ഉച്ചൈശ്രവസ്സ്‌

കണ്ടുവോ? നിങ്ങളിന്നുച്ചൈശ്രവസ്സിനെ?

കദ്രുവിൻ കാപട്യബോധപർവ്വത്തിനെ?

കൈതവമില്ലാത്തൊരശ്വത്തെയെങ്ങാനും

വാലിൽ മറുകുമായ്‌ പായുന്ന കണ്ടുവോ?

പാലാഴിയിൽനിന്നും ശ്വേതവർണ്ണത്തിനാൽ

പാരിൽ ഗമിച്ചതാണാസുന്ദരാശ്വവും

പാപഭാരങ്ങളാൽ ശാപം ചുമക്കുന്ന

പാവം വിനതതൻ വാഴ്‌വിന്റെ നൊമ്പരം.

കുറ്റപ്പെടുത്തുന്ന സാക്ഷ്യപത്രങ്ങളെ-

ക്കെട്ടിപ്പിടിയ്‌ക്കുന്ന വാദമുഖങ്ങളേ,

ആരിന്നറിയുന്നു ആത്മാവിലേറ്റുന്നൊ-

രാർദ്രമാം നോവിന്റെ രാഗപ്പൊലിമകൾ?

നേരും നെറിയുമില്ലാത്ത ലോകത്തിൻ

നേരെത്തിരിയുന്ന ദേവസങ്കല്പമേ,

ന്യായം പ്രതിക്കൂട്ടിലാക്കുന്നു നിന്നെയും

ഞാനും പ്രതീക്ഷയ്‌ക്കു പിന്നിലായ്‌ നിൽക്കുന്നു.

എന്നെയും കാൽക്കീഴിലാക്കാൻ കൊതിയ്‌ക്കുന്നൊ-

രന്തർഗതങ്ങളേ, നിങ്ങൾ പൊറുക്കുക.

നിങ്ങളും ഞാനും നിതാന്തസമ്പർക്കത്തിൽ

നിദ്രയിൽ പോലും വിലാപകാവ്യങ്ങളായ്‌.

ഞെട്ടിത്തെറിയ്‌ക്കാത്ത ഞായറിൻ ശക്തി ഞാൻ

ചുട്ടുപൊളളിയ്‌ക്കുന്ന തീക്കനൽക്കട്ട ഞാൻ

ഒട്ടും മടിയാതെയൊറ്റിക്കൊടുക്കുവോർ-

ക്കൊറ്റച്ചിലമ്പിന്റെ വിമ്മിഷ്‌ടമാണു ഞാൻ.

പൊട്ടിത്തകരുകയാണെൻ ഹൃദന്തവും

അത്യുന്നതങ്ങളിൽ വാഴുന്ന സത്യമേ!

മിഥ്യാപഥങ്ങളിൽ അജ്ഞാതരൂപങ്ങൾ

മൃത്യുവിൻ ചാലകശക്തിയാകുമ്പൊഴും,

ഭാവം പരിതാപമാകയായ്‌, പിന്നെയും

പാതകമെന്തെന്നറിയാതെ നില്പൂ ഞാൻ…!

Generated from archived content: uchaisravassu.html Author: dipu_k_nair

അഭിപ്രായങ്ങൾ

അഭിപ്രായങ്ങൾ

SHARE
Previous articleതൂക്കം
Next articleഉൽക്കാവർഷങ്ങൾ
1961 ഡിസംബറിൽ തൃശൂർ ജില്ലയിൽ നെല്ലായിയ്‌ക്കടുത്തുള്ള ആലത്തൂർ എന്ന ഗ്രാമത്തിൽ ജനിച്ചു. ഹൈസ്‌ക്കൂൾ വിദ്യാഭ്യാസം മുതൽ അല്പാല്പം സാഹിത്യവാസന ഉണ്ടായിരുന്നു. പത്താം തരത്തിൽ പഠിയ്‌ക്കുമ്പോൾ യുവജനോത്സവത്തിനുവേണ്ടി ‘സത്യത്തിന്റെ നിഴലിൽ’ എന്നൊരു ഏകാങ്കനാടകം എഴുതി അവതരിപ്പിച്ചു. എൺപതുകളുടെ തുടക്കത്തിൽ ഏതാനും ചെറുപ്പക്കാരുടെ സംഘടനയായ ‘യുവചേതന’യ്‌ക്കുവേണ്ടി ‘അസ്തിത്വം തേടുന്നവർ’, “നഖക്ഷതങ്ങൾ” എന്നീ നാടകങ്ങൾ എഴുതി സംവിധാനം ചെയ്‌ത്‌ പല വേദികളിലും അവതരിപ്പിച്ചു. പല അമേച്വർ നാടകങ്ങൾക്കും വേണ്ടി ഗാനങ്ങൾ എഴുതിയിട്ടുണ്ട്‌. നിരവധി നാടകങ്ങളിൽ വ്യത്യസ്‌തങ്ങളായ കഥാപാത്രങ്ങളെ അവതരിപ്പിച്ചിട്ടുണ്ട്‌. 600-ലേറെ ഭാവഗീതങ്ങൾ എഴുതിയിട്ടുണ്ട്‌. സ്നേഹാ ഫിലിം ഇന്റർനാഷനലിന്റെ “ഗൗരീശങ്കരം” എന്ന ടെലിഫിലിമിനുവേണ്ടി ശീർഷകഗാനം എഴുതി. 1984 മുതൽ 10 വർഷക്കാലം ഔദ്യോഗികാർത്ഥം ബാംഗ്‌ളൂരിലായിരുന്നു. അവിടെ ഈസ്‌റ്റ്‌ കൾചറൽ അസോസിയേഷന്റെ ആഭിമുഖ്യത്തിൽ നടക്കാറുള്ള കലാസാംസ്‌ക്കാരിക പരിപാടികളിൽ പങ്കെടുക്കാറുണ്ട്‌. അവരുടെ ക്ഷണപ്രകാരം കവിയരങ്ങുകളിൽ പങ്കെടുത്തിട്ടുണ്ട്‌. 1999 സെപ്തംബർ മുതൽ സൗദിയിൽ ജോലി നോക്കുന്നു. ഇവിടുത്തെ “മലയാളം ന്യൂസ്‌” എന്ന പത്രത്തിൽ ധാരാളം കവിതകൾ പ്രസിദ്ധപ്പെടുത്തിയിട്ടുണ്ട്‌. ഫെബ്രുവരി 2000-ൽ നല്ല കവിതകളെഴുതിയതിന്‌ “മലയാളം ന്യൂസ്‌” സ്വർണ്ണനാണയം നല്‌കി അനുമോദിച്ചു. ആദ്യമായി പ്രസിദ്ധപ്പെടുത്തിയ കവിത “മനസ്സാക്ഷിയുടെ ചോദ്യം” - 1984-ൽ എറണാകുളത്തുനിന്നും പ്രസിദ്ധീകരിച്ചിരുന്ന “നയന” ഇൻലന്റ്‌ മാഗസിനിൽ. ആകാശവാണി തൃശൂർ നിലയം ലളിതഗാനങ്ങൾ പ്രക്ഷേപണം ചെയ്തുവരുന്നു. മലയാളസിനിമയ്‌ക്കുവേണ്ടി അർത്ഥമുള്ള ഗാനങ്ങളെഴുതാൻ അവസരം കാക്കുന്നു.

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English