കയ്പ്‌ – മധുരം

ഒഴുകും പുഴയിലൊഴുക്കാം

നമുക്കീ ജീവിതത്തിൻ

കാഞ്ഞിരക്കായകൾ.

എന്തു മധുരിക്കും

എന്തു ചവർക്കും

ഏതെല്ലാമോർമ്മകൾ

സ്വരുക്കൂട്ടി വെയ്‌ക്കാം…

അറിയാവഴിയിലെ

അറിയാപ്പൊരുളുകൾ…

അറിയാക്കിനാവുകൾ

പെരുകിപ്പരക്കുന്നു.

കയ്‌ക്കാത്ത കാലം

ഒരുനാൾ വിരുന്നുവരും.

പട്ടുപോയ ചെടികളിൽ

പുതുമുളകൾ മുട്ടയിടും..

വിരിയും…

പൂക്കും

കായ്‌ക്കും- പിന്നെ

പുതിയ മധുരം രുചിച്ചു ചിരിക്കാം

പരസ്പരം നോക്കാം

കണ്ണിമ ചിമ്മാതെ…

നിർത്താതെ

വർത്തമാനം പറയാം.

അന്നേരം നമുക്ക്‌

കാലൊടിഞ്ഞ കാക്കയുടെ

കാവലാളാകാം..

മാളമില്ലാത്ത പാമ്പിനൊരു

മാളം തുരക്കാം.

കൂട്ടിലെ കിളികൾക്ക്‌

ചിറകുനൽകാം- പറത്താം…

ഒഴുകിയൊഴുകിത്തീരും വരെ

കാഞ്ഞിരക്കായകൾ

പൊട്ടിച്ചൊഴുക്കാം.

അല്ലെങ്കിലോ-

രണ്ട്‌ വഴികളിൽ

രണ്ട്‌ ലക്ഷ്യങ്ങളിലേക്ക്‌

അലക്ഷ്യമായി നടക്കാം..

പരസ്പരം കലഹിക്കാം

വെറുക്കാം…

ശത്രുക്കളെങ്കിലുമാവാം…

ഓർക്കുക-

വെളിച്ചമസ്തമിച്ച

താഴ്‌വരയിൽനിന്നും

ഇപ്പോഴും

ഒരു ഭ്രാന്തൻ

അനങ്ങാപ്പാറയനക്കുന്നുണ്ട്‌.

കിതയ്‌ക്കുന്നുണ്ട്‌..

കിതപ്പാറുമ്പോൾ

വീണ്ടും

പാറയുരുട്ടുന്നുണ്ട്‌.

കയറ്റിച്ചെന്ന്‌

വിയർപ്പ്‌ വടിച്ച്‌

ഒറ്റത്തളളിനിറക്കുന്നുണ്ട്‌…

പൊട്ടിപ്പൊട്ടിച്ചിരിക്കുന്നുണ്ട്‌…

കയറ്റം കയ്‌പ്‌…

ഇറക്കം മധുരം…

അതോ-

നേരെ തിരിച്ചോ…

അറിയില്ലല്ലോ…

അറിയുന്നൊന്ന്‌…

ഒഴുകും പുഴയിലൊഴുക്കാം

നമുക്കീ ജീവിതത്തിൻ

കാഞ്ഞിരക്കയ്‌പുകൾ…

Generated from archived content: poem_june26.html Author: sreedharan_nballa

അഭിപ്രായങ്ങൾ

അഭിപ്രായങ്ങൾ

SHARE
Previous articleഅരുതും വിരുതുകളും
Next articleഅവസ്ഥാന്തരങ്ങൾ
കഥയിൽ തുടങ്ങി. കവിതയിൽ സജീവം. ആനുകാലികങ്ങളിൽ എഴുതുന്നു. ഒരു കഥാസമാഹാരം പ്രസിദ്ധീകരിച്ചിട്ടുണ്ട്‌. ‘പരിണാമത്തിന്റെ ചരിത്രവും ഭൂമിശാസ്‌ത്രവും’. കവിതാസമാഹാരം ‘ചതുരം’ അച്ചടിയിൽ. സുരേന്ദ്രൻ സ്‌മാരക കവിതാപുരസ്‌കാരം, തപസ്യ രജതജൂബിലി കവിതാപുരസ്‌കാരം, അധ്യാപക കലാവേദികവിതാ അവാർഡ്‌, വിദ്യാരംഗം അവാർഡ്‌, ഡോ.ചെറിയാൻ മത്തായി ലിറ്റററി എന്റോൺമെന്റ്‌.... എന്നിങ്ങനെ ഏതാനും പ്രോത്സാഹനങ്ങൾ ലഭിച്ചിട്ടുണ്ട്‌. നിലമ്പൂരിൽ സ്ഥിരതാമസം. നിലമ്പൂർ ഗവഃയു.പി. സ്‌കൂളിൽ അധ്യാപകനായി പ്രവർത്തിക്കുന്നു. വിലാസം ഹരിതകം, ചക്കാലക്കുത്ത്‌, നിലമ്പൂർ പി.ഒ. Address: Phone: 0491 223132 Post Code: 679 329

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English