കവി (ബിപിയെല്‍)

അനാഥ കുടുംബനാഥന്‍
ഏതുപണിയും ചെയ്തോളും
റേഷനരിയുടെ ബ്രാന്‍ഡ് അംബാസഡര്‍
ഭാര്യ തൊഴിലുറപ്പുപണിക്കാരി
രണ്ടു പിള്ളേര്‍ മലയാളം മീഡിയം
ജപ്തി നോട്ടീസിന്റെ പുറത്തും
കവിത കുറിക്കുന്നവന്‍.
എവിടെയെന്നില്ല എപ്പോഴെന്നില്ല
ഒരു പെഗ് ഓഫര്‍ ചെയ്താല്‍ കവിത ചൊല്ലും
സുഹൃദ് വലയത്തിലെ മദ്യഗ്ലാസുകളില്‍
നെരൂദയും ലോര്‍ക്കയും ബോര്‍ഹെസും
സില്‍വിയാപ്ലാത്തും, ബെഞ്ചമിന്‍ മൊളേയ്സും
പിന്നെ അയ്യപ്പനും നുരഞ്ഞു പൊന്തും
അപ്പോഴും മദ്യക്കോപ്പകളില്‍
ലാറ്റിനമേരിക്കന്‍ കാറ്റാഞ്ഞുവീശും
കവിയരങ്ങ് നോട്ടീസിലെ അവസാനപ്പേരുകാരന്‍,
ബ്ലോഗെഴുത്ത് ഫേസ് ബുക്ക്
എന്നൊക്കെ കേട്ടിട്ടേയുള്ളു
ജപ്തിനോട്ടിസ് വന്നാല്‍
ലിറ്റില്‍ മാഗസിനിലെ കവര്‍ സ്റ്റോറി
മുഖ്യധാരാ ഇടങ്ങളില്‍ സ്ഥാനമുണ്ടാക്കാന്‍
പഞ്ചപുച്ഛമടക്കി നില്‍ക്കാറില്ല
കാഷ് അവാര്‍ഡിന്റെ കൊഴുപ്പ് കണ്ട്
കവിതയെ ഉന്തിത്തള്ളി പുരസ്ക്കാര
കമ്മറ്റിക്കു മുമ്പാകെ പറത്തുവിടും
മറ്റു കൊഴുത്ത കവിതകള്‍ ഉടയാടകളഴിച്ച്
റാമ്പില്‍ പൂച്ച നടത്തം ചെയ്യുന്നതുകണ്ട്
ചമ്മല്‍ മറച്ച് കവിതയെ കൂട്ടിക്കൊണ്ടുപോരും
മുള്ളു വെച്ച വാക്കുകള്‍ കൊണ്ട്
ചോരപ്പശിമയുള്ള ബിംബങ്ങള്‍ നിരത്തി
വേര്‍പ്പുമണക്കുന്ന അനുഭവങ്ങളില്‍
നിന്നു ഖനനം ചെയ്തെടുക്കുന്ന കവിതകള്‍
അക്കാദമിക് അധികാരികളെ
അസ്വസ്ഥരാക്കുന്നുണ്ടുപോലും എങ്കിലും
കഴുക്കോലില്‍ കെട്ടിയ കയറഴിച്ചും
വിഷപ്പാത്രം തട്ടിത്തെറുപ്പിച്ചും
ജലച്ചുഴിയില്‍ നിന്നുയര്‍ത്തിയെടുത്തും
റെയില്‍ പ്പാളങ്ങളില്‍ നിന്നും വലിച്ചെടുത്തും
കവിത കൂടെ പൊറുക്കുന്നു
റേഷന്‍ കാര്‍ഡില്‍ പേര്‍ ചേര്‍ത്തിട്ടില്ലെങ്കിലും.

Generated from archived content: poem1_agu27_13.html Author: b_josekutty

അഭിപ്രായങ്ങൾ

അഭിപ്രായങ്ങൾ

SHARE
Previous articleരാജസൂയം: ഭാഗം -5
Next articleഗാന്ധിജിയുടെ അന്ത്യപ്രഭാഷണങ്ങളുടെ ആന്തരിക ശക്തിയെകുറിച്ച്
ആലപ്പുഴ പൂന്തോപ്പ് വാര്‍ഡില്‍ ബേബി പൈലോയുടേയും ചിന്നമ്മ ബേബിയുടേയും മകന്‍ . ധനതത്വ ശാസ്ത്ര ബിരുദധാരിയാണ്. ഫ്രീലാന്‍സ് ജേര്‍ണലിസ്റ്റും റേഡിയോയില്‍ പ്രോഗ്രാം പ്രൊഡ്യൂസറുമാണ്. ‘ ഇഹലോകജീവിതം’ എന്നൊരു കഥാസമാഹാരം പുറത്തിറക്കിയിട്ടുണ്ട്. കളിവള്ളം (വീഡിയോ ഫിലിം) ചമ്പക്കുളം പെരുമ , ദ അഡ് വേഴ്സിറ്റി എന്നി ഡോക്യുമെന്ററികളും ഏതാനും കവിത, സംഗീതാവിഷ്ക്കാരമടങ്ങിയ ആ‍ല്‍ബങ്ങളും പുറത്തിറക്കിയിട്ടുണ്ട്. ഡോ. അയ്യപ്പപണിക്കര്‍ കവിതാപുരസ്ക്കാരം, ഭിലായ് മലയാള ഗ്രന്ഥശാല പുരസ്ക്കാരം, അങ്കണം ( കൊച്ചുബാവ സ്മാരകപുരസ്ക്കാരം) ഉള്‍പ്പെടെ ഏതാനും പുരസ്ക്കാരങ്ങളും ലഭിച്ചിട്ടുണ്ട്. Address: Phone: 09961077837,09497221722

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English