ്പ്പും മധുരവുമായിരുന്നു പ്രതിഫലം.'അമ്പുനമ്പ്യാരുടെ തോക്കിനു' മനോരാജ്യത്തിന്റെ ചെറുകഥാ പുരസ്‌കാരം.കുങ്കുമത്തിൽ വന്ന കഥകളുടെ പേരിൽ പ്രൊ എം കൃഷ്ണൻ നായരുടെ നിരന്തര ശകാരം. 2010 ൽ ഓ യെൻ ജി സി ഡെഹ്‌റാഡൂണിലെ എച് ആർ എക്സിക്യൂട്ടീവ് തസ്‌തികയിൽനിന്നു വി ആർ എസ്സെടുത്തു. പ്രവാസപ്പായ ചുരുട്ടിക്കെട്ടിയതിനു ശേഷം . ഇപ്പോൾ കണ്ണപുരത്ത്‌. ഭാര്യ ശ്രിമതി പി .നളിനിയോടൊപ്പം വിശ്രമജീവിതം. രണ്ടു പെണ്മക്കൾ,സൗമ്യ.ദിവ്യ.ഇവർ വിവാഹിതരായി ബാംഗ്ലൂരിൽ കഴിയുന്നു. എഴുത്തുകാരന്റെ സ്ഥിരമേൽവിലാസം :- പി സി വേണുഗോപാലൻ, സോപാനം,, കണ്ണപുരം ഈസ്റ്റ്, പി ഓ മൊട്ടമ്മൽ, കണ്ണൂർ 670331 മൊബൈൽ 9400563338,

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English