രക്തസാക്ഷി

download-1

മകനേ നിൻ ശ്രാദ്ധമുണ്ണാൻ വന്ന കാക്കകൾ കരയുന്നു..
മൃത്യുബോധത്തിൻ നടുക്കത്തിലച്ഛന്റെ നെഞ്ചിൽ
നെരിപ്പോട് കത്തിയെരിയുമ്പൊഴും
നൊമ്പരം മീട്ടുന്ന തന്ത്രികളിലമ്മയുടെ
ജീവതാളങ്ങൾ തകർന്നു വീഴുമ്പൊഴും
പെയ്യാ വിഷാദമേഘങ്ങളായ് പെങ്ങളുടെ
ചൈതന്യ ധാരകൾ വറ്റി വരളുമ്പൊഴും

കനവുകൾ ഞെട്ടറ്റ തമസ്സിന്റെ വഴികളിൽ
ഗതി തേടിയാത്മാവ് നില വിളിക്കുമ്പോഴും
കണ്ണീരുണങ്ങാത്ത ജീവന്റെ മുറിവുകൾ
മൗനനിശ്വാസമായ് മണ്ണിലുറയുമ്പൊഴും
കരളിലൊരു നൊമ്പരക്കിളിയുടെ തേങ്ങലായ്
കരുണക്കവാടങ്ങളിവിടെയടയുമ്പൊഴും

മകനെ നിൻ ശ്രാദ്ധമുണ്ണാൻ വന്ന കാക്കകൾ കരയുന്നു..

ചിറകറ്റ വെള്ളരി പ്രാവിന്റെ തേങ്ങലിൽ
തീരാത്ത ഗദ്ഗദം ബാക്കിയാവുമ്പൊഴും
ചുടുനിണപ്പാടുകൾ മായാത്ത വാളുകൾ
വീണ്ടും ബലിക്കല്ലിൽ മൂർച്ച കൂട്ടുമ്പൊഴും
അവസാന യാത്രയും ചൊല്ലാൻ മന:സാക്ഷി
കനിവു കാണിക്കാതെ വഴിയടക്കുമ്പൊഴും

ഓർമ്മകൾ വാർഷികം തീർക്കുമീ വേളയിൽ
തെരുവിലെ ജാഥയായ് ജനമിരമ്പുമ്പൊഴും
ഛായാപടത്തിൽ കരിംകൊടികൾ ചാർത്തുവാൻ
തോഴരുടെ മൽസരം ബാക്കിയാകുമ്പൊഴും
ചോരയ്ക്കു പകരം ചോരയെന്നാവേശ
ശബ്ദങ്ങളാകാശമേറ്റു വാങ്ങുമ്പൊഴും

തിരികെയിനിയെത്താത്തയോർമ്മകൾ മാത്രമായ്
മറവിയിലെങ്ങോ മറഞ്ഞു പോകുമ്പൊഴും
രക്തസാക്ഷിത്വങ്ങൾ ചിതറുന്ന ചോരയാൽ
അനുബന്ധ ചിത്രങ്ങൾ എഴുതി വെക്കുമ്പൊഴും
കൽപ്പാന്തകാലം വിതുമ്പുന്ന നൊമ്പര
പ്പൂക്കളായുറ്റവർ നിന്നെയോർക്കുമ്പൊഴും

മകനേ നിൻ ശ്രാദ്ധമുണ്ണാൻ വന്ന കാക്കകൾ കരയുന്നു..
മകനെ നിൻ ശ്രാദ്ധമുണ്ണാൻ വന്ന കാക്കകൾ കരയുന്നു..

[സമർപ്പണം…എല്ലാ രക്തസാക്ഷികളുടെയും ഓർമ്മകൾക്കു മുന്നിൽ..അവരുടെ കുടുംബങ്ങളുടെ തീരാത്ത വേദനയ്ക്കും തോരാത്ത കണ്ണീരിനും മുന്നിൽ..]

അഭിപ്രായങ്ങൾ

അഭിപ്രായങ്ങൾ

SHARE
Previous articleമലയാള കവിതാ പുരസ്‌കാരം 2018
Next articleഇരുപതുകളിൽ അവസാനിച്ചു പോയ പ്രേമത്തെക്കുറിച്ചൊരു സ്ത്രീയുടെ ഓർമ്മപ്പുസ്തകം
നൈന മണ്ണഞ്ചേരി
ആലപ്പുഴ ജില്ലയിലെ മണ്ണഞ്ചേരിയില്‍ 1967-ല്‍ ജനനം. മലയാളത്തില്‍ എം.എ.ബിഎഡ്.ബിരുദം.കഥകള്‍,കവിതകള്‍, ലേഖനങ്ങള്‍ തുടങ്ങിയവ പ്രസിദ്ധീകരിക്കുകയും ആകാശവാണി പ്രക്ഷേപണം ചെയ്യുകയും ചെയ്തിട്ടുണ്ട്. നര്‍മ്മസാഹിത്യരംഗത്ത് കൂടുതല്‍ സജീവം.പാലാ കെ.എം.മാത്യൂ പുരസ്കാരം,ചിക്കൂസ് പുരസ്ക്കാരം, പൂന്താനം പുരസ്കാരം, കലാകേന്ദ്രം പുരസ്കാരം, കല്‍ക്കട്ട പുരോഗമനകലാസാഹിത്യ സംഘം പുരസ്ക്കാരം,ബാംഗളൂര്‍ പ്രവാസിസാഹിത്യ പുരസ്ക്കാരം,ബാംഗളൂര്‍ മലയാളിസമാജം പുരസ്ക്കാരം, നെഹ്രുട്രോഫി ജലോത്സവ സുവനീർ കമ്മറ്റിയുടെ റിപ്പോര്‍ട്ടിംഗ് പുരസ്ക്കാരം തുടങ്ങിയ നേടിയിട്ടുണ്ട്. ‘’സൂക്ഷിക്കുക അവാര്‍ഡ് വരുന്നു’’, ‘’പങ്കന്‍സ് ഓണ്‍ കണ്‍ട്രി’’, ‘’ഇമ്മിണി ബല്യ നൂറ്’’ ''ഓമനപ്പാറ ഗ്രാമപഞ്ചായത്ത്',''വഴിയേ പോയ വിനോദയാത്ര'' തുടങ്ങിയ നര്‍മ്മ കഥാസമാഹാരങ്ങളും ''സ്നേഹതീരങ്ങളിൽ'',''മന്ത്രവാദിയുടെ കുതിര'' തുടങ്ങിയ ബാലസാഹിത്യ കൃതികളും പ്രസിദ്ധീകരിച്ചിട്ടുണ്ട്. പ്രസിദ്ധീകരിച്ചിട്ടുണ്ട്. ''സ്നേഹതീരങ്ങളിൽ'' എന്ന നോവൽ ''സ്നേഹതീരത്തെ അക്ഷരപ്പൂക്കൾ'' എന്ന പേരിൽ സിനിമയായി.ഇതിന്റെ തിരക്കഥ,സംഭാഷണം,ഗാനങ്ങൾ എഴുതി. ''നന്ദിത'' എന്ന സിനിമയിലും ഗാനങ്ങൾ എഴുതി. അഞ്ച് വര്‍ഷം സൗദിഅറേബ്യയില്‍ ജോലി ചെയ്തു. ഇപ്പോള്‍ ആലപ്പുഴ വ്യവസായ കോടതി യിലെ ജീവനക്കാരന്‍. എരമല്ലൂരില്‍ താമസിക്കുന്നു. വിലാസം: നൈനമണ്ണഞ്ചേരി, നൈനാസ്, എരമല്ലൂര്‍. പി.ഒ, ആലപ്പുഴ(ജില്ല) പിന്‍ -688537. Address: Phone: 9446054809

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English