കിട്ടാക്കടം

എവിടൊക്കെത്തേടിഞ്ഞാനോടി, സ്നേഹം

വിലപേശിവിൽക്കാത്തൊരിടം.

അമ്മയ്‌ക്കു സ്നേഹമാണെന്നെ, നാളെ

പൊന്നുമോനല്ലേ പ്രതീക്ഷ.

അമ്മയെ സ്നേഹമാണെന്നും, ജന്മം

തന്നുപാലൂട്ടി വളർത്തിയതല്ലേ.

അച്‌ഛനോടെന്തിഷ്ടമെന്നോ, സ്വത്തു

മൊത്തവും നൽകിയതല്ലേ.

അച്‌ഛനുസ്നേഹമാണെന്നെ, ഏറെ

സ്വത്തു ഞാൻ നേടിയിട്ടില്ലേ.

ഭാര്യക്കുസ്നേഹമാണെന്നെ, എന്റെ

പ്രാണനും പങ്കുവയ്‌ക്കില്ലേ.

ഭാര്യയോടെത്രമേൽ പ്രേമം, ഏറെ

സ്‌ത്രീധനമായ്‌ വന്നതല്ലേ.

മക്കൾക്കു സ്നേഹമാണെന്നെ, ഏതു

സ്വർഗ്ഗവും ഞാൻ നൽകുകില്ലേ

മക്കളോടെപ്പോഴുമിഷ്ടം, പണം

നഷ്ടപ്പെടുത്താത്ത മൂലം.

നാട്ടാർക്കുമിഷ്ടമാണെന്നെ, എന്റെ

നാട്ടിൽ പ്രമാണി ഞാനല്ലേ.

സ്നേഹിതന്മാർക്കേറെയിഷ്‌ടം, നൂറു

മേനിയും കൊയ്യാമെഥേഷ്‌ടം.

ബന്ധുമിത്രാദികൾക്കൊക്കെ, എന്റെ

ബന്ധുത്വമെന്തിഷ്ടമെന്നോ.

ചോദിച്ചതെന്തും കൊടുക്കും, ദാന

ശീലമാണേവർക്കുമിഷ്ടം.

എല്ലാരെയും സ്നേഹമെന്നും, എന്നെ

നന്നായ്‌ സ്തുതിക്കുവോരല്ലേ.

* * * * * * * * * *

മധുപാത്രമെന്നും നിറയ്‌ക്കും, പൂവി-

ലനുരക്തനാണേതു വണ്ടും.

മഴമേഘമെങ്ങും തടുക്കും, ഏതു

മലയും മനുഷ്യർക്കു സ്വർഗ്ഗം.

കടലിനെ മുക്കുവർക്കിഷ്ടം, എത്ര

പണവും പ്രതാപവും നേടാം.

കരയെ കൃഷീവലർക്കിഷ്ടം, ഏതു

മധുരപ്രതീക്ഷയും കൊയ്യാം.

പക്ഷികൾക്കാകാശമിഷ്ടം, എങ്ങും

പക്ഷം വിടർത്തിപ്പറക്കാം.

സ്നേഹമാണന്യോന്യമാർക്കും, ലാഭ

മേറെലഭിക്കുകിൽ മാത്രം.

കിട്ടുന്നിടത്തേ കൊടുക്കു, സ്നേഹം

കിട്ടാക്കടം മാത്രമത്രേ.

നൽകുവോർക്കത്രേ ലഭിക്കും, സ്നേഹം

നൽകുവോൻ നല്ലയാളത്രേ.

Generated from archived content: kittakadam.html Author: karimpuzha_gopala

അഭിപ്രായങ്ങൾ

അഭിപ്രായങ്ങൾ

SHARE
Previous articleകിട്ടാക്കടം
Next articleകോതാമൂരിപ്പാട്ടും പാടി….
ഗായകൻ, ഗാനരചയിതാവ്‌, കവി, സംഗീതജ്ഞൻ എന്നീ നിലകളിൽ ഏറെ ശ്രദ്ധേയനായ ഒരു കലാകാരൻ. 28 സംവത്സരം ലക്ഷദ്വീപിന്റെ തലസ്ഥാനമായ കവരത്തിയിലെ സീനിയർ സെക്കൻഡറി സ്‌കൂളിൽ അദ്ധ്യാപകനായി സേവനമനുഷ്‌ഠിച്ചശേഷം, സ്വമേധയാ പിരിഞ്ഞ്‌, പാലക്കാട്‌ ജില്ലയിലെ കരിമ്പുഴയിൽ സ്ഥിരിതാമസമാക്കിയിരിക്കുന്നു. ശ്രീ കരിമ്പുഴ ഗോപാലകൃഷ്‌ണൻ കേരളത്തിനകത്തും പുറത്തുമായി നിരവധി സംഗീതകച്ചേരികൾ അവതരിപ്പിച്ചിട്ടുണ്ട്‌. കേരളത്തിലും ലക്ഷദ്വീപിലുമായി അനവധി കവിയരങ്ങുകളിൽ സ്വന്തം കവിത അവതരിപ്പിച്ച്‌ ആസ്വാദകവൃന്ദത്തിന്റെ അനുമോദനങ്ങൾക്ക്‌ പാത്രീഭൂതനായ ഇദ്ദേഹത്തിന്റെ ആദ്യകവിതാസമാഹാരം ‘ശില്പിയുടെ ദുഃഖം’ 2000 ജനുവരി ഒന്നിന്‌ പ്രസിദ്ധീകരിച്ചു. ലക്ഷദ്വീപ്‌ സാഹിത്യഅക്കാദമി മെമ്പർ, അക്കാദമി പ്രസിദ്ധീകരണമായ ‘സാഗരകലയുടെ’ എഡിറ്റോറിയൽ ബോർഡു മെമ്പർ എന്നീ നിലകളിൽ സ്തുത്യർഹമായ സേവനം അനുഷ്‌ഠിച്ചിട്ടുളള ശ്രീ.കരിമ്പുഴ ഗോപാലകൃഷ്‌ണൻ കേരളത്തിലെ പല ആനുകാലിക പ്രസിദ്ധീകരണങ്ങളിലും കവിതകളും ലേഖനങ്ങളും എഴുതാറുണ്ട്‌. അദ്ധ്യാപകപ്രതിഭ അവാർഡ്‌, ഗുരുശ്രേഷ്‌ഠ അവാർഡ്‌, കേന്ദ്ര സാംസ്‌കാരിക വകുപ്പ്‌ നൽകുന്ന ഫെലോഷിപ്പ്‌ തുടങ്ങിയവ, ഈ കലാകാരനു ലഭിച്ച അംഗീകാരങ്ങളിൽ ചിലതുമാത്രം. ഭാര്യഃ കലാമണ്ഡലം ഭാഗ്യേശ്വരി മക്കൾഃ ശ്രീമതി യമുനാ രാജൻ ശ്രീമതി യാമിനീ ഉണ്ണിക്കൃഷ്‌ണൻ

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English