മല മയങ്ങുന്നു- മാനം മയങ്ങുന്നു

മലമയങ്ങുന്നു മാനം മയങ്ങുന്നു

മനം മയങ്ങുന്നു കാടുലയുന്നു

ഉടലുലയുന്നു ഉയിരുലയുന്നു.

മല ചൊരുക്കുന്നു മരം ചൊരുക്കുന്നു

മനം മറിയുന്നു മല കറങ്ങുന്നു

മാനം കറങ്ങുന്നു തല കറങ്ങുന്നു

തലയറഞ്ഞാടി തകർത്തുതുളളടീ

കുരുത്തം കെട്ടോളേ

മുല തുളളിച്ചാടിക്കളിച്ചു പാടടീ

തെറിച്ചതേങ്കാളീ തുടിമുഴക്കിക്കൊ-

ണ്ടടുത്തുകൂടടാ പൊടിമീശക്കാരാ

കുടിമൂപ്പന്മാരും കുടിച്ചുകൂത്താടി

തിമർത്തുപാടുന്നു കുളക്കോഴിപ്പെണ്ണേ

കുണുങ്ങി വാ- നിന്റെ കുരവ കേക്കട്ടെ.

മരത്തിൽ ചേക്കേറി മയങ്ങും കൂട്ടുകാർ

ഇളകിയാർക്കുന്നു മരത്തിന്റെ കൊമ്പു-

കുലുക്കിയെത്തുന്നു വിരുതൻ തൈക്കാറ്റ്‌

കുളത്തിലെ വരാൽ കളത്തിൽ നീന്തുന്നു

കളിയിതെന്താവോ?

ഇടിമിന്നൽപോലെ ഇടയ്‌ക്കിടെ വെട്ടം

തെളിഞ്ഞുമായുന്നു

പുകിലുപൂക്കുന്നു പുതിയ പൂതികൾ

വലയിലെന്താവോ? വലയിലാരാവോ?

(കടമ്മനിട്ട രാമകൃഷ്‌ണൻ ഏറ്റവും ഒടുവിലെഴുതിയ കവിത)

Generated from archived content: poem1_july4_08.html Author: kadamanitta_ramakrishnan

അഭിപ്രായങ്ങൾ

അഭിപ്രായങ്ങൾ

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English