ഗീതം അമ്പത്തിയെട്ട്

കാണായതൊക്കെ നിന്‍ പ്രേമപ്രകര്‍ഷത്തിന്‍-
മായാത്ത മുദ്രകള്‍ മാത്രം,

ഓരോ തളിരിലും സൗവര്‍ണ്ണ കാന്തിതന്‍-
ചാരുത ചേര്‍ക്കുന്ന നൃത്തം!

വാനിലൂ,ടാലസ്യഭാവത്തില്‍ നീര്‍മുകില്‍-
മാലകള്‍ തന്‍ മന്ദയാനം,

മെയ്യിലമൃതം പുരട്ടുവാനെത്തുന്ന-
തെന്നലിന്‍ സാന്ത്വന സ്പര്‍ശം,

ഒക്കെയു, മൊക്കെയും അങ്ങിയന്നീടുന്ന
നിസ്തുല പ്രേമപ്രകര്‍ഷം!

എന്‍ മിഴിയാകെ കുളിര്‍പ്പിക്കയാണുഷാ-
രശ്മികള്‍ക്കേലും പ്രവാഹം,

എന്നിലാനന്ദം നിറയ്ക്കുന്നിതേ തവ-
മംഗളപ്രേമ സന്ദേശം!

എന്‍ നേര്‍,ക്കതാ ചാഞ്ഞടുക്കുന്നു സുസ്മേര-
സുന്ദരം നിന്മുഖം മന്ദം,

എന്‍ കണ്‍കളോ,ടിട ചേരുന്നു കാരുണ്യ-
തുന്ദിലം നിന്‍ നോട്ട,മാര്‍ദ്രം,

മന്ദമായ് കുമ്പിട്ടു മുത്തുന്നു നിന്‍പാദ-
യുഗ്മത്തി, ലെന്നന്തരംഗം !

കടപ്പാട്: കേരള സാഹിത്യ അക്കാദമി Email:akademipublication@gmail.com

Generated from archived content: geethanjali58.html Author: rabeendranath_tagore

അഭിപ്രായങ്ങൾ

അഭിപ്രായങ്ങൾ

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English