കണ്ണന്‍റെ പുല്ലാങ്കുഴല്‍

kannate

കുഴലൂതും കണ്ണന്‍റെ കമനീയവിഗ്രഹം
എന്‍റെ പൂജാമുറിയിലിരുന്നിരുന്നു
കഞ്ജവിലോചനന്‍ ചാരുത പൂത്തപോല്‍
പുഞ്ചിരി മാരികള്‍ പെയ്തു നിന്നു

ആരോ പറഞ്ഞുപോയ് വീട്ടിലെ കണ്ണന്
പുല്ലാങ്കുഴലണി പാടില്ലത്രെ
കുഴലൂതി കുഴലുതി കള്ളനവന്‍ പിന്നെ
ഗൃഹമാകെ ഊതിക്കെടുത്തുമത്രെ

അതുകേട്ടു പേടിച്ചു വീട്ടമ്മ ഉണ്ണിതന്‍
കുഴലെടുത്തെങ്ങാണ്ടൊളിച്ചു വച്ചു
കുഴല്‍ പോയ കണ്ണന്‍റെ പുഞ്ചിരി മങ്ങിയോ
കദനം കടക്കണ്ണില്‍ പൂവിട്ടുവോ

അതു വഴി പോയൊരെന്‍ കണ്ണുകള്‍ കണ്ണന്‍റെ
കുഴലില്ലാ കൈകളില്‍ വീണുപോയി
കീശയില്‍ നിന്നെന്‍റെ നീലനിറപ്പേന
ഊരി ഞാന്‍ ഉണ്ണിതന്‍ കയ്യില്‍ വച്ചു

പിന്നെയും പാടിത്തുടങ്ങിയല്ലൊ കണ്ണന്‍
പിന്നെയും പുഞ്ചിരി മാരി തൂകി
ഉണ്ണിതന്നംഗുലി പുല്‍കിയ തൂലിക
പുല്ലാങ്കുഴലായി ഭാഗ്യവതി

ഞാനുമെന്‍ കണ്ണനും മാത്രമറിയുന്ന
ഗോപ്യരഹസ്യമായ് പേനക്കുഴല്‍
കണ്ണന്‍റെ കണ്‍കളിലെപ്പഴും കാണായി
എന്നും മങ്ങാത്തൊരു കള്ളച്ചിരി

തൂലികത്തുമ്പിലെ വാണിപ്പെണ്ണും കൂടെ
തൂമയില്‍ പാടാന്‍ തുടങ്ങിയപ്പോള്‍
മാധുര്യമൂറുന്ന കണ്ണന്‍റെയൂത്തിന്
ജ്ഞാനത്തിന്‍ തത്തകള്‍ ശീലുകൂട്ടി

കുഴലൂതി കുഴലുതി പാടിനില്‍കൂ കണ്ണാ
ഇരുള്‍ തിങ്ങും അജ്ഞാനം മാറിടട്ടെ
നിന്‍ വിരല്‍തുമ്പില്‍ കളിക്കുമെന്‍ തൂലിക
ഉപനിഷദ് സൂക്തങ്ങള്‍ പാടിടട്ടെ
ഗഹനസത്യങ്ങളുതിര്‍ത്തിടട്ടെ

അഭിപ്രായങ്ങൾ

അഭിപ്രായങ്ങൾ

SHARE
Previous articleമേഘയാത്രികന്‍
Next articleസൗഹൃദങ്ങൾ
മഠത്തിൽ രാജേന്ദ്രൻ നായർ
ജീവിതത്തില്‍ വളരെ വൈകിയാണ് എഴുതിത്തുടങ്ങിയത്. അറുപതിന് ശേഷം. ആംഗലത്തില്‍ കുറെ കവിതകള്‍ രചിച്ചിട്ടുണ്ട്. അവ മിക്കതും ഈ ലിങ്കില്‍ കാണാം: http://www.poemhunter.com/madathil-rajendran-nair/poems/?a=a&search=&l=2&y=0 വേദാന്തത്തിലും ജ്യോതിഷത്തിലും താല്‍പര്യം. ചില വേദാന്തലേഖനങ്ങള്‍ വെബ്ബില്‍ പ്രസിദ്ധീകരിച്ചിട്ടുണ്ട്. പാലക്കാടനായ ഞാന്‍ മിക്കവാറും കൊയമ്പത്തൂരിലാണ് താമസം. 36 വര്‍ഷം കുവൈറ്റില്‍ പ്രവാസിയായിരുന്നു. E-Mail: madathil@gmail.com

അഭിപ്രായം എഴുതുക

Please enter your comment!
Please enter your name here

 Click this button or press Ctrl+G to toggle between Malayalam and English