നിത്യസത്യം

കാർമേഘമംബരം മൂടിയാലും

കാണാതിരിക്കുമോ സൂര്യബിംബം.

കൂരിരുൾ രാവിനെ പുൽകിയാലും

പൂനിലാവെങ്ങും പരക്കുകില്ലേ.

ആദിത്യബിംബം തിളങ്ങിയാലും

ആകാശഗംഗയ്‌ക്കു മാറ്റമുണ്ടോ?

ആറും പുഴയുമീ കലങ്ങിയാലും

ആഴിക്കു നീലിമ നിത്യമല്ലേ

ആയിരം ദീപം കൊളുത്തിയാലും

രാവിനു കൂരിരുൾ സ്വന്തമല്ലേ

വേനലിൻ തീനാമ്പുനക്കിയാലും

മാമരം പൂക്കൾ വിടർത്തുകില്ലേ?

പത്രങ്ങളൊക്കെ കൊഴിഞ്ഞീടിലും

പാദപം വീണ്ടും തളിർക്കുകില്ലേ

മരുഭൂമിയിൽ തൈമുളച്ചീടിലും

ഹരിതാഭ ചെടികൾക്കു സഹജമല്ലേ.

ചേറിൽ വളർന്നാലുംമംബുജങ്ങൾ

കോവിലിൽ പൂജയ്‌ക്കെടുക്കുകില്ലേ

പേമാരി കോരിച്ചൊരിഞ്ഞാകിലും

സാഗരത്തിന്നകം ശാന്തമല്ലേ

കാഠിന്യമേറെയാണെന്നാകിലും

കന്മദം പാറ ചുരത്തുകില്ലേ

മാലിന്യമേറെ പൊതിഞ്ഞീടിലും

മാണിക്യമെന്നും തിളങ്ങുകില്ലേ

കാപട്യമെത്രമേൽ ചൂഴ്‌ന്നീടിലും

കാലുഷ്യമാകുമോ നിത്യസത്യം.

ആഴിക്കുമീതേ കൊളുത്തിയാലും

അഗ്നിക്കുതാപം സമൃദ്ധമല്ലേ.

മേൽക്കുമേലെത്രയോ പൊന്തിയാലും

മേലെയല്ലേ നീലവാനമെന്നും.

Generated from archived content: nithyasathyam.html Author: karimpuzha_gopala

അഭിപ്രായങ്ങൾ

അഭിപ്രായങ്ങൾ

SHARE
Previous articleസച്ചിദാനന്ദന്റെ ക്യാമ്പ്‌ സാഹിത്യത്തകർച്ചയുടെ ലക്ഷണംഃ അഴീക്കോട്‌
Next articleപരമമായ സ്വാതന്ത്ര്യം – ഒരു സർദാർജി ഫലിതം
ഗായകൻ, ഗാനരചയിതാവ്‌, കവി, സംഗീതജ്ഞൻ എന്നീ നിലകളിൽ ഏറെ ശ്രദ്ധേയനായ ഒരു കലാകാരൻ. 28 സംവത്സരം ലക്ഷദ്വീപിന്റെ തലസ്ഥാനമായ കവരത്തിയിലെ സീനിയർ സെക്കൻഡറി സ്‌കൂളിൽ അദ്ധ്യാപകനായി സേവനമനുഷ്‌ഠിച്ചശേഷം, സ്വമേധയാ പിരിഞ്ഞ്‌, പാലക്കാട്‌ ജില്ലയിലെ കരിമ്പുഴയിൽ സ്ഥിരിതാമസമാക്കിയിരിക്കുന്നു. ശ്രീ കരിമ്പുഴ ഗോപാലകൃഷ്‌ണൻ കേരളത്തിനകത്തും പുറത്തുമായി നിരവധി സംഗീതകച്ചേരികൾ അവതരിപ്പിച്ചിട്ടുണ്ട്‌. കേരളത്തിലും ലക്ഷദ്വീപിലുമായി അനവധി കവിയരങ്ങുകളിൽ സ്വന്തം കവിത അവതരിപ്പിച്ച്‌ ആസ്വാദകവൃന്ദത്തിന്റെ അനുമോദനങ്ങൾക്ക്‌ പാത്രീഭൂതനായ ഇദ്ദേഹത്തിന്റെ ആദ്യകവിതാസമാഹാരം ‘ശില്പിയുടെ ദുഃഖം’ 2000 ജനുവരി ഒന്നിന്‌ പ്രസിദ്ധീകരിച്ചു. ലക്ഷദ്വീപ്‌ സാഹിത്യഅക്കാദമി മെമ്പർ, അക്കാദമി പ്രസിദ്ധീകരണമായ ‘സാഗരകലയുടെ’ എഡിറ്റോറിയൽ ബോർഡു മെമ്പർ എന്നീ നിലകളിൽ സ്തുത്യർഹമായ സേവനം അനുഷ്‌ഠിച്ചിട്ടുളള ശ്രീ.കരിമ്പുഴ ഗോപാലകൃഷ്‌ണൻ കേരളത്തിലെ പല ആനുകാലിക പ്രസിദ്ധീകരണങ്ങളിലും കവിതകളും ലേഖനങ്ങളും എഴുതാറുണ്ട്‌. അദ്ധ്യാപകപ്രതിഭ അവാർഡ്‌, ഗുരുശ്രേഷ്‌ഠ അവാർഡ്‌, കേന്ദ്ര സാംസ്‌കാരിക വകുപ്പ്‌ നൽകുന്ന ഫെലോഷിപ്പ്‌ തുടങ്ങിയവ, ഈ കലാകാരനു ലഭിച്ച അംഗീകാരങ്ങളിൽ ചിലതുമാത്രം. ഭാര്യഃ കലാമണ്ഡലം ഭാഗ്യേശ്വരി മക്കൾഃ ശ്രീമതി യമുനാ രാജൻ ശ്രീമതി യാമിനീ ഉണ്ണിക്കൃഷ്‌ണൻ

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English