ബസ്സുയാത്ര

എന്തുതിരക്കാണമ്പോ! ബസ്സിൽ

ഉന്തും തളളും കശപിശയും!

“ചെല്ലാനത്തേക്കുളളവരെല്ലാം

ചില്ലറ വേഗമെടുത്താട്ടെ”

മീശചുരുട്ടിക്കണ്ണുമുരുട്ടി-

ക്കണ്ടക്ടർസാറെത്തുന്നൂ

‘ചില്ലറ നൽകാനില്ലെട കൂവേ

എന്താ നോട്ടിനു വിലയില്ലേ?“

ആളുകൾ പലരും ചൂടാകുന്നു

കണ്ടക്ടർസാർ ’ചമ്മു‘ന്നൂ

എന്തുതിരക്കാണമ്പോ! ബസ്സിൽ

ഉന്തും തളളും കശപിശയും!

”സ്ര്തീകൾ ഞങ്ങടെ സീറ്റിലിരിക്കും

പുരുഷന്മാരേ മാറ്യാട്ടെ“

പേരുക്കുട്ടിയുമായിക്കയറിയ

കത്രീനാമ്മ കയർക്കുന്നു!

”കുടകൊണ്ടാരോ മുതുകിനുനോക്കി-

ക്കുത്തുന്നല്ലോ കർത്താവേ!“

കൊച്ചീക്കാരൻ കൊച്ചവറാച്ചൻ

തലയിൽ കൈവെച്ചമറുന്നൂ!

എന്തുതിരക്കാണമ്പോ! ബസ്സിൽ

ഉന്തും തളളും കശപിശയും!

എന്തൊരുകഷ്ടം ”മാത്തുക്കുട്ടീ

സീറ്റിലിതെന്തൊരു മൂട്ടകടി“!

-ഗൾഫിൽ നിന്നും ലീവിൽപ്പോരും

മൂസ്സാൻ ചാടിയെണീക്കുന്നൂ

”സീറ്റിലിരിക്കാൻ വയ്യെങ്കിൽ നീ

സീറ്റിനു കീഴെയിരുന്നോളൂ!“

മാത്തുക്കുട്ടിയുമന്തോണീസും

ഫലിതമടിച്ചു കലക്കുന്നൂ!

എന്തുതിരക്കാണമ്പോ! ബസ്സിൽ

ഉന്തും തളളും കശപിശയും!

ഒന്നുകുതിച്ചും നിന്നുകിതച്ചും

ബസ്സോടുന്നൂ മടിയാതെ

കമ്പികൾതോറും തൂങ്ങുന്നല്ലോ

വാഴക്കുലപോൽ യാത്രക്കാർ!

കിളിയുടെ ശല്യം; മണിയടിശല്യം!

’സൈഡി‘ലിരുന്നാൽ പൊടിശല്യം!

സ്‌റ്റോപ്പിൽ വണ്ടി നിറുത്തുന്നേരം

പലരും പലതും പറയുന്നു.

Generated from archived content: nursery_aug6.html Author: sippi_pallipuram

അഭിപ്രായങ്ങൾ

അഭിപ്രായങ്ങൾ

SHARE
Previous articleപപ്പടത്തിന്റെ കുസൃതി
Next articleഅണ്ണാനോട്‌
Avatar
1943 മെയ്‌ 18 ന്‌ എറണാകുളം ജില്ലയിലെ വൈപ്പിൻ പളളിപ്പുറത്തു ജനിച്ചു. 1966-മുതൽ പളളിപ്പുറം സെന്റ്‌ മേരീസ്‌ ഹൈസ്‌കൂളിൽ അധ്യാപകനായിരുന്നു. ദേശീയവും പ്രാദേശീകവുമായ നിരവധി അവാർഡുകൾ നേടിയ സാഹിത്യകാരൻ. കഴിഞ്ഞ മൂന്നു ദശകങ്ങളായി മലയാള ബാലസാഹിത്യരംഗത്ത്‌ പ്രവർത്തിച്ചു വരുന്നു. കുട്ടികളുടെ വികാരവിചാരങ്ങൾക്കനുസരിച്ച്‌ തൂലിക ചലിപ്പിച്ച്‌ അവരെ വിസ്‌മയലോകത്തിലാറാടിക്കുന്ന എഴുത്തുകാരൻ. ഇതിനകം അമ്പത്തിയഞ്ച്‌ ബാലസാഹിത്യകൃതികൾ പ്രസിദ്ധീകരിച്ചിട്ടുണ്ട്‌. 1985-ൽ ‘ചെണ്ട’ എന്ന കൃതിക്ക്‌ ബാലസാഹിത്യത്തിനുളള ദേശീയ അവാർഡ്‌ ലഭിച്ചു. പൂരം, തത്തകളുടെ ഗ്രാമം, അപ്പൂപ്പൻ താടിയുടെ സ്വർഗ്ഗയാത്ര, പപ്പടം പഴം പായസം, തത്തമ്മേ പൂച്ച പൂച്ച, തേൻതുളളികൾ, മിന്നാമിനുങ്ങ്‌, ഉണ്ടനും ഉണ്ടിയും പുലിയച്ചനും, നൂറുനേഴ്‌സറിപ്പാട്ടുകൾ, ചന്ദനപ്പാവ, മയിലും മഴവില്ലും, കാട്ടിലെ കഥകൾ, കുറുക്കൻ കഥകൾ, ഗുരുഭക്തിയുടെ കഥകൾ, ഉണ്ണികൾക്ക്‌ നല്ലകഥകൾ, നമ്പൂര്യച്ചനും ഭൂതവും, പാവയ്‌ക്കക്കുട്ടൻ, കുരങ്ങാട്ടിയും കളളനോട്ടുകാരും, പാൽക്കിണ്ണം, സ്വർണക്കമ്പിളി, കഥകഥപ്പൈങ്കിളി എന്നിവയാണ്‌ പ്രധാന കൃതികൾ. ഭാര്യഃ മേരീസെലിൻ, മക്കൾ ഃ ശാരിക, നവനിത്‌. വിലാസം ഃ പളളിപ്പോർട്ട്‌ പി.ഒ, കൊച്ചി- 683515.

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English