ഒഴിവുദിനംഃ ഒരു ഡയറിക്കുറിപ്പ്‌

ഞാനിറങ്ങിയത്‌

രക്‌തം വീണ്‌

തണുത്ത

ഇന്നലെയുടെ

തെരുവിലേക്കാണ്‌.

മണം പിടിച്ച്‌

നീങ്ങുന്ന ഭീതികൾ

ഒഴിവുദിനത്തിന്റെ

കാഴ്‌ചകളെ

കബന്ധങ്ങളാക്കി.

പകൽച്ചുവപ്പ്‌

കണ്ട്‌ പകച്ചുപോയ

എന്നെ

തലയില്ലാക്കാഴ്‌ചകൾ

കൈയാമം വെച്ച്‌

മാപ്പുസാക്ഷിയാക്കി.

അപ്പോഴാണ്‌-

അവർ വന്നത്‌…

ആദ്യം-

ചെന്നിനായകം പുരട്ടിയ

ഉടൽപ്പകുതിയിൽ

മധുരം കായ്‌ക്കുന്ന

ഒരു കാഞ്ഞിരനോട്ടം.

പിന്നെ-

കനൽക്കണ്ണിൽ

മൗനം തിളപ്പിച്ച്‌

വടിത്തുമ്പിലൂടെ

നിറയൊഴിക്കുന്ന

ശാസനാധികാരസ്‌പർശം.

പിന്നെ-

കുറ്റിപ്പെൻസിലിനൊപ്പം

കുഞ്ഞുവിരലുകളെയും

തീറ്റിപ്പോറ്റാൻ

അഹോരാത്രം

വിയർത്തൊരു

പെരുവിരൽഗന്ധം.

പിന്നെ-

അറിയാവഴികളിൽ

പറയാമൊഴിയായി

പാറിനടക്കെ

ഓർമ്മയിൽ

കുടുങ്ങിപ്പോയൊരു

ചുടുചുംബനത്തിന്റെ രസം.

ഒടുവിൽ-

വാൾത്തലപ്പിൽ

ഒരു സംസ്‌കൃതിയെ

കുളിപ്പിച്ച്‌ കിടത്തി

ശവമടക്കിന്‌

പോകുന്നവരുടെ

ആകാശഭേദിയാം

ആഘോഷാരവധ്വനികൾ.

ആരവങ്ങൾക്കിടയിൽ

കാഴ്‌ച മുറിഞ്ഞു.

കണ്ണ്‌ കവർന്നു.

ഞാൻ-

അന്ധനായി,

പിന്നെ-

കബന്ധനായി.

Generated from archived content: aug7_poem1.html Author: pr_harikumar

അഭിപ്രായങ്ങൾ

അഭിപ്രായങ്ങൾ

SHARE
Previous articleവൈകിപ്പൂത്ത പൂമരങ്ങൾ
Next articleസ്വാതന്ത്ര്യദിനാശംസകൾ
1960-ൽ ആറ്റിങ്ങലിൽ ജനനം. ഗവ.ആർട്‌സ്‌ കോളേജ്‌, യൂണിവേഴ്‌സിറ്റി കോളേജ്‌, കാലിക്കറ്റ്‌ സർവകലാശാല എന്നിവിടങ്ങളിൽ ഉപരിപഠനം.. മലയാളത്തിൽ എം.എ, എം.ഫിൽ ബിരുദങ്ങൾ. കേരളസാഹിത്യഅക്കാദമിയുടെ തുഞ്ചൻ സ്‌മാരക സമ്മാനം (1988) ലഭിച്ചിട്ടുണ്ട്‌. അങ്കണം കഥകൾ, ആറാം തലമുറക്കഥകൾ എന്നീ സമാഹാരങ്ങളിൽ കഥ ഉൾപ്പെടുത്തിയിട്ടുണ്ട്‌. കൃതികൾഃ നിറം വീഴുന്ന വരകൾ (കഥകൾ), അലിയുന്ന ആൾരൂപങ്ങൾ (കഥകൾ), വാക്കിന്റെ സൗഹൃദം (നിരൂപണം). 1986 മുതൽ കാലടി ശ്രീശങ്കരാകോളേജിൽ അദ്ധ്യാപകൻ. വിലാസം പി.ആർ.ഹരികുമാർ, എം.എ., എം.ഫിൽ, ലക്‌ചറർ, മലയാളവിഭാഗം, ശ്രീശങ്കരാകോളേജ,​‍്‌ കാലടി -683574 website: www.prharikumar.com Address: Phone: 0484 462341 0484 522352/9447732352

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English