മറയൂര്‍ ശര്‍ക്കര

ഇതാ
ഇതു വാങ്ങിച്ചോളൂ
ബലിച്ചോറുരുള പോലെ
പരിശുദ്ധം

വെട്ടിയെടുക്കുമ്പോള്‍
കൈവിറയ്ക്കും
നൊന്തു പെറ്റതാണ്,

യന്ത്രത്തില്‍ കിടന്നരയുമ്പോള്‍
ഊറി വരുന്നത് ചുടുചോരയാണ് സാര്‍

പാഴ് കിനാവുകളൊക്കെയും
ചളിയും പതയുമായി പൊന്തുന്നത് തേവിക്കളഞ്ഞ്

കൊപ്രയില്‍ തിളക്കുന്നത്
വിയര്‍പ്പാണ്
ആര്‍ദ്രമായതൊന്നും ബാക്കിയില്ലാതെ പോവുമ്പോള്‍
കാലം ഉറച്ചു കട്ടപിടിച്ചു പോവും

ഉരുട്ടിയെടുക്കുമ്പോള്‍
പൊള്ളില്ല
ചരിത്രത്തിലെ എല്ലാ ഇഷ്ടികച്ചൂളകളും
ഇതേ കൈവെള്ളകളിലായിരുന്നല്ലോ പുകഞ്ഞത്

ഓരോ ഉരുളയിലും
പതിഞ്ഞു കിടക്കുന്ന
രേഖകള്‍ ചിതല്‍ തിന്നു പോയ
അഞ്ചു വിരലുകള്‍

ആളെയളക്കുന്ന യന്ത്രത്തില്‍
ഇതേ വിരലമര്‍ത്തുമ്പോള്‍
ദാരിദ്ര്യക്കാര്‍ഡില്‍
അരിയും മണ്ണെണ്ണയും തെളിയാറില്ല സാര്‍

ശര്‍ക്കരയുടെ നിറം
ചോരക്കറയുടെതാകും സാര്‍
അറയ്ക്കേണ്ട, വാങ്ങിക്കണം സാര്‍
കേടു വരില്ല , രുചി കൂടും
ഒരലങ്കാരക്കലര്‍പ്പുമില്ല

ഇത് ജീവിതത്തിന്റെ
കവിതയാണ് സാര്‍,
വായിക്കാതെ പോകരുത്

അഭിപ്രായങ്ങൾ

അഭിപ്രായങ്ങൾ

SHARE
Previous articleസ്വാതി-അയ്യപ്പപ്പണിക്കർ സാഹിത്യ പുരസ്കാരം റഫീക് അഹമ്മദിന്
Next articleപൊന്മാന്റെ മുട്ട
ശിവപ്രസാദ്‌ പാലോട്‌
1975 ൽ പാലക്കാട് ജില്ല തച്ചനാട്ടുകരയിൽ ജനനം.1995 മുതൽ വിവിധ ആനുകാലികങ്ങളിൽ സൃഷ്ടികൾ പ്രസിദ്ധീകരിച്ചു വരുന്നു. ഡോ പദ്മ തമ്പാട്ടി ഇംഗ്ലീഷിലേക്ക് തർജമ ചെയ്ത കവിതകൾ കേന്ദ്ര സാഹിത്യ അക്കാദമി ജേർണൽ, മ്യൂസ് ഇന്ത്യ ഓൺലൈൻ ജേർണൽ എന്നിവയിൽ പ്രസിദ്ധീകരിച്ചു. സ്ട്രീറ്റ് വോയ്സ് എന്ന ജർമൻ ജേർണലിൽ ജർമൻ ഭാഷയിലേക്ക് കവിതകൾ തർജമ ചെയ്യപ്പെട്ട് പ്രസിദ്ധീകരിച്ചിരുന്നു. കുണ്ടൂർക്കുന്ന് വി പി എ യു പി സ്കൂൾ അധ്യാപകനായി ജോലി ചെയ്യുന്നു വിലാസംഃ ശിവപ്രസാദ്‌ പാലോട്‌, കുന്നത്ത്‌, പാലോട്‌ പി.ഒ., മണ്ണാർക്കാട്‌ കോളേജ്‌, പാലക്കാട്‌. Post Code: 678 583 Phone: 9249857148

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English