തുറന്ന ഫയലുകൾക്കിടയിലെ ജീവിതം..

file-folders

ഫയലുകൾ അങ്ങനെയാണ്
അടച്ചു വെച്ചിരിക്കുമ്പോൾ നമ്മളറിയില്ല
എത്രയോ കഥകൾ അവയിലുറങ്ങുന്നുവെന്ന്..
തുറന്നു നോക്കുമ്പോഴാണ് കഥകളായി
അവ നമുക്ക് മുന്നിലേക്ക് പറന്നിറങ്ങുന്നത്..
കദനങ്ങളായി പടർന്ന് നിറയുന്നത്..
തുറന്ന ഫയലുകൾ ചിലപ്പോൾ കരയും
ചിലപ്പോൾ ചിരിക്കും
ചിലപ്പോൾ ഒരു സുഹൃത്തിനെപ്പോലെ
തോളിൽ കയ്യിടും
ചിലപ്പോൾ ഒരു ശത്രുവിനെപ്പോലെ
കണ്ണുരുട്ടും..
എത്ര പേരുടെ നൊമ്പരങ്ങളും ജീവിതങ്ങളുമാണ്
അടച്ച ഫയലുകളിലുറങ്ങുന്നത്
ഇടയ്ക്ക് അവ തുറന്നു നോക്കുമ്പോൾ
പൊടിയോടൊപ്പം ഓർമ്മകളും താഴേക്ക് വീഴും

ഹൈക്കോടതിയിൽ നിന്നും
ഹാജരാക്കാൻ നിർദ്ദേശം വന്നപ്പോഴാണ്
തൊണ്ണൂറ്റൊമ്പതിലെ ഒരു ഫയൽ പൊടി തട്ടിയെടുത്തത്
ഇരുണ്ട റെക്കോഡ് മുറിയിൽ നിന്നും
ഫയലുകൾ തപ്പിയെടുക്കാൻ സമയം കുറെ എടുത്തു
ഒറ്റയ്ക്ക് റെക്കോഡ് മുറിയിൽ നിൽക്കുമ്പോൾ
വല്ലാത്ത പേടിയാണ്
പൊടി പിടിച്ച ഫയലുകളിൽ അട്ടിയട്ടിയായി
കെട്ടി വെച്ചിരിക്കുന്നത് മനുഷ്യരുടെ വ്യഥകളാണ്..
അടക്കി വെച്ച ഫയലുകളുടെ വീർപ്പുമുട്ടലുകൾക്കിടയിൽ
അടർന്നു വീഴുന്ന ഗദ്ഗദങ്ങളുടെ നൊമ്പരം
ഭിത്തിയിൽ ചെവി ചേർത്തു വെച്ചാൽ
ഹൃദയമിടിപ്പു പോലെ കേൾക്കാം..
അവയിൽ തൊഴിൽ നഷ്ടപ്പെട്ടവരുടെ ദു:ഖമുണ്ട്
ജീവൻ നഷ്ടപ്പെട്ടവരുടെ വേദനയുണ്ട്..
ഒരു നഷ്ടപരിഹാര കേസിന്റെ ഫയലായിരുന്നു
കണ്ടെത്തേണ്ടിയിരുന്നത്
ഭാര്യയുടെയും മക്കളുടെയും
തേങ്ങലുകൾ ചേർത്ത് കെട്ടിവെച്ച ഫയൽ..
അത് തുറന്നപ്പോൾ സങ്കടക്കടലാണ്
പുറത്തേക്കൊഴുകിയത്..
മറിച്ചു നോക്കുമ്പോൾ നഷ്ടപ്പെട്ട വർഷങ്ങൾ
മങ്ങലായി പടർന്നിറങ്ങിയ ഫയലിന് ജീവൻ വെച്ചു
മഴയും മഞ്ഞും നിറഞ്ഞ ഫയലിൽ നിന്നും
ആത്മാവുകൾ പറന്നിറങ്ങി
മരണശേഷം ഭർത്താവിന്റെ മറ്റൊരു
ഭാര്യയെപ്പറ്റി അറിയാനിടയായ
നൊമ്പരവും അമ്പരപ്പും ഫയലുകൾക്കിടയിൽ
രോഷമായി പടർന്നു..
അടക്കി വെച്ച സങ്കടത്തിന്റെ ശേഷിപ്പുകൾ
പരിഭവം പറഞ്ഞു കരഞ്ഞു..
ഫയലുകൾ അങ്ങനെയാണ്
അടച്ചു വെച്ചിരിക്കുമ്പോൾ നമ്മളറിയില്ല
എത്രയോ കഥകൾ അവയിലുണ്ടെന്ന്
തുറന്നു നോക്കുമ്പോഴാണ്
അവയിലുറങ്ങുന്ന ജീവിതം നമുക്ക് മുന്നിലേക്ക്
കഥകളായി പറന്നിറങ്ങുന്നത്

അഭിപ്രായങ്ങൾ

അഭിപ്രായങ്ങൾ

Previous articleപശു നമുക്ക് എന്തെല്ലാം തരുന്നു
Next articleമൺസൂൺ ഫെസ്റ്റിവൽ
നൈന മണ്ണഞ്ചേരി
ആലപ്പുഴ ജില്ലയിലെ മണ്ണഞ്ചേരിയില്‍ 1967-ല്‍ ജനനം. മലയാളത്തില്‍ എം.എ.ബിഎഡ്.ബിരുദം.കഥകള്‍,കവിതകള്‍, ലേഖനങ്ങള്‍ തുടങ്ങിയവ പ്രസിദ്ധീകരിക്കുകയും ആകാശവാണി പ്രക്ഷേപണം ചെയ്യുകയും ചെയ്തിട്ടുണ്ട്. നര്‍മ്മസാഹിത്യരംഗത്ത് കൂടുതല്‍ സജീവം.പാലാ കെ.എം.മാത്യൂ പുരസ്കാരം,ചിക്കൂസ് പുരസ്ക്കാരം, പൂന്താനം പുരസ്കാരം, കലാകേന്ദ്രം പുരസ്കാരം, കല്‍ക്കട്ട പുരോഗമനകലാസാഹിത്യ സംഘം പുരസ്ക്കാരം,ബാംഗളൂര്‍ പ്രവാസിസാഹിത്യ പുരസ്ക്കാരം,ബാംഗളൂര്‍ മലയാളിസമാജം പുരസ്ക്കാരം, നെഹ്രുട്രോഫി ജലോത്സവ സുവനീർ കമ്മറ്റിയുടെ റിപ്പോര്‍ട്ടിംഗ് പുരസ്ക്കാരം തുടങ്ങിയ നേടിയിട്ടുണ്ട്. ‘’സൂക്ഷിക്കുക അവാര്‍ഡ് വരുന്നു’’, ‘’പങ്കന്‍സ് ഓണ്‍ കണ്‍ട്രി’’, ‘’ഇമ്മിണി ബല്യ നൂറ്’’ ''ഓമനപ്പാറ ഗ്രാമപഞ്ചായത്ത്',''വഴിയേ പോയ വിനോദയാത്ര'' തുടങ്ങിയ നര്‍മ്മ കഥാസമാഹാരങ്ങളും ''സ്നേഹതീരങ്ങളിൽ'',''മന്ത്രവാദിയുടെ കുതിര'' തുടങ്ങിയ ബാലസാഹിത്യ കൃതികളും പ്രസിദ്ധീകരിച്ചിട്ടുണ്ട്. പ്രസിദ്ധീകരിച്ചിട്ടുണ്ട്. ''സ്നേഹതീരങ്ങളിൽ'' എന്ന നോവൽ ''സ്നേഹതീരത്തെ അക്ഷരപ്പൂക്കൾ'' എന്ന പേരിൽ സിനിമയായി.ഇതിന്റെ തിരക്കഥ,സംഭാഷണം,ഗാനങ്ങൾ എഴുതി. ''നന്ദിത'' എന്ന സിനിമയിലും ഗാനങ്ങൾ എഴുതി. അഞ്ച് വര്‍ഷം സൗദിഅറേബ്യയില്‍ ജോലി ചെയ്തു. ഇപ്പോള്‍ ആലപ്പുഴ വ്യവസായ കോടതി യിലെ ജീവനക്കാരന്‍. എരമല്ലൂരില്‍ താമസിക്കുന്നു. വിലാസം: നൈനമണ്ണഞ്ചേരി, നൈനാസ്, എരമല്ലൂര്‍. പി.ഒ, ആലപ്പുഴ(ജില്ല) പിന്‍ -688537. Address: Phone: 9446054809

അഭിപ്രായം എഴുതുക

 Click this button or press Ctrl+G to toggle between Malayalam and English