കുട്ടിയുണ്ടോ, കുടതരാം….

 

അതിരാവിലെ ആരാണാവോ എന്ന ആകാംക്ഷയോടെയാണ് രാമേട്ടൻ വാതിൽ തുറന്നത്. പരിചയമുള്ള മുഖമല്ല. മാന്യമായ വേഷം.കയ്യിൽ ബാഗുകളും കുടകളുമടങ്ങിയ കിറ്റുമായി രണ്ടുപേർ. ബാഗ് കച്ചവടക്കാരായിരിക്കും.’’ഇപ്പോഴാണോ നിങ്ങൾ വരുന്നത്. ഇവിടെ ബാഗും കുടയുമൊക്കെ എപ്പോഴേ വാങ്ങിക്കഴിഞ്ഞു.’’
വന്നവരെ വന്നവഴി തന്നെ പറഞ്ഞു വിടാം എന്ന ഉദ്ദേശത്തോടെ രാമേട്ടൻ പറഞ്ഞു.
‘’ഞങ്ങൾ ബാഗ് കച്ചവടക്കാരൊന്നുമല്ല മാഷേ,തിരക്കില്ലെങ്കിൽ അകത്തിരുന്ന് സംസാരിക്കാം.’’ ചിലരങ്ങിനെയാണ്,അഞ്ച് മിനിറ്റെന്ന് പറഞ്ഞ് അകത്ത് കയറും. പിന്നെ ഇറക്കി വിടാൻ വേറെ ആളെ വിളിക്കേണ്ടി വരും. ഇതും അതു പോലെ വല്ല കേസുമാണോ എന്ന സംശയത്തോടെയാണെങ്കിലും അവരെ അകത്തേക്ക് ക്ഷണിച്ചു.
‘’രണ്ട് ബാഗ്,രണ്ട് കുട,ബോക്സ്,നോട്ട് ബുക്ക്..ഇതെല്ലാമെടുത്ത് മാഷിന് കൊടുക്ക്.പിന്നെ വേണ്ട ടെക്സ്റ്റ്ബുക്കുകളുടെ കണക്ക് ഞങ്ങളെ ഏൽപ്പിച്ചോളൂ മാഷേ.’’
കൂടെയുള്ളയാൾക്ക് നിർദ്ദേശം കൊടുക്കലും രാമേട്ടനോടുള്ള സംസാരവും എല്ലാം ഒന്നിച്ചുതന്നെ. തന്നെക്കാൾ തിരക്ക് അവർക്കാണെന്ന് രാമേട്ടന് തോന്നി. എന്നിട്ടും സംഭവമെന്താണെന്ന് മാത്രം പിടികിട്ടിയില്ല. സർക്കാർ വല്ല സൗജന്യപഠന സഹായ പദ്ധതിയും പ്രഖ്യാപിച്ചോ, അതോ ഏതെങ്കിലും സംഘടനകളുടെ വക സൗജന്യ പഠനോപകരണ വിതരണ പദ്ധതിയണോ സംശയം ന്നീളവെ ആഗതർ പരിചയപ്പെടുത്തി.
‘’ഞങ്ങൾ അടുത്ത സ്ക്കൂളിലെ അധ്യാപകരാണ്. കുട്ടികളെ ഞങ്ങളുടെ സ്ക്കൂളിൽ വിടുന്ന കാര്യം മറക്കരുത്.’’ ഇനിയെങ്കിലും സത്യം പറഞ്ഞാലോ എന്ന് രാമേട്ടൻ വിചാരിച്ചു.
‘’എന്താ മാഷേ ആലോചിക്കുന്നത്. ദൂരത്തിന്റെ കാര്യമാണോ.അതൊന്നും സാരമില്ല. രാവിലെ കുട്ടികളെ റെഡിയാക്കി വീടിന്റെ വാതിൽക്കൽ നിർത്തിയാൽ മതി.സൗജന്യമായി വാഹന സൗകര്യവും ഏർപ്പെടുത്തിയിട്ടുണ്ട്. പിന്നൊരു കാര്യം വേറെ സ്ക്കൂളുകാരൊക്കെ പലപല ഓഫറുകളുമായി വരും.അതിലൊന്നും വീണേക്കരുത്.’’
കുട്ടികളെ പിടിക്കാൻ അടുത്ത വീട് ലക്ഷ്യമാക്കി ഇറങ്ങും മുമ്പ് വന്നവരിൽ ഒരധ്യാപകൻ രാമേട്ടനെ ഓർമ്മിപ്പിച്ചു. ’’ഇനി എനിക്കൊരു കാര്യം പറയാനുണ്ട്’.’
കുട്ടികളെ ബാഗിലാക്കാനുള്ള തിരക്കിനിടയിലും അവർ തിരിഞ്ഞു നിന്നു.
‘’എന്റെ വിവാഹം കഴിഞ്ഞിട്ട് വർഷങ്ങൾ ഒത്തിരിയായി. ഇതുവരെ കുട്ടികളൊന്നുമായില്ല.ഒരുകുഞ്ഞിക്കാൽ കാണാനായി വിളിക്കാത്ത ദൈവങ്ങളില്ല.പോകാത്ത അമ്പലങ്ങളില്ല.നിങ്ങളും പ്രാർഥിക്കണം ‘’ പറഞ്ഞു തീർന്നില്ല ബാഗും കുടയുമായി വന്നവർ, പോയവഴി കണ്ടില്ല.
’’ കഴിക്കാനെന്തെങ്കിലുമെടുക്ക്. രാവിലെ അത്യാവശ്യമായി ഒരിടത്ത് പോകാനുള്ളതാ’’ രാമേട്ടൻ അകത്തേക്ക് നോക്കി വിളിച്ചു പറഞ്ഞു.പുതിയ കുട്ടികളെ പിടുത്തക്കാർ ആരെങ്കിലും വരും സ്ഥലം കാലിയാക്കാനുള്ള വെമ്പലോടെ രാമേട്ടൻ പറഞ്ഞു.

അഭിപ്രായങ്ങൾ

അഭിപ്രായങ്ങൾ

SHARE
Previous articleഅര്‍ജന്റീന – ബ്രസീല്‍ സ്വപ്ന‌ സെമിക്ക് കാതോർത്ത് ഫുട്ബോൾ ലോകം
Next articleതീരെ അപരിചിതനായ ഒരുവനെപ്പറ്റി
നൈന മണ്ണഞ്ചേരി
ആലപ്പുഴ ജില്ലയിലെ മണ്ണഞ്ചേരിയില്‍ 1967-ല്‍ ജനനം. മലയാളത്തില്‍ എം.എ.ബിഎഡ്.ബിരുദം.കഥകള്‍,കവിതകള്‍, ലേഖനങ്ങള്‍ തുടങ്ങിയവ പ്രസിദ്ധീകരിക്കുകയും ആകാശവാണി പ്രക്ഷേപണം ചെയ്യുകയും ചെയ്തിട്ടുണ്ട്. നര്‍മ്മസാഹിത്യരംഗത്ത് കൂടുതല്‍ സജീവം.പാലാ കെ.എം.മാത്യൂ പുരസ്കാരം,ചിക്കൂസ് പുരസ്ക്കാരം, പൂന്താനം പുരസ്കാരം, കലാകേന്ദ്രം പുരസ്കാരം, കല്‍ക്കട്ട പുരോഗമനകലാസാഹിത്യ സംഘം പുരസ്ക്കാരം,ബാംഗളൂര്‍ പ്രവാസിസാഹിത്യ പുരസ്ക്കാരം,ബാംഗളൂര്‍ മലയാളിസമാജം പുരസ്ക്കാരം, നെഹ്രുട്രോഫി ജലോത്സവ സുവനീർ കമ്മറ്റിയുടെ റിപ്പോര്‍ട്ടിംഗ് പുരസ്ക്കാരം തുടങ്ങിയ നേടിയിട്ടുണ്ട്. ‘’സൂക്ഷിക്കുക അവാര്‍ഡ് വരുന്നു’’, ‘’പങ്കന്‍സ് ഓണ്‍ കണ്‍ട്രി’’, ‘’ഇമ്മിണി ബല്യ നൂറ്’’ ''ഓമനപ്പാറ ഗ്രാമപഞ്ചായത്ത്',''വഴിയേ പോയ വിനോദയാത്ര'' തുടങ്ങിയ നര്‍മ്മ കഥാസമാഹാരങ്ങളും ''സ്നേഹതീരങ്ങളിൽ'',''മന്ത്രവാദിയുടെ കുതിര'' തുടങ്ങിയ ബാലസാഹിത്യ കൃതികളും പ്രസിദ്ധീകരിച്ചിട്ടുണ്ട്. പ്രസിദ്ധീകരിച്ചിട്ടുണ്ട്. ''സ്നേഹതീരങ്ങളിൽ'' എന്ന നോവൽ ''സ്നേഹതീരത്തെ അക്ഷരപ്പൂക്കൾ'' എന്ന പേരിൽ സിനിമയായി.ഇതിന്റെ തിരക്കഥ,സംഭാഷണം,ഗാനങ്ങൾ എഴുതി. ''നന്ദിത'' എന്ന സിനിമയിലും ഗാനങ്ങൾ എഴുതി. അഞ്ച് വര്‍ഷം സൗദിഅറേബ്യയില്‍ ജോലി ചെയ്തു. ഇപ്പോള്‍ ആലപ്പുഴ വ്യവസായ കോടതി യിലെ ജീവനക്കാരന്‍. എരമല്ലൂരില്‍ താമസിക്കുന്നു. വിലാസം: നൈനമണ്ണഞ്ചേരി, നൈനാസ്, എരമല്ലൂര്‍. പി.ഒ, ആലപ്പുഴ(ജില്ല) പിന്‍ -688537. Address: Phone: 9446054809

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English